ARMFOOD ապրանքանիշի այծի կաթում հայտնաբերվել են ստաֆիլոկոկի բակտերիաներ

Գյուղատնտեսության նախարարության սննդամթերքի անվտանգության պետական ծառայության կողմից իրականացված ուսումնասիրության արդյունքում շուկայում իրացվող «Էյ-Էս-Բի-սոֆթ» ՍՊԸ-ի «ARMFOOD» ապրանքանիշի այծի կաթում հայտնաբերվել են աղիքային ցուպիկի խմբի մանրէներ և ստաֆիլակոկի բակտերիաներ:

ՀՀ ԳՆ սննդամթերքի անվտանգության պետական ծառայության տեղեկատվության և հասարակայնության հետ կապերի բաժնի հաղորդմամբ, ԳՆ ՍԱՊԾ-ի կողմից տրվել է տվյալ ապրանքանիշի կաթնամթերքի իրացման կասեցման կարգադրագիր:

Մինչ ամբողջ խմբաքանակի շուկայից դուրս բերումը ծառայությունը կոչով դիմում է ազգաբնակչությանը լինել աչալուրջ և զերծ մնալ «ARMFOOD» ապրանքանիշի կաթնամթերքի ձեռքբերումից:

Որոշ մանրէներ (ստաֆիլակոկ, սալմոնելա և այլն) իրենց կենսագործունեության ընթացքում արտադրում են թույներ (տոքսիններ), որոնք կարող են սննդամթերքի հետ անցնել մարսողական համակարգ և առաջացնել սննդային թունավորումներ։ Սննդային թունավորումները հաճախ ուղեկցվում են ջրազրկման երևույթներով։ Դրանք հատկապես վտանգավոր են երեխաների և տարեց մարդկանց համար։

Ախտանշաններն են սրտխառնոց, փսխում, լուծ, ընդհանուր թուլություն, գլխացավ, գլխապտույտ, որովայնային ցավեր, մարմնի ջերմաստիճանի բարձրացում։

Առաջին օգնության համար անհրաժեշտ է տուժածի մոտ արհեստական փսխում առաջացնել, ձեռնարկել ջրազրկումը կանխարգելող քայլեր, ահազանգել շտապ օգնություն, վերահսկել տուժածի վիճակը, գրանցել տվյալները և ցուցաբերել համապատասխան օգնություն։

Հարցեր, պատասխաններ, մեկնաբանություններ