Երևանում կայացավ Հայկական ուրոլոգիական ասոցիացիայի XX միջազգային կոնգրեսը

Սեպտեմբերի 28-29- ը Երևանում կայացավ Հայկական ուրոլոգիական ասոցիացիայի XX միջազգային տարեկան կոնգրեսը՝ նվիրված անվանի ուրոլոգ, դոցենտ Յուրի Զոհրաբյանի ծննդյան 80-ամյակին: Այս մասին մեզ հետ զրույցում ասաց կոնգրեսի կազմկոմիտեի համանախագահ Արմեն Ավոյանը:

Նրա խոսքերով` կոնգրեսը համախմբել էր Եվրամիության և ԱՊՀ երկրների, ԱՄՆ-ի, ՌԴ մի շարք անվանի մասնագետների: Նրանք խոսել են ուռուցքային ուռոլոգիական հիվանդությունների մասին և ո՛չ միայն:

«Կոնգրեսի ընթացքում քննարկվող թեմաների շրջանակն ընդգրկուն էր: Դրանք վերաբերում էին ժամանակակից գործառական ուրոլոգիայի գիտական և տեսական լուծումներ պահանջող արդիական մի շարք խնդիրների»:

Ա. Ավոյանը համոզված է, որ նմանատիպ մասնագիտական հանդիպումները լավ դպրոց են` հատկապես երիտասարդ մասնագետների համար:

«Սա շատ լավ դպրոց է երիտասարդ մասնագետի համար: Այստեղ հնարավորություն կա տեսնելու, շփվելու լավագույն փորձագետների հետ: Արդյունքում կարող են հարստացնել նաև պրակտիկ ունակությունները»: 

ԵՊԲՀ ռեկտոր Արմեն Մուրադյանը շնորհավորելով հոբելյարին նշեց, որ Յուրի Զոհրաբյանն իր անցած ճանապարհով ապացուցել է, որ հավատարմությունը սպիտակ խալաթին երբեք չի դավաճանում, կարողացել է իր իմաստությամբ կերտել նոր սերունդ, որն այսօր ի նպաստ ժողովրդի է աշխատում:

Ռեկտորն իր խոսքում կարևորեց նաև նման գիտական իրադարձությունների անցկացումը: «Ինձ համար այս ասոցիացիայի ժողովները մշտապես եղել և երկար տարիներ կմնան ամենակարևոր գիտական իրադարձությունները: Այս մասնագիտության մեջ ես ինձ զգում եմ ինչպես տանը, ընտանիքում: Շատ մեծ ճանապարհ եմ անցել՝ սկսած ակունքներից մինչև այսօրվա հաջողությունները: Հատկանշական է, որ երիտասարդ ուրոլոգներն իրենց անցած ճանապարհը փորձում են ամփոփել` ավագ ընկերների հետ անցկացնելով նմանատիպ գիտաժողովներ»,- նշեց նա:

Արմեն Մուրադյանն իր ելույթից հետո Յուրի Զոհրաբյանին ԵՊԲՀ պատմության և Հայաստանում ուրոլոգիայի զարգացման մեջ անգնահատելի դերի, անմնացորդ նվիրումի, երիտասարդ կադրերի պատրաստման և երկարատև ու անբասիր գիտամանկավարժական գործունեության համար պարգևատրել է ԵՊԲՀ հուշամեդալով:

Յուրի Զոհրաբյանին շնորհավորելու էին եկել բազմաթիվ պրոֆեսորներ, բժիշկներ, ռեզիդենտներ:  

Մեզ հետ զրույցում անվանի ուրոլոգ, դոցենտ Յուրի Զոհրաբյանն խոստովանեց, որ գնահատված լինելը հաճելի բան է.

«Ինչ խոսք, հաճելի է, որ քո աշակերտները, ուսանողները հարգում և մեծարում են քեզ: Կցանկանայի, որ բոլորն էլ հասնեն այդ գագաթնակետին և, ինչպես ասում են, արժանան այդ պատվին. դա մարդուն զգոն է պահում, երբ տեսնում է իր աշխատանքի արդյունքները»:

Հարցեր, պատասխաններ, մեկնաբանություններ