«Հայաստանը՝ որպես կենսատեխնոլոգիայի ոլորտի հնարավոր կենտրոն». Նուբար Աֆեյան. 5imca.am

Հայաստանի 5-րդ միջազգային բժշկական համագումարի շրջանակում բանախոսությամբ հանդես եկավ «100 կյանք» մարդասիրական նախաձեռնության համահիմնադիր Նուբար Աֆեյանը ՝ ներկայացնելով «Հայաստանը՝ որպես կենսատեխնոլոգիայի ոլորտի հնարավոր կենտրոն» թեման։

-   Հայ հասարակությանը Դուք առավելապես հայտնի եք որպես «Ավրորայի» համահիմնադիր:   Հետաքրքիր է լսել Ձեր գիտական հետաքրքրությունների շրջանակի մասին:

-   Վաղուց՝ արդեն 32 տարի է ,աշխատում եմ կենսատեխնոլոգիական ոլորտում։ Մենք ստեղծում ենք նոր տեխնոլոգիաներ, որոնցով կարող ենք դեղեր պատրաստել, բուժման մեխանիզմներ առաջարկել։ Ներկայում ղեկավարում եմ կազմակերպություն, որի նպատակն է ստեղծել աննախադեպ գաղափարներ և իրականացնել դրանք։ Զեկույցս հենց այդ մասին էր, տարբեր օրինակներ էի բերում, թե ինչպես հնարավոր դարձել այդ գաղափարների իրականացումը։

-   Հայաստանը կարո՞ղ է դառնալ Ձեր գաղափարների ռեալիզացման վայրերից մեկը։

-   Կարող է: Կամաց-կամաց փորձում ենք դա անել։ Շատ փոփոխություններ պետք է լինեն՝ թե՛ կրթության ոլորտում, թե՛ առողջապահության։ Մենք ստեղծել ենք հիմնադրամ՝ «ՖԱՍՏ» անունով, որի միջոցով գործակցում ենք տեղի նվիրյալ մասնագետների հետ՝ զարգացնելու, մասնավորապես, կենսատեխնոլոգիան։ Հուսով ենք, որ ժամանակի ընթացքում կապերը սփյուռքահայերի հետ կամրանան և համատեղ կկարողանանք իրականացնել միասնական երազանք՝ Հայաստանը դարձնել գիտական կենտրոն։

-   Դուք խոսեցիք դեղերի ստեղծման Ձեր տեսլականի մասին, նշեցիք, թե ինչպես են դրանք հազարավոր կյանքեր փրկել, սակայն աշխարհում  մեծ թափ են ստացել հակագիտական և հակաբժշական շարժումները, մասնավորապես, խոսքը հակավակցինացիոն շարժման մասին է։

-   Ինչպես ցանկացած ոլորտում՝ բժշկության մեջ նույնպես` լավ է, երբ մարդիկ կասկածում, հարցեր են տալիս, քննում են, սակայն լավ է այնքան ժամանակ, քանի զերծ է հավատքից և հուզումներից։ Ես հավատացած եմ, որ պատվաստանյութերը մարդակյին բուժման ամենակարևոր միջոցներն են, իսկ հակավակցինացիոն շարժման պնդումներում ոչ մի փաստ և գիտական հիմք չկա։ Ես քաջալերում եմ հարցերը և կարծում եմ՝ ցանկացած գիտնական պետք է պատասխանի դրանց, պարզապես, հարցերը չպետք է հիմնված լինեն միայն հուզումների և հակագիտական փաստարկների վրա։

Հարցեր, պատասխաններ, մեկնաբանություններ