Ավելացնում են պաշտոնական գանձումները` կոռուպցիայի նվազեցման համար

Համաշխարհային բանկի տրամադրած գումարներով գալիք տարում կվերականգնվի Կապանի հիվանդանոցը, ինչպես նաև Մեղրիում, Սևանում, Բերդում ու Վանաձորում նոր հիվանդանոցներ կկառուցվեն: Այս մասին այսօր ԱԺ-ում լրագրողների հետ զրույցում տեղեկացրեց ՀՀ առողջապահության նախարար Հարություն Քուշկյանը:

Ինչ վերաբերում է 2012թվականին առողջապահական ոլորտին հատկացվելիք գումարին, նախարարը հրաժարվեց կոնկրետ պատասխանել՝ գոհացնում է գումարի չափն իրեն, թե ոչ՝ նշելով՝ «Հարաբերական հարց է, ցանկալի կլիներ, որ ավելանար, բայց ինչ-որ այսօր ունենք, եղած հատկացումի չափով կպահպանենք ու կփորձենք ավելացնել»:

Նրա խոսքով՝ պահպանվել է պետպատվեր բուժօգնության շրջանակում հատկացվելիք գումարի չափը, ամբուլատոր պոլիկլինիկական ծառայությանը մոտ 24 միլիարդ կտրամադրվի, մոտ 29 միալիրդ էլ ստացիոնար բուժօգնությանն է հատկացվելու:

«Փորձելու ենք այդ սահմաններում որակը բարձրացնել, որ ծառայությունը հնարավորինս մատչելի լինի քաղաքացուն»,- ասաց նա:

Անդրադառնալով համակարգում կոռուպցիոն ռիսկերի նվազեցմանը՝ նախարարն ասաց, որ կան տասնյակ տարիների ընթացքում ձևավորված ոչ ցանկալի երևույթներ, որից փորձում են ազատվել՝ ավելացնելով պաշտոնական գանձումները, որըհնարավորություն կտա «բուժաշխատողներին ստվերային երևույթներից հեռու պահել»:

Սակայն, ըստ նրա, նման երևույթները կտրուկ իջեցնելը դժվար է:

Հ.Քուշկյանը նշեց նաև, որ գալիք տարում առողջապահության ոլորտին հատկացված 65 միլիարդից 4 միլիարդը օգտագործվելու է հոգեմետ, դիաբետ, ուռուցքաբանական և այլ դեղերի ներկրման համար:

Հարցին, թե ի՞նչ կարծիք ունի նախարարը բժշկական պարտադիր ապահովագրության մասին, վերջինս նշեց, որ այդ առումով իրենք խթանում են կամավոր ապահովագրության համակարգը, աշխատում են Կենտրոնական Բանկի հետ ու կարծում է, որ առաջիկա երկու տարում բժշկական պարտադիր ապահովագրություն կունենան երկրի բոլոր քաղաքացիները:

Հարցեր, պատասխաններ, մեկնաբանություններ