Ամփոփում ենք 2018-ը. «Իզմիրլյան» ԲԿ բուժական գծով փոխտնօրեն Տիգրան Նալբանդյանի Ամանորյա շնորհավորական ուղերձը. izmirlianmedicalcenter.com

Անցնող 2018 թվականն «Իզմիրլյան» բժշկական կենտրոնի համար հաջողությունների ամրապնդման տարի էր: Նախորդ տարիների համեմատությամբ մենք ունենք հիվանդների դիմելիության և իրականացված վիրահատությունների կտրուկ աճ, ինչը պայմանավորված է կենտրոնի մատուցած ծառայությունների որակով ու հեղինակության բարձրացմամբ: Ակնառու է, որ շատերն են ձգտում մեզ մոտ բժշկական օգնություն ստանալ: Արդեն 4 տարի է, վստահ քայլերով առաջ ենք շարժվում դեպի լավը, դրականը, գեղեցիկը, և փորձում ենք զարգացնել ու նոր թափ հաղորդել դրան:

Մեր հեղինակության և ճանաչելիության ընդլայնումն այս տարվա ամենամեծ ձեռքբերումն է, ինչն ամբողջ անձնակազմի աշխատանքի, կետրոնի գործունեության ճիշտ կազմակերպման և բժիշկների բարձր պրոֆեսիոնալիզմի արդյունք է:
Ներկայում կենտրոնն աշխատում է ծանրաբեռնված, ինչը վերաբերում է լաբորատոր, ճառագայթային ախտորոշման բաժանմունքներին և վիրահատական ծավալներին:

Մեր ծրագրերում նախատեսված է խորացնել միջազգային համագործակցությունը տարբեր միջազգային ընկերությունների հետ, ավելի շատ բժիշկներ գործուղել տարբեր երկրներ` վերապատրաստման, միտված նոր գաղափարները և տեխնոլոգիաները բժշկական կենտրոնում կիրառելուն:

Ուրախությամբ պետք է նշեմ, որ մեզ մոտ բավականին ցածր է մահացության տոկոսը, ինչն անձնակազմի պրոֆեսիոնալ աշխատանքի արդյունքն է:  Երբ անհույս հիվանդը կյանքի է վերադառնում, դա բժշկի, ամբողջ անձնակազմի համար մեծ ուրախություն է… Ունեցանք դեպք… Միջին տարիքի սրտային խնդիրներով տղամարդու մոտ սրտի կանգ գրանցվեց: Ես ևս շտապ բարձրացա վերակենդանացման բաժանմունք: Բժիշկներն արդեն վերակենդանացման միջոցառումներ էին իրականացնում: 40 րոպե լարված փորձում էին կյանքի վերադարձնել, արդեն հուսահատված էին, մտածում էին դադարեցնել պայքարը… Եվ հանկարծ, Աստծո՞ կամոք, թե՞ բժիշկների ջանքերով, հիվանդի սիրտը նորից սկսեց բաբախել: Հիվանդը գիտակցության եկավ… Կարծում եմ, դրանից մեծ ուրախություն չկա բժշկի համար:

Որպես «Իզմիրլյան» ԲԿ-ի  բուժ․ գծով փոխտնօրեն, ամբողջ անձնակազմին ցանկանում եմ նոր ձեռքբերումներ, ցանկացած իրավիճակում, կյանքի ու մահվան պայքարում լինել հաղթող, ու որ պացիենտները միշտ հեռանան գոհունակությամբ և ժպիտով:

Ցանկանում եմ մեր ազգը, որը միշտ հաղթող է եղել, դարձյալ հաղթող լինի ու նրա մեջ հաղթողի գաղափարը երբեք չերերա, որ մեր զինվորները միշտ ծառայեն խաղաղ երկրում, խաղաղ երկնքի տակ, իրենց զավակներին բանակ ճանապարհող ընտանիքներն ուրախությամբ դիմավորեն նրանց:

Ժողովրդին մաղթում եմ, նախևառաջ, առողջություն, իսկ եթե հիվանդանում են, երբեք չվհատվեն, երբեք չկոտրվեն այս կյանքում, ընդունեն, որ ոչ մի հիվանդություն դատավճիռ չէ: Պետք է պարզապես պայքարել ու հաղթել այդ պայքարում:

Թերևս, ցանկացած մարդու մեջ փոքրիկ երեխան շարունակում է ապրել և, որքան էլ տարիքը մեծ լինի, միևնույն է, սրտի թրթիռով և նոր սպասումներով է դիմավորում Նոր Տարին:

Շնորհավորում եմ բոլորին Ամանորի և  Սուրբ Ծննդյան  տոների առթիվ, մաղթում առողջ և խաղաղ տարի, ակնկալում նոր գաղափարների և ծրագրերի իրականացում:

Հարցեր, պատասխաններ, մեկնաբանություններ