Միջազգային հարթակ՝ ներկայացնելու ակնաբուժության, նեոնատոլոգիայի և ներզատաբանության ոլորտի վերջին զարգացումները և հայկական հեռանկարները

24 սեպտեմբերի, 2018թ. - Այսօր Երևանում մեկնարկեց Հայկական ակնաբուժության նախագծի և Լոս Անջելեսի մանկական հիվանդանոցի 16-րդ միջազգային համաժողովը՝ նվիրված ակնաբուժությանը, նեոնատոլոգիային և ներզատաբանությանը:
Հայկական ակնաբուժության նախագիծը (ՀԱՆ) և Լոս Անջելեսի մանկական հիվանդանոցը ՀՀ առողջապահության նախարարության, Շաքարախտի համաշխարհային հիմնադրամի, ԱՄՆ Միջազգային զարգացման գործակալության, Նեոնատալ բժշկության հայկական ասոցիացիայի, Ակնաբույժների հայկական ասոցիացիայի և Մանկական էնդոկրինոլոգների հայկական ասոցիացիայի հետ գործակցությամբ համապարփակ ծրագիր է պատրաստել մանկական և ընդհանուր ակնաբույժների, նեոնատոլոգների և ներզատաբանների համար՝  կենտրոնանալով ակնային հիվանդությունների վրա: Միջազգային համաժողովը գիտելիքի և փորձի փոխանակման, ինչպես նաև առողջապահության համակարգի բարելավման նորարարական մոտեցումները ներկայացնելու հարթակ է, որտեղ վեց երկրի ավելի քան 60 խոսնակ և շուրջ տասը երկրի 400 մասնագետ է համախմբվել (ԱՄՆ, Եվրոպա, ԱՊՀ երկրներ, Կովկասյան տարածաշրջան, Կենտրոնական Ասիա և Միջին Արևելք): Հյուրերի շարքում են աշխարհում առաջատար այնպիսի կառույցների ներկայացուցիչներ, ինչպիսիք են Լոս Անջելեսի մանկական հիվանդանոցը, Ջուլս Սթայն աչքի ինստիտուտը, Լոս Անջելեսի Կալիֆոռնիայի համալսարանը, Իրվինի Կալիֆոռնիայի համալսարանը, Գրեյթ Օրմոնդ Ստրիթ մանկական հիվանդանոցը և Մուրֆիլդզ ակնաբուժական հիվանդանոցը:

Եռօրյա համաժողովի բացմանը ողջույնի խոսքով հանդես եկան Հայկական ակնաբուժության նախագծի հիմնադիր նախագահ Ռոջեր Օհանեսյանը, ՀՀ առողջապահության նախարարի տեղակալ Սերգեյ Խաչատրյանը, ԱՄՆ Միջազգային զարգացման գործակալության հայաստանյան առաքելության տնօրեն Դեբորա Գրիզերը և Լոս Անջելեսի մանկական հիվանդանոցի Տեսողության կենտրոնի տնօրեն Թոմաս Լին: Ողջունելով մասնակիցներին՝ նրանք մասնակիցներին արդյունավետ համագործակցություն և համաժողովին՝ բարի ընթացք մաղթեցին:

Լիագումար նիստը նվիրված էր առողջապահության համակարգում տեխնոլոգիական նորարարություններին, Լոս Անջելեսի մանկական հիվանդանոցի հետ գործակցությամբ Հայկական ակնաբուժության նախագծի աշխատանքներին և այլն: Ապա տեղի ունեցավ երկու համաժամանակյա թեմատիկ նիստ՝ նվիրված մանկական ակնաբուժությանը (հիմնական շեշտադրումը՝ անհասության ռետինոաթիա և դպրոցականների ակնային զննում) և ներզադաբանությանը (հիմնական շեշտադրումը՝ առաջին և երկրորդ տիպի մանկական շաքարախտի վարում, մետաբոլիկ սինդրոմ և գիրություն):

Համաժոովի երկրորդ օրը կներառի համաժամանակյա թեմատիկ նիստեր՝ նվիրված ընդհանուր ակնաբուժությանը և նեոնատոլոգիային: Ընդհանուր ակնաբուժության նիստին անդրադարձ կկատարվի ցանցաթաղանթին և շաքարախտային ռետինոպաթիային, գլաուկոմային, կատարակտ-կերատոպլաստիկային, նյարդա-ակնաբուժությանը և օրբիտալ վիրահատություններին: Նեոնատալոգիայի նիստին այլ հարցերի շարքում կքննարկվեն ոչ ինվազիվ արհեստական շնչառության, սնուցման հարցերը և անհաս նորածինների խնամքի նոր մեթոդները: Երրորդ օրը մասնակիցները հնարավորություն կունենան այցելելու Հայկական ակնաբուժության նախագծի Մանկական կուրության կանխարգելման գերազանցության կենտրոն, ծանոթանալու սիմուլյացիոն տիկնիկների միջոցով նորածինների խնամքի վերապատրաստման նոր մոտեցումներին և մասնակցելու կրթական այլ դասընթացների:

Համաժողովը կներառի նշված ոլորտներում նոր հետազոտությունների և լավագույն փորձի ներկայացում, թեմատիկ քննարկումներ և հարցուպատասխան: Բացի ակնաբույժներից, նեոնատոլոգիներից, ներզատաբաններից և խնամքի մասնագետներից, այս համաժողովը հետաքրքրական կլինի նաև առողջաահական համակարգի պատասխանատուների և քաղաքականություն մշակողների համար:

Հայկական ակնաբուժության նախագիծ (ՀԱՆ)

Հայկական ակնաբուժության նախագիծը (ՀԱՆ ԲԿ) ամերիկահայ ակնաբույժ Ռոջեր Օհանիսյանի կողմից ԱՄՆ-ում 1992թ. հիմնադրված բարեգործական կազմակերպություն է, որի հայաստանյան գրասենյակը ստեղծվել է 2003թ.-ին որպես բարեգործական հիմնադրամ (ՀԱՆ ԲՀ): Կազմակերպության առաքելությունն է կանխարգելել ձեռքբերովի կուրությունը Հայաստանում, և ակնաբուժական ծառայությունները հասանելի դարձնել Հայաստանի բոլոր բնակիչներին: Ծրագրի շրջանակներում բազմաթիվ ականավոր ակնաբույժներ են այցելել Հայաստան՝ բուժելու հիվանդներին և իրենց գիտելիքները փոխանցելու հայ ակնաբույժներին: Այս տարիներին նաև Հայաստանին է հատկացվել մեծաքանակ դեղորայք և սարքավորումներ: Հայկական ակնաբուժության նախագիծը սերտորեն համագործակցում է ՀՀ և արտերկրի կառավարությունների, պետական և տեղական իշխանությունների, ակնաբուժական և բժշկական հաստատությունների, տեղական և միջազգային կազմակերպությունների, ընկերությունների, անհատների, սփյուռքի և կորպորատիվ գործընկերների հետ: Ներկայումս Հայկական ակնաբուժության նախագիծն իրականացնում է համապարփակ մեծածավալ և փոխկապակցված ծրագրեր, որոնք ներառում են հետևյալ բաղադրիչները՝ բժշկական օգնություն, մասնագիտական և հանրային կրթություն, կարողությունների զարգացում և վերլուծություն: Բոլոր ծրագրերն ունեն իրենց թիրախավորված շահառուները և իրականացվում են միջազգային չափանիշներին համապատասխան:

Հարցեր, պատասխաններ, մեկնաբանություններ