«Ունենալով լուրջ խնդիր` ամաչում են դիմել հեգեբույժի». Արմեն Սողոյան

«Հայաստանում հոգեկան առողջության վերաբերյալ հասարակության բոլոր շերտերի իրազեկվածությունն ավելացնելու, հոգեկան առողջության հիմնախնդիրների վրա ուշադրություն հրավիրելու նպատակով Հայկական հոգեբուժական ասոցիացիան (ՀՀԱ) հոկտեմբերի 10-ից հայտարարել էր Հոգեկան առողջության միամսյակ»,- Med-Practic-ի հետ զրույցի ընթացքում ասաց ՀՀԱ նախագահ, Առողջապահության նախարարության լիցենզավորման գործակալության պետ, բժշկական գիտությունների թեկնածու Արմեն Սողոյանն ու փորձեց ամփոփել արդյունքները:

Սողոյանը տեղեկացրեց, որ հանրային իրազեկման բարձրացման նպատակով աշխատանք է տարվել ԶԼՄ-ների հետ. մամուլի ասուլիսներ, առողջապահական հարցեր լուսաբանող հաղորդաշարերում հոգեկան առողջության թեմաներով քննարկումներ, հոդվածների և հարցազրույցների հրապարակումներ: Օրինակ. չորս հաղորդում է հեռարձակվել Հանրային հեռուստաընկերությամբ բուլղարացի լրագրող, ռեժիսոր Ցվետանա Պասկալևայի «Ճառագայթ» հեղինակային հաղորդման շրջանակներում:

Ի դեպ, Հայկական հոգեբուժական ասոցիացիան հատուկ ԶԼՄ ներկայացուցիչների համար հայտարարել է մրցույթ, որի արդյունքները կամփոփվեն օրերս: «Կխրախուսվեն լրագրողներ «Լավագույն ռեպորտաժ», «Լավագույն նյութ» անվանակարգերում»,- ընգծեց Սողոյանը:    
ՀՀԱ նախագահն անդրադարձավ նաև Հոգեկան առողջության միամսյակի ընթացքում ասոցիացիայի կողմից իրականացված այլ աշխատանքներին:  Նա մասնավորապես նշեց, որ միամսյակի ընթացքում անց են կացվել կլոր սեղան- քննարկումներ, սեմինարներ, դասախոսություններ, ինչպես նաև այցելություններ մարզային բուժհիմնարկներ: ՀՀԱ եղել է Լոռու մարզում, ծանոթացել հոգեբուժական դիսպանսերի կատարված աշխատանքներին, շփվել բուժանձնակազմի հետ, խորհրդակցություն ունեցել տեղի առողջապահական ոլորտի ներկայացուցիչների հետ: 

Սողոյանը շեշտեց, որ հանրային իրազեկման ծրագիրը շատ կարևոր է ազգաբնակչության առողջական վիճակի բարելավման հարցերում: Մարդիկ, ըստ Սողոյանի, ունենալով լուրջ խնդիր, ամաչում են դիմել հեգեբույժի, հոգեբանի, կամ` դիմում են կասկածելի ծագում ունեցող մասնագետների օգնությանը, ինչը ավելի է սրում, բարդացնում առողջական վիճակը:

«Մադկանց պետք է բացատրվի, որ հոգեկան խանգարումները` սովորական հիվանդություններ են, որոնք ևս բուժման ենթակա են»,- եզրափակել է Ա. Սողոյանն ու հավելել, որ հոգեբույժի մատուցած ծառայությունները մեր հանրապետությունում կատարվում են պետական պատվերի շրջանակներում` անվճար են:

Հարցեր, պատասխաններ, մեկնաբանություններ