ԵՊԲՀ-ում կայացավ «Սեռակրթության այբուբենը» հանրամատչելի դասախոսությունը

Օրերս Երևանի բժշկական համալսարանում կայացավ «Սեռակրթության այբուբենը» հանրամատչելի դասախոսությունը՝ Մ. Հերացու անվան ԵՊԲՀ սեքսոպաթոլոգիայի կլինիկայի բժիշկ-սեքսոպոթոլոգ, սեքսոլոգիայի ամբիոնի դասախոս, բ.գ.թ., դոցենտ Վրեժ Շահրամանյանի մատուցմամբ:

Շահրամանյանի դասախոսությունը բավականին հետաքրքիր ընթացք ունեցավ, այն ուղեկցվեց սլայդերի ցուցադրմամբ, հետաքրքիր օրինակներով, ինչպես նաև հումորային ինքնատիպ ակնարկներով: Այդ տարբերակով մատուցվող նյութը, ինչ խոսք, էլ ավելի մատչելի ու հետաքրքիր էր դառնում:   

«Մարդու օրգանիզմն ամոթալի օրգաններ և ֆունկցիաներ չունի: Առաջին հերթին՝ դա վերաբերում է կյանքի վերարտադրմանն առնչվող օրգաններին: Ամոթ կարող են հարուցել միայն սեռական փոխհարաբերությունների անգիտությունն ու նախապաշարմունքները, այսօրինակ հարցերին կեղծ բարեպաշտ մոտեցումները», - նշեց  բժիշկն ու հավելեց, որ սեռական դաստիարակությունը մարդու ընդհանուր դաստիարակության մի մասն է կազմում, բայց թեմայի անհասանելի լինելու պատճառով տարբերվում է մեծ անորոշությամբ:

«Եթե դաստիարակության այլ ուղղությունները շատ թե քիչ արտահայտված են ու կարող են սեփական փորձով փոխանցվել, ինչպես նաև ուղղվել խորհուրդներով ու կարգադրումներով, ապա սեռական դաստիարակությանը վերաբերող շատ հարցերում են փակ, հատկապես տերմինաբանությունը։

«Փողոցի լեզուն», ցավոք,  հաճախ դառնում է սեռական անատոմիայի նկարագիրը» ցավով փաստեց բժիշկ-սեքսոպաթոլոգն ու անհեթեթ համարեց՝ «Առողջ ապրելակերպ»-ի դասավանդումը դպրոցներում ֆիզկուլտուրայի ուսուցիչներին վստահելը:

Բժիշկը ներկաների ուշադրությանը ներկայացրեց նաև մի քանի նամակ, որոնք պացիենտները հղել էին էլեկտրոնային հասցեով: Ի դեպ, նամակներ Շահրամանյանը բավականին շատ է ստանում: Նա ընդգծեց, որ շատ են հատկապես կուսության և ձեռնաշարժության վերաբերյալ նամակները:

Սեքսոպաթոլոգի փոխանցմամբ՝ թեպետ տեղեկատվության դար է և, կարծես թե, սակավություն չկա, այնուամենայնիվ, համաքաղաքացիներից շատերը չգիտեն տարրական բաներ, ինչն էլ հղի է մի շարք վտանգներով։

Վ. Շահրամանյանն իր խոսքում ասաց, որ  ներկայում 30-ից ավելի սեռավարակներ կան: Դրանց մի մասը կարող է առաջացնել հաճախամիզություն, ցավեր` միզելիս, միզարձակման խանգարումներ, դժվարամիզություն, մի մասը` արտադրություն, քոր, անհարմարավետություն, բորբոքումներ, անպտղություն: Որոշ սեռավարակներ շատ վտանգավոր են մոր և պտղի համար: Օրինակ՝ ցիտոմեգալովիրուսը և հերպեսը: Հաճախ սեռավարակները, չունենալով կլինիկական դրսևորումներ, կարող են լուրջ վտանգ ներկայացնել պտղի համար՝ հանգեցնելով ինքնաբեր վիժման, հղիության զարգացման կասեցման, պտղի զարգացման արատների, ներարգանդային վարակվածության:

«Մասնագիտական փորձը վկայում է, որ սեռավարակներով պայմանավորված սեռական խնդիրներ ունեցող պացիենտների թիվը, ցավոք, գնալով մեծանում է: Ներկայում հաճախ հանդիպող սեռավարակներից են՝ գոնոռեան, տրիքոմոնիազը, քլամիդիոզը, ուրեպլազմոզը, միկոպլազմոզը և այլն:

Սեռավարակների մասին խոսելիս շատերն ամոթխածությամբ լռում են, բժշկի չեն դիմում, ինչի հետևանքով կարող են առաջանալ մի շարք բարդություններ: Իրական է նաև այն տեսակետը, որ սեռավարակները երիտասարդանում են, այսինքն՝ դրսևորվում են շատ ավելի վաղ տարիքի անձանց մոտ: Սա պայմանավորված է սեռական կյանքի ազատականացմամբ, վաղ սեռական կյանքով, այսօրվա ազատ բարքերով, սեռական առողջության վերաբերյալ ունեցած թերի գիտելիքներով»:

Բժիշկն անդրադարձավ նաև զանգվածային լրատվամիջոցներում տպագրվող սեքսի մասին պատմող նյութերին․ «Նյութերի մեծամասնությունը գրվում են` կայքում դիտումներ ապահովելու նպատակով: Խոսքը, այսպես կոչված, անհեղինակ նյութերի, կծկտուր, երբեմն սխալ թարգմանությամբ մատուցած նյութերի մասին է: Որպես մասնագետ` մտահոգությունս եմ հայտնում այս հարցի վերաբերյալ: Ի՞նչ ենք շահում արդյունքում, եթե փորձում ենք ապահովել նմանատիպ նյութերի դիտելիությունը: Չէ՞ որ բոլորիս էլ քաջ հայտնի է, որ այդ նյութերի զգալի մասը մասնագիտական գրչով չի գրված: Կարդում ես առաջին երկու տողերը և հասկանում, որ վերնագիրը բացարձակ կապ չունի բովանդակության հետ: Բովանդակությունն էլ, մեղմ ասած, հեռու է բժշկական սեքսոլոգիայից: Եվ ո՞րն է նպատակը: Ջանասիրաբար հրամցնել ապատեղեկացված և հաճախ վտանգավոր տեղեկատվությու՞ն: Այցելուն դառնա անգրագե՞տ... Իսկ ավելի լավ չի՞ լինի, եթե նույն սկզբունքով առաջնորդվելով՝ լրագրողները չզլանան և նմանատիպ նյութեր պատրաստելիս դիմեն համապատասխան մասնագետի օգնությանը՝ աշխատանքն առավել գրագետ և օգտակար դարձնելու նպատակով: Արդյունքում և՛ դիտելիությունը կապահովվի, և՛ օգտակարությունը»:

Դասախոսության վերջում տեղի ունեցավ քննարկում: Դահլիճում ներկաները ակտիվորեն հնչեցրին իրենց հուզող հարցերն ու բժիշկ Շահրամանյանից ստացան մատչելի պատասխաններ:

Հարցեր, պատասխաններ, մեկնաբանություններ