Ներհիվանդանոցային վարակների բացահայտումն ու կանխարգելումը` բարձրորակ բուժօգնության երաշխավոր. Անահիտ Սարգսյանի

Ներհիվանդանոցային ինֆեկցիաների կանխարգելման խնդիրը ողջ աշխարհում շարունակում է մնալ  առողջապահության կարևորագույն  հիմնահարցերից: Դրանք միշտ կան և ծագում են գրեթե բոլոր բուժհաստատություններում : Իսկ վարակների առաջացրած հետևանքներիմասին, կարծում ենք, գիտի յուրաքանչյուրը:

Առաջին հերթին դրանք նվազեցնում են բուժման արդյունավետությունը, պահանջում են չնախատեսված մեծ ծախսեր, բարձրացնում մահացության ցուցանիշը և այլն: Տարբեր երկրներում գործում են ինֆեկցիոն հսկողության ազգային ծրագրեր, որոնք ուղղված են վարակների հայտնաբերմանն ու նվազեցմանը: Հայաստանյան բուժհիմնարկներում ինֆեկցիոն հսկողությունն իրականացվում է դեռևս խորհրդային ժամանակներից եկած եղանակներով, որն այնքան էլ արդյունավետ չէ և առաջացնում է համաճարակների բռնկման բարձր ռիսկ: 

2012 թ. հունվարից Էրեբունի բժշկական կենտրոնում գործում է Ներհիվանդանոցային ինֆեկցիաների (ՆՀԻ) գիտա-մեթոդական կենտրոն, որը փարձում է կարգավորել այս ոլորտը Հայաստանում: Կենտրոնի նպատակն է նպաստել բուժօգնության որակի բարձրացմանը` ներհիվանդանոցային ինֆեկցիաների  կանխարգելման և դրանց նվազեցման միջոցով:  «Կենտոնը գործում է շուրջ  մեկ տարի. բուն ֆունկցիաների կազմավորումից, նախնական փուլերից հետո աշխատանքները սկսել է հունվարից: Առաջին քայլերն  արվել են  ընդհանրապես բաց վիճակագրության մեջ, երբ հավաքվում էր տեղեկատվություն մի բանի մասին, որից  ընդհանրապես մարդիկ տեղյակ չէին: Բացի երևանյան բուժհաստատություններից, քայլեր ենք ձեռնարկել ևս մի քանի քաղաքներում` Գյումրի, Կապան և այլն»,- մեզ հետ զրույցում ասաց ՆԻՀ գիտա-մեթոդական կենտրոնի ղեկավար, համաճարակաբան  Անահիտ Սարգսյանը: 

Կենտրոնն իր առաջ խնդիր է դրել մշակել ՆՀԻ-ների ախտորոշման չափանիշներ, ապահովել բուժհիմնարկներում կիրառվող ախտահանիչ նյութերի լաբորատոր հսկողություն: Դաշտում բարեփոխումներ իրականացնելու համար առաջնային քայլերից մեկը վիճակագրություն ստեղծելն է: «Մարդիկ պետք է կարողանան տեսնել խնդիրը, որպեսզի կարողանան մտածել լուծման մասին: Քանի որ չկա վիճակագրություն, մարդկանց թվում է, թե խնդիրն էլ չկա: Այդ պատճառով էլ մենք ձեռնամուխ ենք եղել ստեղծել նախևառաջ վիճակագրություն, որը փաստացի ցույց կտա խնդիրը»,- նշեց  Անահիտ Սարգսյանը:

Կենտրոնի գերնպատակը բուժօգնության որակի բարձրացումն է, որը պետք է իրականացնել բուժհաստատությունների աշխատակազմի հետ  միասին:  Այս նպատակով էլ կենտրոնը ձեռնարկում է ՆՀԻ  վերաբերյալ բժիշկների ուսուցման կազմակերպում, որը ևս միտված է բարձրացնելու բուժօգնության որակը: Կենտրոնը պարբերաբար հանդիպումներ է կազմակերպում արտերկրից ժամանած համաճարակաբանների հետ, ովքեր կիսվում են իրենց աշխատանքային փորձով, կարելի է ասել,  վերապատրաստում  է բժիշկներին: «Մենք դեռևս փոքր-փոքր քայլերով ենք առաջ շարժվում, սակայն արդյունքն արդեն իսկ տեսնում ենք:  Սա դեռ սկիզբն է, դեռ մեկ տարի չկա ինչ կենտրոնը գործում է: Մենք, համագործակցելով բժշկական կենտրոնների և այլ շահագրգիռ կողմերի հետ , որոշ ժամանակ տևական աշխատանքներից հետո կունենանք մեծ տեղաշարժ այս ոլորտում, արդյունքներն ակնհայտ կլինեն»,- համոզված է համաճարակաբանը:

Դե ինչ, եթե ուզում ենք բուժօգնության բարձր որակ,  աջակից լինենք Հայաստանում իրականացվող առաջին քայլերին` ուղղված ՆՀԻ բացահայտմանը և կանխարգելմանը:

Հարցեր, պատասխաններ, մեկնաբանություններ