«Սիմֆոնիկ Հայֆիլմ» խորագրով բարեգործական համերգ` նվիրված Արցախյան 44-օրյա պատերազմում զոհված Վահե Մելիքսեթյանի ծննդյան 36-ամյակին

2024 թվականի նոյեմբերի 4-ին Հայաստանի պետական սիմֆոնիկ նվագախումբը «Արամ Խաչատրյան» համերգասրահում՝ «Վահե Մելիքսեթյան» կրթաբժշկական հիմնադրամի և «C-Squared» ընկերության աջակցությամբ, ներկայացրեց «Սիմֆոնիկ Հայֆիլմ» խորագրով բարեգործական համերգ, որը նվիրված էր Արցախյան 44-օրյա պատերազմում զոհված կլինիկական դեղագետ Վահե Մելիքսեթյանի ծննդյան 36-ամյակին: Համերգի ընթացքում հնչեցին հայկական սիրված ֆիլմերի մեղեդիներ:

Համերգի հասույթի մի մասը տրամադրվելու է Ջիվան Ավետիսյանի «20 20-ի հրեշտակները» ֆիլմի նկարահանման աշխատանքներին:

Այս առիթով զրուցեցինք «Վահե Մելիքսեթյան» կրթաբժշկական հիմնադրամի հիմնադիր, գործադիր տնօրեն Սարգիս Մելիքսեթյանի հետ

«Իրականացվեց այս տարվա մեր ամենամասշտաբային, ամփոփիչ միջոցառումը: Ամփոփվեց տարին, հիմնադրամի գործունեությունը, նաև հիշատակվեց պատերազմում զոհված եղբորս տարեդարձը:

Հանգամանքներն այնպես դասավորվեցին, որ ես, մեր լավ ընկեր` Գևորգ Յաղջյանի շնորհիվ, ծանոթացա կինոմատոգրաֆ Ջիվան Ավետիսյանի հետ, տեղեկացա, որ նա մեծ, հավակնոտ ֆիլմ է նկարահանելու, և իր անցած ուղին վստահեցնում է, որ հաջողելու է: Ցավոք, պատերազմի բժիշկների հարցը թերագնահատված է, իրական հերոսները կամ ֆիզիկապես չկան, կամ այնքան համեստ են, որ, սովորաբար, չեն բարձրաձայնում իրենց մասին: Շատ կարևոր է գտնել նրանց, պատմություններն իմանալ և էկրանավորել, որովհետև մարդիկ ապրում են, քանի դեռ նրանց հիշում ենք և շարունակում իրենց սկսած գործը:

Կարևորում եմ Ջիվանի նախաձեռնությունը, ուստի որոշեցինք մեր մասնակցությունն ունենալ այդ ազգանպաստ գործին՝ համերգի հասույթի 10 տոկոսը նվիրելով ֆիլմի ստեղծման աշխատանքներին:

Մեզ համար շատ կարևոր է այս միջոցառումը և՛ թեմայի ընտրության, և՛ խորհրդանշանային առումով: Ուրախ եմ, որ այս բարեգործական համերգի շրջանակում ստացվեց ներգրավել Ջիվան Ավետիսյանին:

Շնորհակալ եմ նաև Հայաստանի պետական սիմֆոնիկ նվագախմբին: Համերգից անմիջապես հետո` գիշերը, մեկնում էին Չինաստան՝ հյուրախաղերի, բայց պատրաստակամ և պրոֆեսիոնալ ներկայացան, և երկրորդ տարին է, ինչ հաջողվում է մեր համագործակցությունը:

Զրուցեցինք նաև «20 20-ի հրեշտակները» նկարահանվող ֆիլմի ռեժիսոր Ջիվան Ավետիսյանի հետ:

«Շնորհակալություն «Վահե Մելիքսեթհան» հիմնադրամին «20 20-ի հրեշտակները» ֆիլմին աջակցելու համար, շնորհակալություն բուժաշխատողներին, որոնք որևէ կերպ մասնակցել են 2020 թվականի պատերազմին, շնորհակալություն բժիշկներին, բուժաշխատողներին, ովքեր մեկնել են Արցախի Հանրապետություն թե՛ Հայաստանից, թե՛ արտերկրից:

Առանձնակի շնորհակալություն եմ հայտնում լուսահոգի Վահե Մելիքսեթյանին՝ Հայրենիքին իր անմնացորդ նվիրման համար: