ԼՂՀ ԱՆ. «Ռեաբիլիտացիայի ժամանակակից տեսակետները բժշկության մեջ» խորագրով միջազգային գիտաժողով Արցախում

«Ռեաբիլիտացիայի ժամանակակից տեսակետները բժշկության մեջ» խորագրով Երևանում մեկնարկած 8-րդ միջազգային գիտաժողովի աշխատանքները շարունակվել են Արցախում: Գիտաժողովին մասնակցում էին Ռուսաստանի Դաշնությունից, Կորեայից ու Հայաստանից ժամանած պատվիրակներ, որոնց միացել են Արցախի մասնագետները:

Գիտաժողովի մասնակիցներին ողջունել է Արցախի Հանրապետության առողջապահության նախարարի պաշտոնակատար Կարինե Աթայանը: Վերականգնողական բժշկությունը արդիական ճյուղ է: Միջազգային առողջապահության կազմակերպության տվյալների համաձայն երկրագնդի բնակչության 10-15%-ը հաշմանդամներ են:

Կարինե Աթայանի խոսքով` հաշմանդամությունը, դա համաշխարհային սոցիալական երևույթ է և Արցախն այդ հարցում բացառություն չէ, հատկապես հաշվի առնելով պատերազմի հետևանքները, բնակչության մի մասը կարիք ունի ֆիզիկական և հոգեբանական վերականգնողական բուժման: ԱՀ առողջապահության նախարարության Հանրապետական բժշկական կենտրոնում գործում է ֆիզիոթերապիայի և ֆիզիկական բժշկության բաժանմունքը: Վերականգնողական բուժումն իրականացվում է նաև «Արևիկ» մանկական և շրջանային բուժմիավորումներում, տեղամասային հիվանդանոցներում։
  

Այդ կառույցների շարքում կարևոր դերակատարում ունի Ք. Քոքսի անվան վերականգնողական կենտրոնը, որը գործում է 1998թ.-ից։

Կենտրոնում վերապատրաստվում են նաև ֆիզիոթերապիստներ, ովքեր էլ հետագայում աշխատանքի են անցնում շրջանային բուժմիավորումներում: Կարինե Աթայանը հավելել է, որ այս գիտաժողովը կբացի համագործակցության նոր շրջանակներ և փորձի փոխանակման նոր հնարավորություններ:
 

Գիտաժողովի մասնակիցներին Քերոլայն Քոքսի անվան վերականգնողական կենտրոնի գործունեությունը ներկայացրել է կառույցի տնօրեն Վարդան Թադևոսյանը։ Նա կարևորել է գիտաժողովի անցկացումը և ավելացրել, որ այն խթան կհանդիսանա Արցախում ավելի զարգացնելու վերականգնողական բժշկության ճյուղերը:
 

ՀՀ «Կուրորտաբանության և ֆիզիկական բժշկության գիտահետազոտական ինստիտուտի» տնօրեն, Մ. Հերացու անվան ԵՊԲՀ ռեաբիլիտալոգիայի, ֆիզիոթերապիայի և սպորտային բժշկության ամբիոնի վարիչ, բժշկական գիտությունների դոկտոր, պրոֆեսոր, գիտաժողովի համանախագահ Բենիկ Հարությունյանը իր հերթին ողջունել է մասնակիցներին և շեշտել, որ երկու տարին մեկ կազմակերպվող վերականգնողական բժշկության ոլորտի ժամանակակից մոտեցումներին նվիրված միջոցառումներին մասնակցում են աշխարհի տարբեր երկրների այդ ոլորտի հռչակավոր գիտնականներ:
  

Գիտաժողովներում վեր են լուծում այդ ոլորտի տվյալ էտապին բնորոշ զարգացումները, ուղղություններն ու խնդիրները և դրանց լուծման առաջարկներն ու դիրքորոշումները։ Նման շփումները մեծ դերակատարություն ունեն ոլորտի զարգացման համար, որովհետև այդ բոլոր աշխատությունները հրատարակվում են ձեռնարկի ձևով և միջազգայնորեն դիտարկում են որպես լուրջ աշխատանքներ: Բենիկ Հարությունյանը պատրաստակամություն է հայտնել այսուհետ նման գիտաժողովներին ներառել նաև Արցախը:
  

Գիտաժողովի ժամանակ քննարկվել են ոլորտի կարևորագույն հարցերը, ներկայացվել են համակողմ ծառայությունների գործունեությունը, սպասելիքները, ինչպես տեսական, այնպես էլ պրակտիկ գործունեության և գիտական համագործակցության շրջանակներում։
  

Գիտաժողովի պատվիրակները Արցախի Հանրապետության առողջապահության նախարարի պաշտոնակատար Կարինե Աթայանի ուղեկցությամբ այցելել են Հանարապետական բժշկական կենտրոն: Հյուրերը իրենց գոհունակությունն են արտահայտել կենտրոնում առկա ժամանակակից սարքավորումների վերաբերյալ:

Այցի շրջանակներում ծանոթացել են նաև նորակառույց Ուռուցքաբանական դիսպանսերի պայմաններին և առկա խնդիրներին:

Կարինե Աթայանի հետ քննարկվել են Արցախի առողջապահության նախարարության նորակառույց Ուռուցքաբանական դիսպանսերի բուժսարքավորումներով համալրմանը աջակցություն ցուցաբերելու հետ կապված մի շարք հարցեր:

Հարցեր, պատասխաններ, մեկնաբանություններ