ՀՀ ԱՆ. ԱՀԿ փորձագիտական խումբը ներկայացրեց նախնական գնահատականը

Առողջապահության համաշխարհային կազմակերպության (ԱՀԿ) եվրոպական տարածաշրջանային գրասենյակի փորձագիտական խումբը հունվարի 26-ից 30-ը գտնվում էր Հայաստանում` ՄԻԱՎ/ՁԻԱՀ-ին հակազդման ազգային ծրագրի համապարփակ գնահատման առաքելությամբ: 

Առաքելության ընթացքում Դանիայից, Շվեդիայից, Լիտվայից, Մեծ Բրիտանիայից հրավիրված փորձագետներից կազմված խումբը հանդիպումներ և քննարկումներ ունեցավ ոլորտի պատասխանատուների, բուժաշխատողների, ծառայություններ տրամադրողների և շահառուների հետ: 

ՄԻԱՎ/ՁԻԱՀ-ին հակազդման ազգային ծրագրի գնահատման բաղադրիչներից էին ՄԻԱՎ վարակի նկատմամբ համաճարակաբանական հսկողության համակարգի, ՄԻԱՎ վարակով հիվանդներին տրամադրվող բուժման և խնամքի, առավել վտանգի ենթարկվող խմբերին տրամադրվող ՄԻԱՎ վարակի կանխարգելման ծառայությունների գնահատումը, բնակչությանը ՄԻԱՎ վարակին առնչվող ծառայությունների տրամադրման մոդելների վերլուծությունը:

Գնահատման նախնական արդյունքները ներկայացվեցին ՁԻԱՀ-ի կանխարգելման հանապետական կենտրոնում կայացած ամփոփիչ հանդիպման ընթացքում: Քննարկմանը մասնակցում էին ՀՀ առողջապահության նախարարության, ՀՀ արդարադատության նախարարության պատասխանատուներ, ՁԻԱՀ-ի, տուբերկուլոզի և մալարիայի դեմ պայքարի գլոբալ հիմնադրամի Արևելյան Եվրոպայի և Կենտրոնական Ասիայի խմբի պորտֆոլիո մենեջերը և խմբի այլ անդամներ, ԱՀԿ հայաստանյան գրասենյակի ներկայացուցիչներ, ՁԻԱՀ-ի կանխարգելման հանրապետական կենտրոնի մասնագետներ, ոլորտին առնչվող ծառայություններ տրամադրող բժշկական կազմակերպությունների ներկայացուցիչներ, ՀՀ ԱՆ Գլոբալ հիմնադրամի ծրագրերը համակարգող խմբի անդամներ և հիմնադրամի տեղային գործակալը, հասարակական և գործընկեր կազմակերպությունների ներկայացուցիչներ: 

Ողջունելով փորձագետներին` ՀՀ առողջապահության նախարարի տեղակալ Վահան Պողոսյանը շնորհակալություն հայտնեց կատարված ծավալուն աշխատանքի համար:

Փորձագիտական խմբի ղեկավար Ջեֆրի Լազարուսը ներկայացրեց գնահատման հիմնական արդյունքներն ու առաջարկությունները: Մասնավորապես` նշվեց համաճարակաբանական հսկման ուժեղ համակարգի առկայության և ՄԻԱՎ վարակով հիվանդների բուժման հարցում հայ մասնագետների նշանակալի հաջողությունների մասին: Այնուհետև ծավալվեց քննարկում, հնչեցված հարցերին ԱՀԿ փորձագետները պարզաբանումներ տվեցին: 

Նշենք, որ հիմնական առաջարկությունները կհամաձայնեցվեն և վերջնական տեսքի կբերվեն մինչև ընթացիկ տարվա փետրվարի 20-ը: Դրանք կներկայացվեն հայ գործընկերներին և հաշվի կառնվեն Գլոբալ հիմնադրամին ներկայացվող հայեցակարգային առաջարկում` ակնկալելով առաջիկա 3 տարվա համար նոր դրամաշնորհ:

Հարցեր, պատասխաններ, մեկնաբանություններ