Պատմական հուշագիր ստորագրվեց առողջապահության նախարարության և Հայկական բժշկական ասոցիացիայի միջև

Նոյեմբերի 5-ին տեղի ունեցավ, ինչպես բժշկական հանրությունն է որակում, պատմական իրադարձություն. Հայաստանի առողջապահության նախարարությունը և Հայկական բժշկական ասոցիացիան ստորագրեցին փոխըմբռման, համագործակցության հուշագիր:

Հայկական բժշկական ասոցիացիայի նախագահ Արմեն Սողոյանը մեզ հետ զրույցում մանրամասնեց.

«Համագործակցության գաղափարն առաջարկել է ՀՀ առողջապահության նախարար տիկին Անահիտ Ավանեսյանը. Ասոցիացիայի Խորհրդի և Գործադիր վարչության համատեղ նիստի ժամանակ:

Հայկական բժշկական ասոցիացիայի՝ մասնագիտական ասոցիացիաների ասոցիացիա դառնալու փաստը, թույլ է տալիս նախարարությանը, նախքան ընդհանուր առողջապահական ոլորտին վերաբերող ծրագրերի, որոշումների ընդունելը, քննարկել ՀԲԱ հետ և խորհրդակցություն ստանալ մասնագիտական հանրության կողմից: Եվ, քանի որ, ՀԲԱ-ն ոչ թե որևէ մեկի, որևէ նախագահի կառույց է, այլ ասոցիացիաների՝ այսինքն մասնագիտական կազմակերպությունների կառույց է, այն չի կարող սուբյեկտիվ կարծիքներ ներկայացնել և քննարկելով ցանկացած հարցը մասնագիտական ասոցիացիաների հետ, կարող է ներկայացնել առողջապահական հանրույթի հավաքական կարծիքը: Այլ կերպ ասած` նախարարությունը կկարողանա աշխատել ոչ անձերի, այլ համակարգի հետ»:

Առողջապահության նախարար Անահիտ Ավանեսյանն իր ելույթում կարևորեց հուշագրի կնքումը` հավելելով, որ լիահույս է` այս մեկնարկին կհաջորդեն աշխատանքային ակտիվ գործընթացներ:

«Պետք է ընդգծել, որ նկատելի է Հայկական բժշկական ասոցիացիայի ակտիվ ներգրավվածությունն ու բավականին մեծ ազդեցությունը այսօր մեր երկրի առջև կանգնած համավարակային հրատապ հարցի լուծման հարցում: Ոլորտի երևելի մասագետների ձայնը պետք է լսելի դառնա, նրանց ձայնը պետք է չխլեցվի հակագիտական, տրամաբանությունից դուրս և հասարակությանը դեմ հնչող աղմուկի ֆոնին:

Վստահ եմ, այն աշխատանքները, որ նախագծել ենք այս հուշագրի շրջանակում, կկարողանանք իրագործել: Նախարարությունը լիահույս է, որ կկարողանա հենվել Հայկական բժշկական ասոցիացիայի վրա` ստանալով կարծիք և խորհրդակցություն, որն էլ հիմք կլինի նախարարության հետագա ռազմավարության կազմման համար»:

Հայաստանի ավանդական և այլընտրանքային բժշկության մասնագետների ասոցիացիայի նախագահ Մկրտիչ Նորայր Ավագյանը, անդրադառնալով հուշագրի կնքմանն` ասաց, որ ակնկալում է ակտիվ և սերտ համագործակցություն առողջապահության նախարարության հետ: Նախկինում նախարարությունը չի համագործակցել առանձին ասոցիացիաների հետ, սակայն ներկայում, համագործակցելով ասոցիացիաների ասոցիացիայի հետ, կլսի բժիշկական հանրության ձայնը, ուղղակի և ընդլայնված համագործակցություն կլինի:

Հարցեր, պատասխաններ, մեկնաբանություններ