Պարգևատրումներ «Բուժաշխատողի օր» մասնագիտական տոնի առթիվ.

Բուժաշխատողի օրվա առթիվ հունիսի 21-ին Արցախի Հանրապետության կառավարության նիստերի դահլիճում տեղի է ունեցել պարգևատրման արարողություն: Արցախի առողջապահության նախարար Կարինե Աթայանը, ողջունելով ներկաներին, իր շնորհավորական խոսքում մասնավորապես ասել է. «Բժշկությունը ամենամարդասիրական մասնագիտությունն է, որը պահանջում է անմնացորդ նվիրում և ամենակարևորը մեծահոգություն:

Մասնագիտական բարձր պատրաստվածության ու հոգատար վերաբերմունքի շնորհիվ մարդկանց վերադարձնվում է ամենաանգինը՝ առողջությունը, հաճախ նաև կյանքը:
  

Այսօր, բժշկության առջև ծառացած խնդիրների ուղղությամբ տարվում են աշխատանքներ՝ բարձրացնելով առողջապահական համակարգի արդյունավետության մակարդակը, ներդնելով ժամանակակից տեխնոլոգիաներ, և բուժօգնությունը դարձնելով առավել մատչելի, առաջնահերթ ուշադրություն սևեռելով որակյալ կադրերի վերապատրաստման հարցին»:
  

Բուժաշխատողի օրվա կապակցությամբ և բժշկության բնագավառում մասնագիտական կարողությունների դրսևորման ու ձեռք բերած հաջողությունների համար Արցախի Հանրապետության վարչապետի հուշամեդալով ու պատվոգրով պարգևատրվել են առողջապահության համակարգի մի շարք աշխատակիցներ:
    

Մասնագիտական գործունեության նկատմամբ ունեցած բարեխիղճ վերաբերմունքի համար Արցախի առողջապահության նախարարի պատվոգրով խրախուսվել են ոլորտի բուժաշխատողներ:
  

Արցախի Հանրապետության վարչապետի պատվոգրով պարգևատրված, Շահումյանի շրջանի Քարվաճառի շրջանային բուժմիավորման մանկաբույժ Ստյոպա Սարգսյանը, իր շնորհակալական խոսքում նշել է, որ շրջանի բուժհաստատությունը, կատարված բարեփոխումների շնորհիվ, այսօր արդեն աշխատում է ավելի լավ պայմաններում:

Հարցեր, պատասխաններ, մեկնաբանություններ