Գենոմոդիֆիկացված սննդի շրջանառությունը կկարգավորվի օրենքով

Այսօր հրավիրած ասուլիսում ՀՀ բնապահպանության նախարարության կենսառեսուրսների կառավարման գործակալության պետ, կենսաբանական գիտությունների դոկտոր, պրոֆեսոր Արտաշես Զիրոյանը տեղեկացրեց, որ մշակվել է «Գենետիկորեն ձևափոխված օրգանիզմների մասին» ՀՀ օրենքի նախագիծը, որը շուտով կմտնի Ազգային ժողով`քննարկման:

Օրենքի նախագծով նախատեսվում է վերահսկել Հայաստան նմանատիպ սննդամթերքի հետագա ներմուծումը բացառապես իրավաբանական անձանց կողմից: Ներկրողը, ըստ նախագծի, պետք է ունենա համապատասխան գենետիկորեն ձևափոխված օրգանիզմների մասին մասնագիտական փորձ ու իմացություն:

«Մեր առաջին խնդիրն ու պայմանն առողջությունն է, ոչ թե տնտեսական օգուտը»,- ասաց Ա.Զիրոյանը` հավելելով, որ մինչ նախագծի մշակումը Բնապահպանության նախարարությունը վերահսկողություն իրականացնելու որևէ լծակ չի ունեցել, իսկ ինչ էլ արվել է, արվել է գիտական հետազոտությունների մակարդակով:

Սակայն, ըստ բանախոսի, գիտական հետազոտության արդյունքներ էլ չկան, թե այժմ Հայաստանում սննդի որ տոկոսի մեջ կա գեմո ու հատկապես որ բուսատեսակն է տարածված:

Օրենքը նախատեսում է նաև, որ ներկրող ու վաճառող ընկերությունները պարտադիր ապրանքի վրա մակնշում անեն` գրելով նաև գեմո-ի թույլատրելի քանակությունը տվյալ սննդամթերքում, ինչը չի արվում հիմա, իսկ համապատասխան լաբորատոր հետազոտություններից հետո պարտադիր կգրվի ու տեղական սորտն ուսումնասիրելու խնդիր էլ կդրվի:

«Կստեղծվի փորձագիտական հատուկ խումբ, ով կանի լաբորատոր հետազոտություններ և ըստ սննդամթերքի տեսակի`կորոշի գեմո-ի թույլատրելի քանակությունը, ինչը հետո կամրագրվի ենթաօրենսդրական ակտերով»,- պարզաբանեց դոկտոր-պրոֆեսորը` ընդգծելով, որ օրենքի նախագծի ընդունումից հետո մոտ 35 օրենսդրական ակտեր կընդունվեն:

Ինչ վերաբերում է Հայաստանի`գենոմոդիֆիկացված սնունդ ներկրելուն դեմ կամ կողմ լինելուն, Արտաշես Զիրոյանը նշեց, որ իրենք դեմ չեն, եթե ամեն ինչ կարգավորված է օրենքով ու մարդիկ տեղյակ են տվյալ սննդի բաղադրությունից: Ըստ բանախոսի` իրենք հարցադրումներ են արել, ինչի արդյունքում պարզվել է, որ Հայաստանի ֆերմերների 60 տոկոսը տեղյակ է գեմոյից:

«Ամբողջ աշխարհում ազգաբնակչության աճը 7 միլիարդի է հասնում,սննդի խնդիր կա: Վերջին տարիների տվյալներով`60 միլիոն հա տարածություն է տրված գեմոյով սննդի մշակման համար, որից 40 միլիոն հա-ն ԱՄՆ-ին, 14 միլիոն հա-ն Արգենտինային , 3 միլիոն հա Կանադային և այլն: Այսինքն մարդու առողջությունը պահպանելու խնդիր կա»,- եզրափակեց նա:

Հարցեր, պատասխաններ, մեկնաբանություններ