Սրտաբանության եվրակովկասյան 7-րդ համաժողովը` Երևանում. med-practic.com

Ֆրանսիայի «Ակցիա-առողջություն. Հայաստան-Ֆրանսիա» կազմակերպությունը ՀՀ նախագահի բարձր հովանու ներքո, ՀՀ սփյուռքի գործերի գլխավոր հանձնակատարի գրասենյակի և ՀՀ առողջապահության նախարարության աջակցությամբ հոկտեմբերի 25-26-ը Երևանում անցկացրեցին Սրտաբանության եվրակովկասյան հերթական 7-րդ համաժողովը: Այն իր շուրջն էր համախմբել ոչ միայն սրտաբանների, այլև հարակից մասնագիտությամբ բժիշկների: Նման մեծամաշտաբ համաժողովի կազմակերմանն իրենց անմիջական մասնակցությունն են ունեցել Ալեք Վահանյանը, Ավետիս Մատիկյանը, Փոլ Բարրագանը, Դավուդ Մոայեն, Մհեր Սուսանին և Բագրատ Ալեքյանը

Երկօրյա հանդիպման ժամանակ նրանք հանդես եկան հետաքրքիր զեկույցներով, և անցկացրեցին մասնագիտական սեմինարներ: 

Մեզ հետ զրույցում սրտային վիրաբույժ, համաժողովի կազմակերպիչներից` Մհեր Սուսանին ասաց, որ համաժողովի հետաքրքրությունների շրջանակը բավականին լայն է:

«Համաժողովը տարբերվում է նմանատիպ այլ միջոցառումներից նրանով, որ մասնակիցների մեծ քանակը բավականին մեծ էր: Այն համախմբում է աշխարհի տարբեր երկրներից Հայաստան ժամանած հայտնի սրտաբանների»:

Բժիշկը շեշտեց, որ ավելի շատ մասնակից Երևան են ժամանել Ֆրանսիայից, և դա պատահական չէ:

«Ինվազիվ սրտաբանության զարգացումը Ֆրանսիայում մեծ թափ է առել: Հարկ եմ համարում նշել, որ Հայաստանում նույնպես հենց ֆրանսիացիներն են ինվազիվ սրտաբանության ներդրողները: Դա մոտավորապես 25 տարի առաջ էր: Ուստի, պատահական չէ, որ համաժողովին ավելի շատ թիվ են կազմում Ֆրանսիայից ժամանած ինվազիվ սրտաբանները», - ասաց զրուցակիցը:   

 
Խոսելով համաժողովի մասին` Մ. Սուսանին կարևորեց այն փաստը, որ սրտաբանների այս հավաքը զերծ է ձևական բնույթից:

«Այստեղ մասնագետները հավաքվել են, որպեսզի խոսեն ոչ թե կատարվածի մասին կամ ներկայացնեն իրենց կողմից իրականացված կլինիկական դեպքեր, այլ նրա մասին, թե ինչ ապագա է սպասում սրտաբանության ոլորտին»:

Մ. Սուսանիի փոխանցմամբ` համաժողովի ընթացքում մասնագետները խոսել են զանազան արդի թեմաներից` սրտի բնածին արատներից մինչև  գլխուղեղի կաթվածի կանխարգելման ձևերը։

«Եվ մեկ շատ կարևոր թեմա, որի մասին ևս անդրադարձ է եղել։ Խոսքը, այսպես ասած,  խելացի համակարգիչների ներդրումն է, ինչի միջոցով հնարավոր կլինի կատարել լիարժեք ախտորոշում, որի պարագայում սխալվելու հավանականությունը նվազագույն է», - ասաց Սուսանին:
Բժիշկը վստահ է, որ մոտ ապագայում Հայաստանն այլևս հետ չի մնա աշխարհում օր-օրի զարգացող տեխնոլոգիական աճից:

Հարցեր, պատասխաններ, մեկնաբանություններ