Առողջապահության նախարարը ՀԲԱ հետ քննարկել է համագործակցության հեռանկարները

Սեպտեմբերի 9-ին կայացավ Հայկական բժշկական ասոցիացիայի (ՀԲԱ) Խորհրդի և Գործադիր վարչության համատեղ նիստը, որին հրավիրված էին ՀՀ առողջապահության նախարար Անահիտ Ավանեսյանը, փոխնախարար Լենա Նանուշյանը, նախարարի խորհրդական Շանթ Շեխերդիմյանը, Առողջապահության տնտեսագետների ասոցիացիայի նախագահ Սամվել Խարազյանը և «Հավերժ» ՀԿ նախագահ Կարինե Մուրադյանը։

ՀԲԱ նախագահ Արմեն Սողոյանը մեզ հետ զրույցում ասաց, որ նիստի ընթացքում քննարկվել է Առողջապահության նախարարության և Հայկական բժշկական ասոցիացիայի համագործակցության հնարավոր ուղղությունները։

«Հայաստանի հանրապետությունում Հայկական բժշկական ասոցիացիան միակ կառույցն է, որը ներկայացնում է մասնագիտական ասոցիացիաների հավաքական կամքը և միայն Հայկական բժշկական ասոցիացիան է, որ լեգիտիմ իրավունք ունի խոսել բժշկական հանրության կողմից: Հաստատվել է կառավարության ծրագիրը, որի առողջապահության մասը պետք է իրականացնի ՀՀ Առողջապահության նախարարությունը։ Իսկ առողջապահության ոլորտում ցանկացած ծրագիր իրականացնելիս կարևոր է հնարավորին լայն մասնագիտական շրջանակի ներգրավվածությունը, որպեսզի այն լինի արդյունավետ»։

Ա. Սողոյանը շեշտեց, որ շատ hաճախ մարդիկ ինքնուրույն որոշումներ են կայացնում՝ առանց խորհրդակցելու նրանց հետ, ում միջոցով պետք է իրականացնեն այս կամ այն ծրագիրը, ինչը սխալ է։

«Ցանկացած առողջապահական ծրագիր իրականացնողը, ի վերջո, բժիշկներն են լինելու, ուստի նրանք պետք է ներգրավված լինեն ծրագրի հետագա պլանավորման ու իրականցման գործում և աստիճանաբար ընդլայնեն համագործակցության շրջանակը՝ ասոցիացիա-պետություն։ Այսօր այդ համագործակցության հիմքն ենք դնում և շնորհակալ ենք ԱՆ նախարարին, որ ընդունեց մեր հրավերը` ո՛չ միայն ներկա գտնվելու նիստին, այլ նաև համագործակցելու»։

ՀՀ առողջապահության նախարար Անահիտ Ավանեսյանը մեզ հետ զրույցում ընդգծեց.

«Սա իմ առաջին հանդիպումն էր ասոցիացիաների միության հետ։ Կարծում եմ, կարևոր էին նախանշված խնդիրները, և մենք եկանք այն եզրահանգման, որ հետագա գործունեությունը պետք առավել կառուցողական լինի։ Առողջապահության նախարարությունը` որպես լիազոր մարմին, իր քաղաքականությունը ձևավորելիս պետք է հաշվի առնի մասնագիտական կարծիքները, և այդ առումով ասոցիացիաների ներգրավվածությունը, կարծում եմ,  ամենաճիշտ ընտրված ձևաչափն է, որն ընդունելի է, և մենք ողջունում ենք նման նախաձեռնությունները»։

Հարցեր, պատասխաններ, մեկնաբանություններ