Շաքարային դիաբետ + սրտանոթային խնդիրներ. ինչպես պայքարել hամակցված դեպքերում. med-practic.com

Շաքարային դիաբետն այսօր հիվանդությունների շարքում ոչ պասիվ դիրքերում է: Իսկ ինչպե՞ս է այն դրսեւորվում եւ ընթանում սրտանոթային հիվանդություններով տառապող մարդկանց մոտ:

Այս եւ մի շարք կարեւոր հարցերի շուրջ «Սալոն» ռեստորանում հրավիրված միջոցառումից հետո Med-Practic.com-ը զրուցեց էնդոկրինոլոգ, դոցենտ, «Էրեբունի» ԲԿ էնդոկրինոլոգիայի բաժնի վարիչ, Թերապևտների-ինտերնիստների հայկական ասոցիացիայի նախագահ, Շաքարախտի հայկական ասոցիացիայի ղեկավար Էլիզա Հայրապետյանի հետ:

«Շաքարախը՝ հատկապես թիվ երկու տիպի, ռիսկի գործոն է սրտանոթային համակարգի հիվանդություններով տառապող պացիենտների համար, քանի որ 90-100% դեպքերում տվյալ տիպի շաքարախտով հիվանդներն ունենում են սրտանոթային բարդություններ: Դա կարող է արտահայտվել զարկերակային գերճնշման դրսևորմամբ, սրտի տարբեր ախտահարումներով, կամ իշեմիկ հիվանդության հետ համակցված եւ այլն: Գերակա են սրտամկանի սուր ինֆարկտի դեպքերը»:

Խոսելով ավանդական բուժման մեթոդների մասին` Է. Հայրապետյանը նշեց. «Եթե սրտանոթային համակարգի հետ կապված խնդիրները բուժվեն ժամանակին և արդյունավետ, կկանխենք մահացությունների մոտավորապես 70%-ը: Փաստորեն, երբ հիվանդի մոտ հայտնաբերվում է տիպ երկու շաքարախտ, որոշ հետազոտություններից հետո պարզվում է, որ առկա են նաեւ սրտամկանի, սրտի անոթների ախտահարումներ, հաղորդականության, ռիթմի խանգարումներ և այլն: Պատճառը տիպ երկու շաքարախտի հետեւանքով նյութափոխանակության խանգարումն է ամբողջ օրգանիզմում, նաև` սրտում»:

 Է. Հայրապետյանը, անդրադառնալով համակցված բուժման մեթոդներին ու առանձնահատկություններին, նշեց. «Երբ հիվանդի մոտ առկա է տիպ երկու շաքարախտ, հարկ է կարգավորել ո՛չ միայն սրտի հեմոդինամիկան, կորոնար անոթների վիճակը, լուսանցնքերի բավարար անցանելիությունը, այլև ապահովել սրտի էներգետիկ պաշարները: Սրտին պետք է էներգիա մատակարարել, նյութափոխանակությունը կարգավորել: Էներգիան ստեղծվում է գլյուկոզայի կամ ճարպերի յուրացումից, որի համար անհրաժեշտ է ինսուլին: Այստեղից բխում է, եթե տիպ երկու շաքարախտի ժամանակ ունենք ինսուլինի ազդեցության խանգարումներ, բնականաբար, առանց շաքարախտի բուժման` սրտի ախտահարումները բուժելն անիմաստ է: Որպեսզի անհրաժեշտ բոլոր դեղերն արդյունավետ լինեն, առաջին հերթին, սրտին հարկ է ապահովել էներգիայով: Սա նոր, համակցված բուժման մոտեցում է:

Պետք է նշեմ, որ ՀՀ-ում կիրառելի են բոլոր միջազգային ուղեցույցները, սակայն երբ առկա է տիպ երկու շաքարախտ` զոգորդված անոթային և սրտի ախտահարումներով, այս պարագայում ուղեցույց չկա: Վերջին միջազգային կոնֆերանսներում արդեն խոսվում է նման դեպքերում բուժման նոր սխեմաների և ուղեցույցների կիրառման մասին»:

«Հայաստանում Գրինդեքս» դեղագործական ընկերության ներկայացուցչության ավագ ներկայացուցիչ Սարմեն Վանեսյանը, խոսելով սեմինարում ներկայացվող դեղի մասին, ասաց. «Մեր ընկերությունն ունի գործարաններ Լատվիայում, Լիտվայում, Էստոնիայում, Սլովակիայում ու Ռուսաստանում: Հայաստանում գրանցված են հոգենյարդաբանական, սրտանոթային, աղեստամոքսային համակարգի ախտահարումների ժամանակ կիրառվող բազմաթիվ դեղեր, սակայն խոսել ենք երկրորդ տիպի շաքարային դիաբետի բուժման գործընթացում կիրառվող դեղի` Միլդրոնատի ազդեցության մասին: Այն բավականին ուսումնասիրված է, բժշկության մեջ կիրառվում է 1989 թվականից մինչ օրս: Միլդրոնատը բարձրացնում է ֆիզիկական ծանրաբեռնվածությունների հանդեպ կայունությունը: Եթե պացիենտն ունի սրտանոթային խնդիրներ, նյարդաբանական խնդիրներ, ապա բուժման գործընթացում ընդգրկվում է Միլդրոնատ, հատկապես, եթե առկա է նաև շաքարային դիաբետ հիվանդությունը»:

Հարցեր, պատասխաններ, մեկնաբանություններ