Լսողական սարքերի կիրառումը լսողության թուլության ժամանակ. հաճախ տրվող հարցերին պատասխանում է քիթ-կոկորդ-ականջաբան Գարեգին Միրաքյանը. armeniamedicalcenter.am

1.  Ի՞նչ է լսողության կորուստը և ե՞րբ է այն դիտվում որպես ախտաբանություն:

Լսողության կորուստը դա այն իրավիճակն է, երբ մարդը այս կամ այն չափով դժվարանում է ընկալել շրջակա ձայները: Ախտաբանական համարվում է լսողության իջեցման այն տեսակը, որն առաջանում է լսողական օրգանի մեխանիկական, բորբոքային վնասման պատճառով:

2.  Եթե սկսում է լսողությունը թուլանալ, որքա՞ն շուտ հնարավոր է նկատել:

Լսողության թուլացման առաջին ահազանգ է տան անդամների համեմատ հեռուստացույցն ավելի բարձր ձայնով լսելը, հարցը կրկնել տալը եւ այլն:

3.  Ե՞րբ ստուգել լսողությունը:

Եթե նկատվում է վերը նշված ախտանիշներից որևէ մեկը , ուրեմն անհրաժեշտ է կատարել լսողության հետազոտություն:

4.  Ինչպե՞ս ստանալ հաշմանդամություն:

Լսողության իջեցման պատճառով հաշմանդամություն տրամադրում են հատուկ քննություններից հետո և օրենքով սահմանված կարգով, եթե լսողության իջեցման աստիճանը համապատասխանում է տվյալ
պահանջներին:

5. Ի՞նչ սկզբունքով են աշխատում լսողական սարքերը:

Լսողական սարքերը լինում են անալոգային և թվային:

6. Լսողական սարքերի ի՞նչ տեսակներ կան ըստ հզորության և գնի:

Լսողական ապարատները ըստ իրենց հզորության նախատեսված են լսողության թեթև, միջին և ծանր կորուստների համար: Լսողական ապարատների արժեքները շատ տարբեր են, կախված իրենց կատարելագործվածության աստիճանից:

7. Ի՞նչ է կոչվում սարքի ծրագրավորում:

Լսողական սարքի ծրագրավորումն այն է, երբ լսողության իջեցման բոլոր տվյալները համակարգչի հատուկ ծրագրի միջոցով մուտքագրվում են սարքի մեջ, և լսողական սարքն աշխատում է խիստ  անհատական :

8. Կա՞ն լսողական սարքերի երաշխիքներ:

Լսողական սարքերի երաշխիքային սպասարկման ժամկետները տատանվում են 1-3 տարի` պայմանավորված սարքի մոդելով:

9. Ինչպե՞ս ընտրել լսողական սարք:

Լսողական սարքի ընտրությունը կատարում է մասնագետը՝ ելնելով լսողության իջեցման անհատական առանձնահատկություններից:

10. Եթե թուլացած է լսողությունը երկու ականջում, արդյո՞ք պետք է կրել երկու ականջում:

Եթե կա երկկողմանի լսողության իջեցում, ցանկալի է կատարել երկկողմանի պրոթեզավորում, իհարկե, լինում են բացառություններ:

11. Ո՞ր դեպքերում հարմար չեն ներականջային սարքերը:

Ներականջային սարքերը ցանկալի չեն, եթե ականջում առկա է խրոնիկ բորբոքային պրոցես, որովհետեւ նման դեպքերում գոյություն ունի անսարքության վտանգ: Լսողության ծանրագույն կորստի ժամանակ եւս դրանք ցանկալի չեն:

12. Կարելի՞ է ընտրել լսողական սարք առանց պացիենտի:

Առանց պացիենտի լսողական սարք ընտրելը ցանկալի չէ:

13. Կարելի՞ է վերցնել փորձնական սարք` նախքան գնելը:

Իհարկե, հնարավոր է տրամադրել փորձնական սարք: Սակայն փորձնական սարք կրելն ունի իր բացասական կողմերը: Քանի որ լսողական սարքերը բազմատեսակ են, և ընտելացման շրջանի տևողությունն անհատական է, ,պացիենտները հաճախ խճճվում են և չեն կարողանում կողմնորոշվել, որն է իրենց հարմար:

14. Դժվա՞ր է հարմարվել լսողական սարքին:

Լսողական սարքին հարմարվելը խիստ անհատական է: Այն տեւում է 7 օրից մինչև 3 ամիս:

15. Ինչո՞ւ պացիենտները չեն ցանկանում կրել լսողական սարքեր:

Պացիենտների մոտ հաճախ լսողական սարքից հրաժարվելու պատճառը  զուտ սարք կրելու փաստն է: Նրանք չեն ցանկանում կրել սարքը, որպեսզի խուսափեն հասարակական կարծիքներից. դա հատկապես արտահայտված է երիտասարդների մոտ: Ոչ հաճախ հրաժարվում են օտար մարմնի զգացողության պատճառով:

16. Սարքը կրելուն պես լավանո՞ւմ է լսողությունը:

Սարքը կրելու ընթացքում անմիջապես լսողության լավացում նկատվում է սարքի առկայության դեպքում, իսկ սեփական լսողության լավացումը սարք կրելու ընթացքում խիստ անհատական է ու պահանջվում է ժամանակ:

17. Ինչպե՞ս կրել լսողական սարքերը ադապտացիայի էտապում:

Ադապտացիայի ընթացքում սարքը կրում են աստիճանաբար: Օրվա ընթացքում սկսում են 1 ժամից եւ հաջորդ օրերին կրելու ժամանակն ավելացնում մինչև լրիվ հարմարվելը:

18. Կարո՞ղ է երկար կրելուց աղմուկ առաջանալ:

Երկար կրելուց ականջներում աղմուկ չի առաջանում. ընդհակառակը, եթե ականջներում կա աղմուկ՝ ապարատ կրելու ընթացքում դա նվազում է:

19. Կարո՞ղ է լսողական սարքը մշտական կրելու դեպքում վատացնել լսողությունը:

Երբեք: Լսողական սարքը կարող է վատացնել լսողությունը ոչ թե երկար օգտագործելու դեպքում, այլ ըստ լսողության իջեցման աստիճանի լսողական սարքի ոչ ճիշտ ընտրության և ոչ ճիշտ կարգավորման պատճառով:

20. Որքա՞ն ժամանակ կարելի է կրել լսողական սարքը:

Լսողական սարքը կարելի է կրել այնքան ժամանակ , որքան պացիենտին հարմար է:

21. Կարող է սարքը բերել, այսպես կոչված` լսողության ծուլանալուն:

Լսողական սարքը ոչ թե ծուլացնում, այլ ակտիվացնում է լսողական բջիջները:

22. Ի՞նչ անել, եթե սարքի օգնությամբ լսվում է սովորականից ցածր:

Եթե լսողական սարքով ավելի ցածր կամ բարձր է լսվում, քան անհրաժեշտ է պացիենտին՝ նա կարող է ձայնի բարձրությունը կարգավորել սարքի վրա տեղակայված ձայնի կարգավորիչով, կարող է մոտենալ մասնագետին և փոփոխել սարքի ծրագրավորման միջոցով, կարելի է փոփոխել հեռակարավարման վահանակի միջոցով ՝ կախված սարքի մոդելից:

23. Ինչո՞ւ է սարքից ձայներ գալիս կամ սուլում է, ի՞նչ անել:

Դրանք սուլում են, քանի որ հերմետիկ չեն տեղադրվում: Անհրաժեշտ է պատրաստել անհատական ներդիր:

24. Ի՞նչ անել, եթե ցավի զգացողություն կա, կամ ականջում բորբոքում կա:

Եթե ականջում առկա է ցավի զգացողություն կամ արտադրություն, ապա անհրաժեշտ է ժամանակավորապես դադարեցնել սարքի գործածումը:

25. Կարո՞ղ է ցավ առաջանալ ականջում ամբողջ օրը լսողական սարքը կրելուց հետո:

Ոչ, եթե ճիշտ է տեղադրված:

26. Կարող է սարքն օգնել` լսելու աղմկող վայրում, կամ օգնել հստակեցնելու ձայները:

Սարքը կարելի է օգտագործել ձայնային բոլոր իրավիճակներում: Սարքերը տարբերվում են աղմուկը ֆիլտրելու ունակություններով ` կախված իրենց կատարելագործվածության աստիճանից:

27. Ինչպե՞ս խնամել լսողական սարքերը:

 Սարքերը անհրաժեշտ է պահել մաքուր եւ հնարավորինս հեռու ջրից, կրակից :

28. Որքա՞ն երկար են ծառայում լսողական սարքերը:

Լսողական սարքերի օգտագործման միջին ժամանակը 3-5 տարի է:

29. Եթե կարիք կա վերանորոգման, ի՞նչ անել:

Վերանորոգել:

30. Ինչպիսի՞ մարտկոցներ կա՞ն:

Լսողական ապարատների համար նախատեսված մարտկոցների աշխատելու ժամանակը կախված է մարտկոցի
չափից, լսողական սարքի հզորությունից:

31. Որքա՞ն է հերիքում մարտկոցը:

5-30 օր:

32. Ի՞նչ անել, եթե մարտկոցը սպառվել է:

Եթե մարտկոցը սպառվել է, անհրաժեշտ է փոխել այն:

33. Որքա՞ն երկար կարելի է պահել մարտկոցները:

Կարելի է պահել մինչեւ ժամկետի ավարտը:

34. Ինչո՞ւ չընտրել սնդիկ պարունակող մարտկոցներ:

Քանի որ ժամանակակից մարտկոցները չեն պարունակում:

Հարցեր, պատասխաններ, մեկնաբանություններ