«Ստորին վերջույթի վերականգնողական միկրովիրաբուժություն» թեմայով սեմինար Երևանում

Օրերս «Իզմիրլյան» ԲԿ-ում կայացավ «Ստորին վերջույթի վերականգնողական միկրովիրաբուժություն» անվանումը կրող գիտագործնական սեմինարը, որի կազմակերպիչներն էին «Իթերնալ Նեյշն Ֆաունդեյշն» (Հավերժական Ազգ) բարեգործական հիմնադրամը, Պլաստիկ վերականգնողական և էսթետիկ վիրաբույժների հայկական ասոցիացիան (AAPRAS) և Հայաստանի ընկերներ բժշկական ասոցիացիան (AMADeA):

Երկօրյա սեմինարը համախմբել էր Երևանի և մարզերի բժշկական կենտրոններից պլաստիկ վիրաբույժների, միկրովիրաբույժների, վնասվածքաբան-օրթոպեդների, անոթային վիրաբույժների:

Զեկույցներով հանդես են եկել վերականգնողական վիրաբուժության առաջատար մասնագետներ Իսպանիայից, Իտալիայից, Հարավային Կորեայից:

«Իթերնալ Նեյշն Ֆաունդեյշն» (Հավերժական ազգ) բարեգործական հիմնադրամի հայաստանյան գրասենյակի տնօրեն Աննա Միքայելյանը մեզ հետ զրույցում ասաց, որ բարեգործական հիմնադրամը ստեղծվել է հայ բժիշկների կողմից, որոնք 2020 թ. Արցախյան պատերազմի ընթացքում և դրանից հետո աշխատել են Հայաստանի և Արցախի հիվանդանոցներում՝ օգնություն ցուցաբերելով վիրավորներին, կատարելով մի շարք բարդ վիրահատություններ:

Ա. Միքայելյանի փոխանցմամբ` «Իթերնալ Նեյշն Ֆաունդեյշն» բարեգործական հիմնադրամն իրականացնում է ինչպես կարճաժամկետ՝ ուղղված որևէ կոնկրետ կարիքի, այնպես էլ երկարաժամկետ ծրագրեր՝ ուղղված վերականգնողական առողջապահական նպատակների:

«Հանգանակված գումարներն ուղղվում են պատերազմի հետևանքով վնասվածքներ ստացած հարյուրավոր տուժածներին` հրատապ բժշկական օգնության և հաշմանդամ դարձած անձանց համար առավել ֆունկցիոնալ պրոթեզներ ձեռք բերելու նպատակին», - նշել է տնօրենն ու հավելել, որ բարեգործական հիմնադրամի գործունեության մեկ այլ կարևոր նպատակն է բժշկական ուղղվածության կրթական ծրագրերի իրականացումը՝ կիրառելու միջազգային լավագույն փորձը և խթանելու կրթությունը` բժշկական ոլորտում: Այդպիսի միջոցառումներից են գիտագործնական սեմինարները, որոնց կազմակերպումը ստանձնելով՝ «Իթերնալ Նեյշն Ֆաունդեյշն» բարեգործական հիմնադրամը հնարավորություն է տալիս Հայաստանի բժիշկներին անվճար ստանալու ՇՄԶ (շարունակական մասնագիտական զարգացում) հայկական կրեդիտներ:

Ա. Միքայելյանի խոսքով` ծրագրի շրջանակում նախատեսված են սեմինարներ Երևանում և Գյումրիում:

Պլաստիկ վերականգնողական և էսթետիկ վիրաբույժների հայկական ասոցիացիայի նախագահ, բ.գ.թ. Արմեն Հովհաննիսյանն ընդգծել է, որ վերականգնողական վիրաբուժության մեջ հայ մասնագետները շատ լուրջ հաջողություններ են գրանցել՝ հատկապես ռազմաբժշկական ոլորտում:  

«Մենք ունենք շատ մեծ փորձ, ասելիք: Երբ այսօր գնում ենք միջազգային կոնֆերանսներին ներկայացնում ենք մեր փորձն ու աշխատանքները, լավագույն մասնագետների կողմից արժանանում ենք բարձր գնահատանքի», - ասել է Ա. Հովհաննիսյանն ու կարևորել ասոցիացիայի դերը:

«Պլաստիկ վերականգնողական և էսթետիկ վիրաբույժների հայկական ասոցիացիան ստեղծվել է 2006 թվականին, որի հիմնական նպատակն է բարձրացնել հայ պլաստիկ վիրաբույժների կրթական մակարդակը, ինտեգրել նրանց համաշխարհային բժշկագիտության ոլորտ:

Խնդիրներից մեկը միջազգային վեհաժողովների, կոնֆերանսների կազմակերպումն է: Մեկ տասնյակից ավելի վեհաժողովներ են կազմակերպվել  Երևանում` ԱՄՆ-ի, Եվրոպայի, Չինաստանի, Կորեայի, ԱՊՀ երկրների մի շարք հեղինակավոր վիրաբույժների մասնակցությամբ: Ասոցիացիայի ջանքերով` մեր մասնագետները ևս հաճախ մասնակցում են արտասահմանում կազմակերպվող նմանատիպ վեհաժողովների, ինչը լավ հնարավորություն է փորձի փոխանակման համար»:

