Հայաստանի 5-րդ միջազգային բժշկական համագումարի ընթացքում կայացավ «Վիրաբուժություն, անեսթեզիա և ինտենսիվ թերապիա, ռադիոլոգիա և ճառագայթային ախտորոշում» թեմայով քննարկում. 5imca.am

Սուրեն Ստեփանյանը, ով քննարկման համանախագահներից էր, նշեց, որ սեկցիայի ընթացքում քննարկվել են ինչպես կրծքային, այնպես էլ որովայնային վիրաբուժությանը վերաբերող հարցեր։

«Հայաստանյան առողջապահության համար ներկայացվեցին մի շարք նորություններ։ Դրանք, մասնավորապես, վերաբերում էին կրծքային վիրաբուժության մեջ լապարոսկոպիայի կիրառմանը, որը ներկայացրեց «Աստվածամայր բժշկական կենտրոնի» բժիշկ Դավիթ Դալլաքյանը»,- նշեց մասնագետը։

Ս. Ստեփանյանը նաև հավելեց, որ սեկցիայի ընթացքում լապարոսկոպիկ վիրաբուժության մեթոդների կիրառմանն անդրադարձավ Միքայելյան վիրաբուժության ինստիտուտից Վահե Հակոբյանը, որը բժիշկը չափազանց հետաքրքիր զեկուցում անվանեց։



«Եղան նաև ինտենսիվ թերապիայի ոլորտին վերաբերող հետաքրքիր և նորարարական զեկույցներ, որոնց մասին խոսեց Րաֆֆի Ավետիսյանը։ Բոլոր թեմաներն էլ շատ հետաքրքիր էին և կարևոր»,- ասաց նա։

Համանախագահներից Արմեն Աբովյանը քննարման ընթացքւմ մասնագետների ուշադրությունը սևեռեց հատկապես հաստ աղիքի քաղցկեղի հեռացման ռազմավարության վրա։ Նա, որպես միջոցառման ամենակարևոր բաղադրիչ, առանձնացրեց փորձի փոխանակման հնարավորության ստեղծումը, որ Հայաստանում մասնագետները կարող են արտերկրի հաջողված փորձերն ուսումնասիրել, հասկանալ, թե որն է դրանցից առավել արդյունավետ և կիրառելի մեր երկրում։

Հարցեր, պատասխաններ, մեկնաբանություններ