«Առողջության համապարփակ ծածկույթի ապահովում Հայաստանում, ներկա իրավիճակ» թեմայով խորհրդաժողով Երևանում

19.12.2019թ. կայացավ Հայկական բժշկական ասոցիացիայի և առողջապահության ոլորտի մասնագիտական ասոցիացիաների համատեղ կազմակերպած «Առողջության համապարփակ ծածկույթի ապահովում Հայաստանում, ներկա իրավիճակ» թեմայով խորհրդաժողովը։

Զեկույցներով հանդես եկան Հայկական բժշկական ասոցիացիայի նախագահ Արմեն Սողոյանը և Ասիական զարգացման բանկի փորձագետ, Առողջապահության տնտեսագետների ասոցիացիայի նախագահ Սամվել Խարազյանը:

Արմեն Սողոյանն իր ելույթում անդրադարձավ առողջության համապարփակ ծածկույթի ներդրման գործում մասնագիտական ասոցիացիաների դերակատարմանը: Ի թիվս այլ հարցերի, նա ներկայացրեց, որ առողջապահական համակարգն ամբողջությամբ ձևավորվել է նախկին պահանջներին, այդ թվում նաև` ֆինանսական պահանջներին համապատասխան: Ուստի, առանց համակարգի հիմնովին վերանայման և վերափոխման, ցանկացած ֆինանսավորման մեխանիզմի փոփոխություն և նոր ֆինանսների ներգրավում կլինի «անապատի ավազներում կորչող գետ»։ Անհրաժեշտ է ինչպես կառուցվածքային, այնպես էլ ֆունկցիոնալ փոոփոխություններ՝ սկսած որակի ապահովումից, գնահատումից, վերահսկողությունից, նախատեսվող գործելակարգերից ու ուղեցույցներից, մինչև բժշկական կադրերին ներկայացվող պահանջներ և կառավարման մոդելների փոփոխություն։ Եվ սա պետք է իրականացվի բացառապես մասնագիտական հանրույթը ներկայացնող ասոցիացիաների մասնակցությամբ։

Ա. Սողոյանը պաշտոնապես հայտարարեց, որ անհրաժեշտ է ցանկացած հայեցակարգ, օրենք, համակարգի վրա ազդեցություն ունեցող նորմատիվ փաստաթղթի պատրաստման գործում ներգրավել մասնագիտական ասոցիացիաներին` դեռևս աշխատանքային խումբ ձևավորելու պահից սկսած. միայն այդ կերպ կարելի է ունենալ նվազագույն սխալներ պարունակող, կատարելության ձգտող կանոնակարգեր, և հանրության ու համապատասխան կառույցների համար ընդունելի դարձնել` առանց դժվարությունների։

«Հարկ է փաստել, որ Հայաստանի Հանրապետությունում առողջության համապարփակ ապահովագրության ներդրման հայեցակարգը չի կարող թերություններ չունենալ և հնարավոր է քննարկումների արդյունքում դրանք բարելավել: Իսկ այն, որ համընդհանուր ապահովագրական ծածկույթն այլընտրանք չունի, դրանում մենք, որպես դրա բացակայության անհարմարության ամենամեծ կրողներ, ավելի քան համոզված ենք։

Ներկայում կարևոր է, որ մենք շահագրգիռ մասնակցություն ունենանք հայեցակարգի առաջխաղացմանը և մեզ համար անհրաժեշտ փոփոխությունների ներառմանն այս կարևոր փաստաթղթղում: Այսպիսով, մեր հավաքական կարծիքի և համակարգված գործողությունների շնորհիվ կնպաստենք գործընթացների արդյունավետության բարձրացմանն ու սխալվելու հավանականության նվազեցմանը», - իր ելույթում ասաց Ա. Սողոյանը:

Սամվել Խարազյանի ելույթը նվիրված էր Հայաստանում առողջության համապարփակ ապահովագրության ներդրման հարցերին:
Մասնակիցների առաջ քաշած հարցերի, առաջարկությունների և քննարկումների արդյունքում ընդունվեց առողջության համապարփակ ապահովագրության հայեցակարգի վերաբերյալ ստորև ներկայացվող դիրքորոշումը։

Ելնելով առողջության համապարփակ ապահովագրության ներդրման հայեցակարգային մոտեցումները կյանքի կոչելու անհրաժեշտությունից և կառուցողական միջավայրում, սոցիալական համերաշխության սկզբունքի գերակայության հիման վրա առողջապահական համակարգի զարգացումն ապահովելուն ուղղված ջանքերը մեկտեղելու կարևորությունից, մեր աջակցությունն ենք հայտնում առողջության համապարփակ ապահովագրության ներդրման նախաձեռնությանը և պատրաստակամ ենք համատեղ ջանքերի միջոցով համակարգային փոփոխությունների իրականացմանը: Այդ կապակցությամբ ակնկալում ենք կառավարության, Ազգային ժողովի, հանրային հատվածի աջակցությունը՝ առաջ քաշվող խնդիրների լուծմանն ուղղված քայլերի քննարկումը, ներկայացված մոտեցումները հանրային շահի տեսանկյունից դիտարկելու համար:

Որոշվեց նաև, որ մասնագիտական ասոցիացիաներում կքննարկվի հայեցակարգը` բոլոր դրույթներով, և փետրվար ամսվա երկրորդ տասնօրյակում (օրը լրացուցիչ կճշտվի) բոլոր ասոցիացիաների կարծիքները կներկայացվեն համատեղ քննարկման։

Հարցեր, պատասխաններ, մեկնաբանություններ