ԵՊԲՀ. Ընտանեկան բժշկության 5-րդ գիտաժողովը նվիրված էր Ընտանեկան բժշկության ամբիոնի 20-ամյակին

Երևանի և մարզերի ավելի քան 400 բժիշկներ մասնակցեցին ԵՊԲՀ-ում մեկնարկած Ընտանեկան բժշկության 5-րդ գիտաժողովին, որն այս տարի նվիրված էր Ընտանեկան բժշկության ամբիոնի հիմնադրման 20-ամյակին:

«Իրական առողջապահության հիմքում կանխարգելումն է ու առողջության պահպանումը»,- ողջունելով գիտաժողովի մասնակիցներին նշեց ԵՊԲՀ ռեկտոր Արմեն Մուրադյանը: Ներկայացնելով «Տղամարդու առողջություն՝ առողջ ընտանիք» զեկույցը պրոֆեսորը հանգամանալից խոսեց տղամարդու առողջությանը վերաբերող խնդիրների մասին:

Նա ընդգծեց, որ հաճախ ոչ միայն քաղաքակիրթ աշխարհում, այլև մասնագիտական շրջանակում խուսափում են քննարկել նման խնդիրները, սակայն առողջությանը վերաբերող յուրաքանչյուր հիմնախնդիր վերլուծելու դեպքում է միայն հնարավոր կանխարգելել բարդություններն ու գտնել լուծման ուղիները: Նրա գնահատմամբ՝ յուրաքանչյուր ընտանիքի առողջապահության նախարարը կինն է և հենց կնոջ ձեռքերում է ընտանիքն առողջ պահելու կարևոր գործառույթը:

Ընտանեկան բժշկությունը Հայաստանում ներդրվեց 1999-ին` առաջնային բժշկական սպասարկման արդյունավետությունը բարձրացնելուն ուղղված պետական ռազմավարության շրջանակում: Դեռ 1997թ.-ին նախադիպլոմային և հետդիպլոմային կրթական ծրագրերում «Ընտանեկան բժշկություն» առարկայի ստեղծման նպատակով ԵՊԲՀ կազմում հիմնադրվեց ընտանեկան բժշկության ամբիոնը: 1999թ.-ին ՀՀ առողջապահության նախարարության հրամանով հաստատվեցին ընտանեկան բժշկության մասնագիտությունը, և մասնագիտության ձեռքբերմանն ուղղված կլինիկական օրդինատուրայի ծրագիրը: Նույն թվականին ԵՊԲՀ ամբիոնն ընդունեց ընտանեկան բժշկություն մասնագիտությամբ առաջին կլինիկական օրդինատորներին:

Ընտանեկան բժշկության ամբիոնի վարիչ, պրոֆեսոր Միքայել Նարիմանյանն ընդգծեց, որ ընտանեկան բժշկի ինստիտուտը կայացել է հատկապես մարզերում: Նա մեծապես կարևորեց առողջ մարդու, ինչպես նաև առողջությանն ուղղված գիտական ու կրթական ծրագրերի իրականացման գաղափարը:

«Ընտանեկան բժշկության ակադեմիական միավորում» հասարակական կազմակերպության համանախագահ Մարինա Օհանյանն էլ ընդգծեց, որ 20 տարում գրանցած հաջողություններից է առողջության առաջնային պահպանման օղակի աշխատակիցների հետ ամուր կապի ձևավորումը, ինչպես նաև շարունակական մասնագիտական զարգացմանն ուղղված ծրագրերի իրականացման խթանումը:

Գիտաժողովին զեկուցումներով հանդես եկան առաջատար մասնագետներ Հայաստանից, ինչպես նաև ճանաչված դասախոսներ և բժիշկներ Ռուսաստանի Դաշնությունից, Բելառուսի Հանրապետությունից: Ընտանեկան բժշկության 5-րդ գիտաժողովի առանցքային թեմաներն էին՝ շնչառական համակարգի արդի խնդիրները, ԼՕՌ հիվանդությունների բուժման սկզբունքները, սիրտ-անոթային համակարգի հարցերը և ԱԱՊ օղակի բժիշկների ամենօրյա աշխատանքում հաճախադեպ այլ խնդիրներ: Հատկապես կարևորվեցին առավել տարածված ոչ վարակիչ հիվանդությունների ախտորոշման, կառավարման, կանխարգելման և բուժման ժամանակակից մոտեցումները: Երկօրյա միջոցառման ավարտին գիտաժողովի մասնակիցներին հանձնվեցին համապատասխան վկայագրեր:

Հարցեր, պատասխաններ, մեկնաբանություններ