ԵՊԲՀ. «ԲԺշկագիտության նորարարություններն ու նվաճումները» թեմայով գիտաժողով` Ստեփանակերտի Հանրապետական բժշկական կենտրոնում

ԵՊԲՀ մասնագետների այցի շրջանակում Հանրապետական բժշկական կենտրոնի նիստերի դահլիճում անցկացվել է գիտաժողով Արցախի բժիշկների մասնակցությամբ: Բացման հանդիսավոր արարողության ժամանակ Արցախի առողջապահության նախարար Կարինե Աթայանը ողջունելով «Բժշկագիտության օրերն Արցախում» գիտագործնական միջոցառման կազմակերպիչներին, կարևորել է իր ղեկավարած գերատեսչության և Երևանի պետական բժշկական համալսարանի համագործակցությունը:
  

Նա համոզմունք է հայտնել, որ գիտաժողովի մասնակից յուրաքանչյուր բժիշկ իր գիտելիքները կհամադրի երևանյան մասնագետների կողմից ներկայացվող ժամանակակից մոտեցումներին, որոնք հետագայում հաջողությամբ կկիրառի իր ամենօրյա աշխատանքում:
  

Նախարարը նաև վստահություն է հայտնել, որ ԵՊԲՀ հետ համատեղ և հետևողական աշխատանքների շնորհիվ էլ ավելի կընդլայնվեն համագործակցության շրջանակները, ինչի շնորհիվ նաև հնարավոր կդառնա բարեփոխել առողջապահության ոլորտը և միաժամանակ որակյալ և մատչելի բուժօգնություն մատուցել բնակչությանը: Այս համատեքստում Աթայանը մեկ անգամ ևս կարևորել է հայաստանցի բժիշկների մշտական աջակցությունն իրենց համակարգին:
  

ԵՊԲՀ ռեկտոր, պրոֆեսոր Արմեն Մուրադյանը ողջույնի խոսքում պատրաստակամություն է հայտնել մշտապես աշխատել Արցախում. ներկայացնել նորարարությունները, գործընկերներին փոխանցել բժշկագիտության իրենց մեծ փորձը:
 

ԵՊԲՀ պրոռեկտոր, պրոֆեսոր Կոնստանտին Ենկոյանը գիտաժողովի մասնակիցներն տեղեկացրել է, որ հետագայում կընտրվեն նեղ մասնագիտական ոլորտներ, կկազմակերպվեն առանձին թեմաներին վերաբերող թիրախային դասախոսություններ:
  

Գիտաժողովի ընթացքում քննարկման առարկա են դարձել թոքաբորբերի ռացիոնալ բուժման, ալերգիաների, սրտաբանության պաթոլոգիաների դիստանցիոն մոնիթորինգի և ախտորոշման, ինչպես նաև ակնոցային շտկման, նորածինների շնչառական օժանդակության մասին թեմաները:

Հարցեր, պատասխաններ, մեկնաբանություններ