ԵՊԲՀ. Անցկացվեց դասախոսություն՝ նվիրված սեռական առողջության պահպանմանը

Բժշկական մայր բուհում անցկացվեց դասախոսություն «Անվտանգ սեռական վարքագիծ» թեմայով: ԵՊԲՀ սեքսոպաթոլոգիայի ամբիոնի վարիչ, Սեքսոպաթոլոգիայի կլինիկայի ղեկավար, դոցենտ Վրեժ Շահրամանյանն անդրադարձավ արդիական մի շարք հարցերի, որոնք առնչվում են սեռական վարքագծին, անվտանգությանը, սեռակրթությանը:

«Այսօրվա դասախոսությունը հավաքական է, ընդգրկում է մի քանի թեմա: Որպեսզի սեռական առողջությունը լինի ամուր և վարքագիծն էլ լինի անշեղելի, մենք պետք է հասկանանք, որ սեռական առողջությունը մարդու առողջության անբաժանելի մասն է, դա առանձին կղզի չէ: Ինչպես շնչառությունը, մարսողությունը, այնպես էլ սեռական ֆունկցիան մարդու ընդհանուր առողջության մի մասն է: Մեր օրգանիզմում ամոթալի օրգաններ չկան, բոլոր օրգան համակարգերը միմյանց հետ շատ սերտ փոխկապակցված են: Ամոթալի է սեռական փոխհարաբերություններին առնչվող այն մշուշապատ պատկերացումները, որոնք կարող են բերել ճակատագրական հետևանքների»,-նշեց բժիշկ-սեքսոպաթոլոգը:

Մասնագետը ընդգծեց, որ սեռական անտեղյակությունը օրեցօր աճում է, դաշտը հեղեղված է հակասական նյութերով, սխալ տեղեկատվությամբ, ինչը լրջագույն խնդիր է. «Թվում է, թե ամեն ինչ գիտենք, համացանցի դար է, սակայն այժմ ավելի շատ հակասական ժամանակաշրջան է: Պետք է լինել սեռակրթված միայն հավաստի աղբյուրներից, ոչ թե պատահական: Այսօր սեռական կրթության մասին խոսում են բոլորը, և առաջին տեղը զբաղեցնում է համացանցը»:

Վրեժ Շահրամանյանը հանգամանալից անդրադարձավ նաև սեռավարակներին, դրանց տեսակներին և վտանգավորության աստիճանին: Նրա խոսքով՝ կան այնպիսի սեռավարակներ, որոնք ընթանում են առանց կլինիկական նշանների և այդ պատճառով մարդիկ հաճախ չեն դիմում բժշկի, ինչը կրկին սխալ տեղեկատվության արդյունք է: Նա հորդորեց հաճախ դիմել մասնագետի, հետազոտվել՝ խնդիրներից և բարդություններից խուսափելու համար:

Դասախոսության ընթացքում սեքսոպաթոլոգը ներկայացրեց մասնագիտական տեսանյութեր, խոսեց նաև անպտղության, անցանկալի հղիության և մի շարք այլ կարևոր թեմաների մասին:

ԵՊԲՀ դասախոսին ունկնդրելու էին եկել ոչ միայն ուսանողներ, այլև ամբիոնականներ, գործընկերներ:

Հարցեր, պատասխաններ, մեկնաբանություններ