Ուռուցքաբանության ազգային կենտրոնը մասնակցել է «Առողջապահություն և Դեղագործություն EXPO 2019» միջազգային ցուցահանդեսին. oncology.am

Վ․Ա․ Ֆանարջյանի անվան ուռուցքաբանության ազգային կենտրոնը հոկտեմբերի 25-27-ը մասնակցել է «Առողջապահություն և Դեղագործություն EXPO 2019» միջազգային ցուցահանդեսին։ Կենտրոնը, որը վերջին տարիներին արագընթաց տեմպերով զարգանում է, ներկայացել է իր նոր ձեռքբերումներով և հնարավորություններով։ Նշենք, որ մի քանի տարվա ընթացքում ՈՒԱԿ-ում ամբողջովին վերափոխվել և վերազինվել են ընդունարանը, քիմիաթերապիայի բաժանմունքը, գինեկոլոգիայի և ընհանուր ուռուցքաբանության բաժանմունքները, վիրահատարանները, ախտորոշիչ բաժանմունքները համալրվել են նոր, ժամանակակից սարքերով, ներդրվել են ախտորոշման և բուժման արդի մեթոդներ։

Մասնավորապես.

ՈՒԱԿ-ն` առաջինը Հայաստանում, գործարկել է ամերիկյան արտադրության Ventana BenchMark – HT սարքը, որը հնարավորություն է տալիս ավտոմատացված համակարգով կատարել իմունահյուսվածաքիմիական հետազոտություններ և ապահովում է բարձր արդյունավետություն:

Ուռուցքաբանության ազգային կենտրոնում ներդրվել է նաև կրծքագեղձի քաղցկեղի վիրահատական բուժման ընթացքում կիրառվող պահակային ավշահանգույցների հայտնաբերման ժամանակակից մեթոդ՝ կրծքում ռադիո-իզոտոպային նյութ (Technetium-99m) ներարկելուց հետո վիրահատության ժամանակ հատուկ սարքի (գամմա-դետեկտոր) միջոցով հայտնաբերվում և անութափոսից հեռացվում է միայն մի քանի ավշահանգույց: Այս մեթոդը թույլ է տալիս պահպանել անութափոսի չախտահարված ավշահանգույցները` դրանով իսկ պացիենտին զերծ պահելով ձեռքի հետվիրահատական այտուցից և քրոնիկական ցավերից:

Այս տարվա սկզբից կենտրոնում վերագործարկվել է ռադիոյոդթերապիան, որը կիրառվում է վահանաձև գեղձի հիվանդությունների բուժման ժամանակ։ Նախկինում այս բուժումը ստանալու համար հիվանդները ստիպված մեկնում էին արտերկիր։

Ուռուցքաբանության ազգային կենտրոնը քաղցկեղի համալիր ախտորոշման և բուժման առաջատար բժշկական հաստատությունն է Հայաստանում:

Հարցեր, պատասխաններ, մեկնաբանություններ