Ճանապարհ դեպի Զալցբուրգի բժշկական միջազգային սեմինար. Աստղիկ Մարկոսյան

Ամերիկյան-ավստրիական հիմնադրամը շուրջ 20 տարի բժիշկների համար իրականացնում է Զալցբուրգի բժշկական միջազգային սեմինարներ, որոնք ո՛չ միայն նպաստում են բժիշկների տեսական և գործնական գիտելիքների հարստացմանը, այլև օգնում են ստեղծել անձնական կապեր օտարերկրյա գործընկերների հետ: Այդ տարիների ընթացքում մասնագիտական սեմինարներին մեր երկրից մասնակցել է 901 հայ բժիշկ:

Սեմինարների մասին մանրամասն զրուցել ենք Հայաստանում Զալցբուրգի բժշկական միջազգային սեմինարների կոորդինատոր Աստղիկ Մարկոսյանի հետ:

–   Զալցբուրգի բժշկական միջազգային սեմիներների ծրագիրն ի՞նչ է իրենից ներկայացնում:

–   Ամերիկյան-ավստրիական հիմնադրամն արդեն ավելի քան 20 տարի է, ինչ հիմնել է «բաց բժշկական ինստիտուտը», որի հիմնական ծրագրերից է Զալցբուրգի բժշկական միջազգային սեմինարները: Ծրագրի նպատակն է մասնագիտական աջակցություն ցուցաբերել անցումային շրջանում գտնվող երկրների առողջապահական համակարգերին՝ նպաստելով կադրային ներուժի, այսինքն, բժիշկների մասնագիտական գիտելիքների հարստացմանը: Այս ծրագրի յուրահատկությունը նրանում է, որ այն կարճաժամկետ է՝ մեկ շաբաթյա կամ մեկամսյա, որին կարող են մասնակցել միայն պրակտիկ բժիշկները: Սա բժշկական կրթություն է, որը տեղի է ունենում փորձի փոխանակման միջոցով: Յուրաքանչյուր մասնագիտական սեմինարի մասնակցում են տարբեր երկրներից 30-40 բժիշկներ և դասախոսներ, ովքեր ծրագրի շրջանակում իրականացնում են փորձի փոխանակում, որի արդյունքում ստեղծվում են նաև անձնական կապեր, ձևավորում է հետագա միջազգային  համագործակցության հարթակ: Ծրագիրը, որը նախատեսված է բժշկական համարյա բոլոր ճյուղերի համար (մանկաբուժություն, վիրաբուժական և թերապևտիկ մասնագիտություններ, և այլն), իրականացվում է Ավստրիայի Զալցբուրգ քաղաքում:

–   Տարվա ընթացքում ի՞նչ հաճախականությամբ են կազմակերպվում սեմինարները:

–   Մոտավորապես 20-30 տարբեր թեմատիկ սեմինարներ են կազմակերպվում: Ծրագրի շրջանականերում արդեն մի քանի տարի է նաև կազմակերպվում են, այսպես կոչված, «առաջնորդության սեմինարներ», ինչպիսիք են բժշկական կրթության, որակի ապահովման և պացիենտի անվտանգության, բժշկական առաջնորդության, կիրառական կլինիկական հետազոտությունների և բժշկական ինֆորմատիկայի սեմինարները: Վերջիններիս կարող են մասնակցել միայն այն բժիշկները, ովքեր արդեն մասնակցել են իրենց գործունեությանն առնչվող որևէ մասնագիտական սեմինարի:

Սեմինարների շրջանավարտներն ունեն նաև հնարավորություն երեք անգամ դիմելու մեկ ամիս տևողությամբ պրակտիկ վերապատրաստման Ավստրիական որևէ կլինիկա՝ Վիեննա, Զալցբուրգ, Գրաց, կլինիկական հմտությունների բարելավման նպատակով: Սա կոչվում է observership:  
Սեմինարի շրջանավարտները հետագայում հնարավորություն ունեն իրենց երկրներում մասնագետներին հետաքրքրող թեմաների շուրջ կազմակերպել սեմինարներ՝ սատելիտային սիմպոզիումներ, և հրավիրել բաց բժշկական ինստիտուտի ամերիկյան ու ավստրիական դասախոսներին:

–   Խոսենք սեմինարին մասնակցելուն վերաբերող ոչ պակաս հրատապ ֆինանսական կողմի մասին

–   Ճանապարհի և կացության հետ կապված ծախսերը հոգում են ծրագրի նախաձեռնողները՝ ամերիկյան-ավստրիական հիմնադրամը:

–   Ովքե՞ր կարող են դիմել` ծրագրին մասնակցելու:

–   Ծրագրին կարող են դիմել ՀՀ-ում մասնագիտությամբ աշխատող բոլոր բժիշկները՝ անկախ աշխատանքի և բնակության վայրից: Մասնակցության համար տարիքային սահմանափակում չկա, կարևոր է ունենալ համապատասխան մասնագիտական դիպլոմ (բժիշկի) և անգլերենի իմացություն:

–   Որտե՞ղ և ինչպե՞ս դիմել:

–   Ցանկացողները կարող են գրանցվել www. aaf-online.org կայքում, լրացնել պահանջվող անձնական տվյալները, ներբեռնել և լրացնել փաստաթղթերի էլեկտրոնային տարբերակները: Ներկայացված փաստաթղթերի հիման վրա նրանք կմասնակցեն հարցազրույցի և անգլերեն լեզվի քննության: Հաջորդ փուլում ծրագրի կազմակերպիչներն ընտրում են սեմինարների մասնակիցներին: Կայքում կան անհրաժեշտ կոնտակտային տվյալները, հարցերի դեպքում կարող են կապ հաստատել լոկալ համակարգողի հետ:

 Ներբեռնել.
Salzburg Stiftung of the AAF

Հարցեր, պատասխաններ, մեկնաբանություններ