ՀՀ ԱՆ «Նորք» հոգեբուժական կենտրոնում բարեփոխումներ են իրականցվել. Գագիկ Միրիջանյան

Օրերս զրուցեցինք ՀՀ «Նորք» հոգեբուժական կենտրոնի տնօրեն` Գագիկ Միրիջանյանի հետ, ով զրույցի ընթացքում ներկայացրեց կարճ ժամանակահատվածում կենտրոնում իրականցված բարեփոխումները, որի կարիքը վաղուց կար: Ավարտվել են զարգացման ծրագրերի շրջանակում նախատեսված բոլոր կարճաժամկետ ծրագրերը. «Արդյունքում այսօր ունենք կենտրոնում ստեղծված մասնագիտական բաժանմունքներ, որոնք օրենքի սահմաններում կարողանում են կենտրոնին ապահովել հավելյալ ֆինանսական միջոցներ, ինչը հնարավորություն է ընձեռում նախագծում տեղ գտած հաջորդիվ ծրագրերն իրականացնել` կապված աշխատավարձերի բարձրացման, մի շարք ծառայությունների մատուցման և հիվանդների պայմանների բարելավման հետ»:

Խոսելով զարգացման երկարաժամկետ ծրագրերի իրականացման մասին` Գ. Միրիջանյանն ասաց, որ ներկայում ծրագրերը քննարկման փուլում են, սակայն մոտ ժամանակներն իրագործման փուլում կհայտնվեն. «Նպատակ կա մեր կենտրոնում ստեղծել շտապ հոգեբուժական ծառայություն, որն առավել մատչելի կդարձնի հոգեբուժական օգնությունն` արդեն տան պայմաններում, առավել մասնագիտական և որակյալ կդարձնի հիվանդների տեղափոխումը ո՛չ միայն կենտրոն, այլ, անհրաժեշտության դեպքում, նաև տարբեր բժշկական կենտրոններ: Մեզ համար կարևոր է ապահովել հոգեկան խանգարում ունեցող հիվանդներին մասնագիտացված խնամք և վերականգնողական բուժում»:

Հարցին, թե ինչ խնդիրների հետ է հասցրել բախվել կենտրոնի ղեկավարման վեց ամիսների ընթացքում` Գ. Միրիջանյանն ասաց հետևյալը. «Կարծում եմ մեր բուժանձնակազմի իրականացված աշխատանքի արդյունքն է, որ այս վեց ամիսների ընթացքում ունենք հիվանդների ներհոսք` նախկինում նույն ժամանակահատվածում բուժվում էր միջինը 75 հոգեկան խանգարում ունեցող հիվանդ, այժմ` 100 և ավելի»:

Գ. Միրիջանյանի խոսքով կենտրոնում միաժամանակ ներդրվել է քաղիրավական ծառայություն`այլ մասնագիտությամբ բժիշկների ծառայության մատուցում: «Եթե նախկինում բացի հոգեբույժներից մեր կենտրոնում աշխատում էին նեղ մասնագետներից նյարդաբան և թերապևտ, ապա այժմ մատուցվում են այլ մասնագիտական ծառայություններ ևս, մասնավորապես` վիրաբուժական, ուրոլոգիական, գինեկոլոգիական և ներզատաբանական խորհրդատվություններ: Բավականին լուրջ բարեփոխումներ են տեղի ունեցել լաբորատոր ծառայությունում. ունենք նոր, աութսորսինգային պայմանագիր. այն ծածկում է լաբորատոր բոլոր տեսակի հետազոտությունների ծախսերը»:

Գ. Միրիջանյանն անդրադարձավ նաև առկա խնդիրներին. «Ամենախնդրահարույցը, որն առկա է հոգեբուժության մեջ` մասնագետների պակասն է: Անձնակազմում հոգեբույժների միջին տարիքը բավականին բարձր է: Նրանք պատրաստակամ են գործը զիջել երիտասարդներին, սակայն, ցավոք, երիտասարդ կադրերի պակաս կա. խնդիրը մոտիվացիայի բացակայությունն է, ինչն արժանի է դիտարկման: Կադրային պատրաստվածությամբ քույրական և հարքույրական անձնակազմը նույնպես վերանայման կարիք ունի: Բացը շտկելուն միտված` կնքեցինք համաձայնագիր «Բուժքույրերի միավորում» ՀԿ հետ: Առաջին քայլն արված է. կենտրոնի բուժքույրերը օրերս ներկա էին ՀԿ-ի նախագահի դասախոսությանը: Հետագայում կփորձենք ապահովել շարունակական մասնագիտական կրթության զարգացումը, ատեստավորման միջոցով շահագրգիռ դարձնենք հարքույրական գործը (հիվանդապահ)»:

Միևնույն ժամանակահատվածում կնքվել էր ևս մեկ համաձայնագիր «Տարեցների առողջության և խնամքի ապահովման ասոցիացիա» ՀԿ-ի հետ, որի 10 կամավորներ ներկայում կենտրոնում անվճար հիմունքներով իրականացնում են հոգեկան խանգարում ունեցող հիվանդների խնամք: 

2016 թ. տարեվիրջին կենտրոնը «Leader of the branch 2016»-ի կողմից արժանացավ մրցանակի, ըստ որի կենտրոնը Հայաստանի Հանրապետության առևտրային կազմակերպությունների «Աճի տեմպի» ցուցանշով զբաղեցնում է 6-րդ տեղը: Նույն ժամանակահատվածում կնքվեց ևս 2 համաձայնագիր Վրաստանի հոգեբուժական կազմակերպությունների հետ: Մոտ ապագայում նախատեսվում է կազմակերպել կլոր սեղան, որի շրջանակում կքննարկվեն հոգեբուժական ոլորտում առկա խնդիրները, դրանց լուծումները, ինպես նաև տեղի կունենա փորձի փոխանակում և կձեռնարկվեն քայլեր համաձայնագրով նախատեսված երկկողմանի համագործակցության վերաբերյալ:

Կենտրոնի ղեկավարը վստահ է, որ կարևոր բաղադրիչ է ֆինանսական կողմը: Ըստ Միրիջանյանի` աշխատավարձի բարձրացմանը զուգընթաց, շատերը կցանկանան գալ և աշխատել հոգեբուժարանում:

Զրույցի վերջում Գ. Միրիջանյանն ասաց, որ Հայ հեղափոխական դաշնակցության առաջիկա ընտրություններին մասնակցում է վարկանշային ընտրակարգով: «Առաջադրված եմ Արաբկիրում (թիվ 2 ընտրատարածք), որտեղ ծնվել և մեծացել եմ, որտեղ ունեցել եմ իմ բոլոր հաջողությունները, որի հետ կապված են միայն ու միայն վառ ու բարի հիշողություններ: Կրկնակի պատվաբեր է, որ Հայ հեղափոխական դաշնակցության շարքերում եմ. կայուն և պինդ կուսակցության, որն ունի մեկ դարից ավելի պատմություն: Հայ հեղափոխական դաշնակցությունն այն հազվագյուտ կուսակցություններից է, որ ներկայացված է ո՛չ միայն Հայաստանում, այլ նաև` Սփյուռքում:

Թեև երիտասարդ եմ, այն փորձը, գիտելիքները, որ ձեռք եմ բերել առողջապահության ոլորտում, մասնավորապես` հանրային առողջության և առողջապահության կազմակերպման մեջ, հնարավոր է, պիտանի լինեն ԱԺ-ում»:

Հարցեր, պատասխաններ, մեկնաբանություններ