6-րդ միջազգային համագումարի մասնակիցները՝ նոր նախագծերի մասին․ Շանթ Շեխերդիմյան, Սամսոն Խաչատրյան

Համագումարը բժիշկների համար լավագույն հարթակն է փորձի փոխանակման և նոր նախագծերի համար։ Համագումարը մեծ հետարքրքություն է ստեղծել տեղի մասնագետների մոտ, որոնք ունեն ակտիվ մասնակցություն՝ ոչ միայն ունկնդրի կարգավիճակում։

ԱՄՆ-ից ժամանած բժիշկ, հանրային առողջապահության մասնագետ, ԱՆ խորհրդատու Շանթ Շեխերդիմյանը մեզ հետ զրույցում ասաց, որ իր զեկույցում կարևորել է առաջնային օղակի զարգացման հարցերը՝ ՀՀ առողջապահական համակարգում։

«Փորձել եմ գործընկերներիս հետ քննարկել տարբեր միջոցներ, որոնք կարող ենք միասին իրագործել և զարգացնել այս ամենակարևոր ոլորտը։ Շեշտադրված է այն, որ մենք դժվարությամբ կկարողանանք հասնել համապարփակ ապահովագրության՝ առանց կայուն առաջնային առողջապահության համակարգ ունենալու»։   

Բժիշկը համոզված է, որ առաջնային օղակն այն ոլորտն է, որտեղ բոլորը՝ անկախ նեղ մասնագիտացումից, կարող են իրենց ներդրումն ունենալ և զարգացնել ոլորտը, իսկ դա հիմք է նաև առողջապահության այլ ոլորտների համար։  

«Իմ ելույթում փորձել եմ  առաջնային օղակը բաժանել տասնչորս տարբեր բաղադրիչների։ Գործընկերներիս հետ միասին խոսեցինք այդ բոլոր բաղադրիչների մասին։ Լուծումներ գտանք այդ բաղադրիչները զարգացնելու համար։ Անշուշտ, կան բաղադրիչներ, որոնք ավելի շատ պարտականություն են իրենցից ներկայացնում, այսպես ասած, պետության, նախարարության մակարդակում։  Կան նաև այլ բաղադրիչներ, որոնք հենց տեղի բժիշկների պարտականությունների մեջ պետք է ներառվեն՝ հատկապես ընտանեկան բժիշկների կամ առաջնային օղակի բժիշկների պարագայում։ Նրանք պետք է հանձն առնեն և հավուր պատշաճի կատարեն դրանք։ Բաղադրիչներից է մարդկային ներուժի զարգացումը։ Օրինակ՝ թրեյնինգների կազմակերպումը, ինչը, միանշանակ, կբերի որակի բարելավմանը, և դա կարող է մեծ դեր ունենալ»։  

Բժիշկ նյարդաբան Սամսոն Խաչատրյանը նշում է, որ կոնգրեսը շատ մեծ նշանակություն ունի մեր բժշկագիտության համար։

«Այստեղ մեկ հարկի տակ տարբեր մասնագիտությունների բժիշկներ են հավաքվում։ Հայաստան են գալիս մեր հայրենակից առաջատար մասնագետները։ Եվ ամեն մեկն իր հաջողության մասին է պատմում՝ իր կատարած աշխատանքային փորձը կիսելով։ Համագումարը հարթակ է շփվելու համար, մտքեր փոխանակելու, նախագծեր նախաձեռնելու համար։

Այս ամենի մեջ կա շատ մեծ գիտական բաղադրիչ, որի արտացոլումն է մեր գիտական ժողովածուն, և այստեղ տպագրվելը մեծ պատիվ է։

Այստեղ մեծ աշխատանք է տարվում, մենք հրավիրում ենք գրախոսների, որոնք գրաքննությունն են անցկացնում յուրաքանչյուր գիտական նյութի վերաբերյալ»։

Հարցեր, պատասխաններ, մեկնաբանություններ