Ա. Հովհաննիսյանը տեղեկացրել է նաև, որ շուտով Հայաստանի պլաստիկ վիրաբույժների ասոցիացիան կունենա սեփական էթիկայի վարքականոնը. խմբագրական աշխատանքներն ավարտին են հասցված:

 
De la Santa Creu i Sant Pau հիվանդանոցի և Բարսելոնայի դել Մար հիվանդանոցի պլաստիկ վիրաբուժության ծառայության ղեկավար, Բարսելոնայի Ինքնավար համալսարանի բժշկական ֆակուլտետի վիրաբուժության ամբիոնի պրոֆեսոր Ջաումե Մասիան վստահեցրել է, որ սեմինարը հրաշալի առիթ է փորձի փոխանակման, նոր գիտելիքների ձեռքբերման համար, և ինքն Էլ սովորելու բան ունի հայ գործընկերներից:

«Այսօր խոսեցի լիմֆադեմա հիվանդության մասին: Այն, ինչպես գիտեք, ստորին և վերին վերջույթների հիվանդություն է, երբ խախտվում է վերջույթների հեղուկ- ավշային շրջանառությունը, արդյունքում կենսաբանական ակտիվ հեղուկը, որը պարունակում է սպիտակուցներ և ճարպեր, չի կարողանում լիմֆատիկ հանգույցների անոթներով ինքնուրույն դուրս գալ օրգանիզմից: Դա էլ, բնականաբար, հանգեցնում է վերջույթների այտուցի: Ընդհանուր առմամբ, լիմֆադեմայով հիվանդ է մոլորակի շուրջ 11 միլիոնը, այսինքն՝ յուրաքանչյուր 10-ից 1 մարդ: Սա բավականին լուրջ ցուցանիշ է, և մոտավորապես 10-15 տարի առաջ բժիշկներն անբուժելի էին համարում այս հիվանդությունը, և դա այլևս անցյալում է: Նորագույն տեխնոլոգիաներն այսօր թույլ են տալիս ախտորոշել հիվանդությունն անգամ վաղ փուլում: Օրինակ՝ ինդոցիանին կանաչ ներկանյութի օգնությամբ մենք կարող ենք վիզուալիզացնել լիմֆատիկ անոթներն ու արձանագրել խնդիրը»,- ասել է պրոֆեսորն ու շեշտել, որ ուրախ կլինի կրկին հանդիպել հայ գործընկերներին այս կրթական ծրագրի շրջանակում:   

Նշենք, որ պրոֆեսոր Ջաումե Մասիայի նոր մեթոդների և փորձառության փոխանակելու և զարգացնելու նրա ձգտումը նրան մշտապես թույլ է տվել մասնակցելու աշխարհի հարյուրավոր կոնգրեսների որպես դասախոս՝ բացի Բարսելոնայի Ինքնավար համալսարանի բժշկության ֆակուլտետի վիրաբուժության ամբիոնի պրոֆեսոր լինելուց:

Նա  նաև նույն համալսարանի վերականգնողական միկրովիրաբուժության միջազգային մագիստրատուրայի տնօրենն ու խթանողն է և ավելի քան 20 տարբեր երկրներում տարբեր ազգային և միջազգային մագիստրոսական և դոկտորական դասընթացների պրոֆեսոր, մասնակից է  դասախոսությունների և շնորհանդեսների ավելի քան 68 ազգային և 156 միջազգային գիտական ժողովներում, հեղինակ է 2 գրքի, 14 գրքի գլուխների, 36 գիտական հոդվածների, ունեցել է 92 զեկույց` կոնգրեսներում:

Միջոցառման մասնակից, մանկական վնասվածքաբան-օրթոպեդ Հովհաննես Կարապետյանը մեզ հետ զրույցում փաստել է.

«Բժշկությունը մշտապես զարգացող ու նորարական լուծումներ պահանջող մասնագիտություն է: Եվ մենք` երիտասարդ բժիշկներս, պահը բաց չենք թողնում ներկա լինել նմանատիպ միջոցառումներին: Փորձում ենք մշտապես պահել կապը արտերկրյան գործընկերների հետ նաև առցանց տիրույթում, և այդ շփումների արդյունքում 2021 թվականին «Իթերնալ Նեյշն Ֆաունդեյշն» բարեգործական հիմնադրամի նախագահ Արմեն Հակոբջանյանի գլխավորությամբ կատարել ենք սրունք- թաթային հոդի էնդոպրոթեզավորում:

Այս միջամտությունն առաջին անգամ է կատարվել Հայաստանում։ Էլի շատ միկրովիրաբուժական լուծումներ կան, որոնք պետք է կիրառել հետագայում»: 

Հարցեր, պատասխաններ, մեկնաբանություններ