Ամփոփվեցին ոչ վարակիչ հիվանդությունների կանխարգելմանն ու վերահսկմանն ուղղված սքրինինգների առաջին արդյունքները

ՀՀ կառավարությունը 2010թ. հունվարին հաստատել է «Առավել տարածված ոչ վարակիչ հիվանդությունների (ՈՎՀ) կանխարգելման, վաղ հայտնաբերման և բուժման հայեցակարգը և հայեցակարգի կատարումն ապահովող միջոցառումների ցանկը»:

Դրան հաջորդել է ՀՀ կառավարության 2011թ. մարտի «Առավել բարձր մահացություն բերող երեք հիվանդության` սրտանոթային համակարգի, չարորակ նորագոյացությունների և շաքարային դիաբետի ազգային ռազմավարական ծրագրերն ու միջոցառումների ժամանակացույցը»: Այդ մասին լրագրողների հետ հանդիպման ժամանակ ասաց ՀՀ առողջապահության փոխնախարար Սերգեյ Խաչատրյանը: Այս ծրագրերով ամրագրված է ՈՎՀ կանխարգելման վերաբերյալ բնակչության հանրային իրազեկում, բնակչության ռիսկային խմբերում սքրինինգային հետազոտությունների իրականացում, ինչպես նաև ազգային ուղեցույցների մշակում և մասնագետների կրթում:

«Մարդիկ պետք է գիտակցեն, որ իրենց առողջության մասին, առաջին հերթին, ոչ թե բժիշկները պետք է հոգան, այլ հենց իրենք: Մեզ մոտ այն կարծիքն է, որ ընտանեկան բժիշկները պետք է գնան տուն և հարցնեն, թե ինչպե՞ս է հիվանդը, հանկարծ չի՞ վատացել... Սա, այսպես ասած, հին մոտեցում է հարցին, քանի որ այսօր տեղեկատվությունն այնքան բազմաքանակ է, որ մարդիկ կարող են կարդալ իրենց հիվանդությունների, իրենց առողջությանը սպառնացող վտանգող գործոնների, ինչպես նաև սննդամթերքի որակի մասին»,- «Մեդ Պրակտիկի» հետ զրույցում ասաց Ս. Խաչատրյանը՝ պատասխանելով մեր այն դիտարկմանը, թե մեզանում դեռ չի ձևավորվել կանխարգելման նպատակով բժշկին դիմելու մշակույթը:

«Մենք `որպես քաղաքականությունն իրականացնողներ, շատ ենք ուզում, որ այդ շարժումը մեծանա, մարդկանց հոսքը դեպի պոլիկլինիկաներ ավելանան: Այս դեպքում մենք կունենանք տարիներ անց հիվանդանոցային դեպքերի թվի նվազում», - ընդգծեց փոխնախարարը:

Ս. Խաչատրյանը նկատեց, որ պատշաճ լուսաբանման և աշխատանքի իրականացման դեպքում մարդիկ սկսել են վստահել ու այցելում են հետազոտություններ իրականացնելու, ինչը ողջունելի է:

«2015թ. հունվար ամսից մինչ օրս սքրինինգային ծրագրով իրականացվել է շուրջ 7150 ՊԱՊ թեստի հետազոտություն, մոտ 56000 քաղաքացիների մոտ որոշվել է արյան մեջ գլյուկոզայի մակարդակը, ավելի քան 83000-ի մոտ` արյան զարկերակային ճնշման չափում է իրականացվել. քաղաքացիների մոտ (որոշ թվով) արձանագրվել են շեղումներ»:

Հավելենք, որ զարկերակային գերճնշման և շաքարային դիաբետի ախտորոշման թիրախային խմբերում ընդգրկված են 35-ից 68 տարեկան ՀՀ բոլոր քաղաքացիները, իսկ արգանդի պարանոցի նախաքաղցկեղի վաղ ախտորոշման և քաղցկեղի կանխարգելման թիրախային խմբում՝ 30-ից 60 տարեկան բոլոր կանայք:  Նշված սքրինինգային հետազոտություններն անվճար իրականացվում են առողջության առաջնային պահպանման հաստատություններում՝ պոլիկլինիկաներում և ամբուլատորիաներում:

Հարցեր, պատասխաններ, մեկնաբանություններ