Հեմոֆիլիայի համաշխարհային ֆեդերացիայի մասնագետներն այցելեցին Արյունաբանական կենտրոն

Այդ հիվանդությամբ տառապող երիտասարդներն այժմ կարող են ունենալ լիարժեք կյանքով ապրելու հնարավորություններ:

Հուլիսի 1-ին Արյունաբանական  կենտրոնի տնօրեն պրոֆեսոր Սմբատ Դաղբաշյանի հրավերով  կենտրոն այցելեցին  Հեմոֆիլիայի Համաշխարհային ֆեդերացիայի մասնագետները`Չիկագոյի Ռաշ համալսարանի հեմոֆիլիայի և թրոմբոֆիլիայի կենտրոնի դոկտոր Անգելա Ֆորսիթը և Մոնրեալի Սուրբ Ջասթին հիվանդանոցի Հեմոսթազի կենտրոնի հոդային բարդությունների մասնագետ, ֆիզիոթերապևտ  դոկտոր Նշան Զուրիկյանը:

Սեմինարի ընթացքում հյուրերը մասնագիտական խորհրդատվություն տրամադրեցին ԱԿ Հեմոֆիլիայի կենտրոնի մասնագետներին, քննարկվեցին ֆիզիոթերապիայի նոր կաբինետի հագեցման,  ստեղծման և մասնագետների վերապատրաստման հարցերը:

Հեմոֆիլիան գենետիկական   հիվանդություններից մեկն է, որն առաջանում  է արյան մեջ մակարդման VIII և IX գործոնների բնածին  բացակայությամբ: Հիվանդների մոտավորապես  30%-ի մոտ այն կրում է ոչ ժառանգական բնույթ: Հիվանդանում են տղաները, կանայք համարվում են գենը փոխանցողներ:

Հիվանդությունը բնութագրվում է արյունահոսություններով զանազան խոռոչներում՝ հոդերում, մկաններում և ներքին օրգաններում:

Այդ հիվանդությամբ տառապող երիտասարդներն այժմ կարող են խուսափել այդպիսի տառապանքներից և ունենան լիարժեք կյանքով ապրելու հնարավորություններ՝ ի շնորհիվ ժամանակակից և անվտանգ հակահեմոֆիլային  պատրաստուկների և ֆիզիոթերապիայի նվաճումների:   

Հայաստանի Արյունաբանական կենտրոնում հսկվում են հեմոֆիլիայի բոլոր տեսակներով տառապող 240 հիվանդներ, որոնցից 64-ը կազմում են երեխաները: Հիվանդների 80%-ը հաշմանդամ են և  տառապում են հեմոֆիլային արթրոպաթիայով: Արյունաբանական կենտրոնում իրականացվում է հեմոֆիլային արթրոպաթիայի բուժման ժամանակակից մեթոդ՝ քիմիական սինովէկտոմիա, ինչի շնորհիվ մոտավորապես 40 հիվանդի մոտ հնարավորություն է ստեղծվել կանխել հոդային արյունահոսությունները: Զուգահեռաբար իրականացվում են հեմոֆիլիայով հիվանդերի ներհոդային նորագույն մեթոդներ՝ հիալուրոնատով արթրոցենտեզ ֆիզիոթերապևտիկ միջամտություններ:

Հարցեր, պատասխաններ, մեկնաբանություններ