Բուհերում պետք է ներմուծել «Սեռական դաստիարակության հիմունքներ» առարկան

Պետք է եւ ցանկալի է, որ եթե ոչ դպրոցական ծրագրում, ապա գոնե բուհերի ցածր կուրսերում ներմուծվի «Սեռական դաստիարակության հիմունքներ» առարկան։ Այս մասին լրագրողներին ասաց սեռաախտաբան Վրեժ Շահրամանյանը։

«Մենք փորձեցինք մեր ուժերով այդ բացը լրացնել, կազմակերպեցինք հանդիպումներ բուհերի ուսանողների հետ, հնարավորության սահմաններում տարբեր լրատվամիջոցներով փորձեցինք հոդվածներ հրապարակել այս թեմայով»,–ասաց Շահրամանյանը՝ հավելելով, որ սա դեռ չի կարող լրացնել եղած բացը։ Առարկայի ներմուծվելու դեպքում, սակայն, խնդիր է առաջանում՝ ով պետք է դասավանդի այն, քանի որ «Կենսաբանություն» առարկայի ուսուցիչը չի կարող ամբողջ նյութը մատուցել հավուր պատշաճի, ուստի առաջարկվել է վերապատրաստման դասընթացներ անցկացնել։

Նման դասընթացների անցկացման փորձ որոշ դպրոցներում արվել է, եւ դրական արձագանքներ են ստացվել։ Հարցումներ են անցկացվել, որից պարզվել է, որ պատանիներն այս թեմայով իրենց հետաքրքրող հարցերի պատասխանները ստանում են կամ դրսում, կամ համացանցից, որը, մասնագետների գնահատմամբ, կարող է բացասական հետեւանքներ ունենալ։ «Ինտերնետում ամեն ինչ կա՝ ինչպես լավ, այնպես էլ վատ»,–ասաց սեռաախտաբանը՝ տեղեկացնելով, որ նախատեսվում է ձեռնարկ տպագրել, բացի այ, գործում է հայկական միակ կայքը՝ sexology.am, որտեղ կարելի է ստանալ ճիշտ տեղեկատվություն եւ հարցեր ուղղել բժիշկներին։

Ըստ բժշկի՝ երիտասարդները պետք է իրազեկված լիեն սեռավարակների մասին։ Ի դեպ, դասական վեներական հիվանդությունները հինգն են, որոնցից Հայաստանում հանդիպում են միայն 2—ը՝ սիֆիլիսը եւ գոնորեան. մնացածը, ըստ մասնագետների, տրոպիկական երկրներին են բնորոշ։ Սեռավարակները դասակարգվում են հետեւյալ կերպ՝ մանրէային ծագում ունեցող, նախակենդանիներով պայմանավորված, սնկերով եւ վիրուսներով, ուստի եթե դասական վեներական հիվանդություններից մեր երկրում հանդիպում են երկուսը, ապա սեռավարակների դասակարգումներն ավելի շատ են։ «Սեռական առողջությունը մարդու ընդհանուր առողջության մի մասն է եւ նույնքան բնական է, ինչպես շնչառությունը, ուստի եթե առողջության նույնիսկ չնչին տատանումներ կան, ապա պետք է անհապաղ դիմել մասնագետի»,–ասաց Վրեժ Շահրամանյանը։

Հարցեր, պատասխաններ, մեկնաբանություններ