Ոչ վարակիչ հիվանդությունների ժամանակակից բուժման ժամանակակից մոտեցումները

Մարտի 24-ին «Ընտանեկան բժշկության ակադեմիական միավորում» առողջապահական հասարակական կազմակերպությունն ու «Գեդեոն Ռիխտեր» դեղագործական ընկերության հայաստանյան ներկայացուցչությունը նախաձեռնել էին «Ընտանեկան բժշկի դպրոց» դասընթաց «Ոչ վարակիչ հիվանդությունների արդյունավետ վարում առողջապահական առաջնային օղակում» թեմայով: Միջոցառման նպատակն էր բժիշկներին ծանոթացնել ոչ վարակիչ հիվանդությունների բուժման ժամանակակից մոտեցումներին: Այս միջոցառումը հայաստանյան բժիշկների համար մասնագիտական վերապատրաստման լավագույն հնարավորություն էր:

Մեր զրուցկիցն է «Ընտանեկան բժշկության ակադեմիական միավորում» առողջապահական հասարակական կազմակերպության համանախագահ Մարինա Օհանյանը:
 
–  Ի՞նչումն է միջոցառման հրատապությունը:

–  Առհասարակ, 2017 թ. կարևորում ենք` շեշտադրելու մասնագիտական շարունակական զարգացումը, բժիշկների մասնագիտական վերապատրաստումը: Այսօրվա միջոցառման շրջանակում նախատեսված էր բժիշկներին ծանոթացնել ոչ վարակիչ հիվանդությունների բուժման ժամանակակից մոտեցումներին և պրակտիկ աշխատանքում բուժման կամակերպմանը: Միջոցառմանը հրավիրված էին նաև մարզերում աշխատող բժիշկները, իսկ թեմաների հրատապության խոսուն ապացույցը 400-ից ավելի մասնակիցների ներկայությունն էր:

«Գեդեոն Ռիխտեր» դեղագործական ընկերության հայաստանյան ներկայացուցչության մենեջեր Լուսինե Բլուրցյանը:

–   Ի՞նչ նպատակ էր հետապնդում միջոցառումը:

–  «Ընտանեկան բժշկության ակադեմիական միավորում»
առողջապահական հասարակական կազմակերպության հետ համատեղ առողջապահական առաջնային օղակի մասնագետների համար նախաձեռնել ենք  ոչ վարակիչ հիվանդությունների արդյունավետ վարմանը վերաբերող թեմայով կոնֆերանս: Միջոցառմանը զեկույցներով հանդես եկան չորս մասնագետ՝ սրտաբան, ռևմատոլոգ, նյարդաբան և գաստրոէնտերոլոգ, ովքեր լիարժեք տիրապետում են ոչ վարակիչ հիվանդությունների ժամանակակից բուժման մոտեցումներին, քանի որ բազմիցս մասնակցել են մասնագիտական վերապատրաստման դասընթացների: Դասախոսությունները նախատեսված էին առաջնային օղակի բժիշկների` ընտանեկան բժիշկների և նեղ մասնագետների համար: Բանախոսներն իրենց գիտելիքն ու փորձը կիսեցին ներկա գտնվող մասնագետների հետ` գործնականում կիրառելի դարձնելու բուժման նորագույն մոտեցումները:

ԵՊԲՀ Թերապիայի թիվ երրորդ ամբիոնի դոցենտ Գայանե Խաչատրյան

–  Ձեր այսօրվա զեկույցը վերաբերվում էր թթվակախյալ հիվանդություններին, որոնք են այդ հիվանդությունները:

–  Թթվակախյալ հիվանդությունները բազմաթիվ են: Մեր բնակչության մեջ ամենատարածվածը գաստրոէզոֆագեալ ռեֆլյուքս հիվանդությունն է: Քիչ թիվ չեն կազմում խոցային հիվանդությունները, որը կարող է փոխանցվել գենետիկորեն կամ առաջանալ ընդունած տարբեր դեղորայքի և սխալ սննդակարգի արդյունքում: Թթվակախյալ հիվանդության առաջացման պատճառներից են նաև տարբեր վարակները:

–  Որո՞նք են բուժման ժամանակակից մոտեցումները:

–  Ամենաառաջնայինը. անհրաժեշտ է հետևել սննդային ռեժիմին և առողջ ապրելակերպին:

«Էրեբունի բժշկական կենտրոնի ռևմատոլոգիայի բաժանմունքի բժիշկ-ռևմատոլոգ Վահան Մուկուչյան:
 
–  Խոսենք օստեոպորոզի բուժման և կանխարգելման ժամանակակից մոտեցումների մասին:

–  Օստեոպորոզի բուժման համար Հայաստանում առկա են բոլոր տեսակի դեղորայքները, իսկ մասնագիտական գիտելիքները բավարար են: Հիվանդությունը ո՛չ միայն մեր երկրում է տարածված, այլև՝ ամբողջ աշխարհում: Խնդրի առաջացման պատճառներից են հորմոնալ ֆոնի փոփոխությունները, որոնք պատասխանատու են ոսկրերի ամրության համար: Այս հիվանդության տարածվածության մեջ մեծ դերակատարում ունեն նաև կանանց մոտ իրականացվող վիրահատությունները, վահանաձև գեղձի հիվանդությունները և այլն: Օստեոպորոզը հատկապես անհանգստացնում է կանանց` դաշտանադադարից հետո, ինչի պատճառով այդ տարիքային խմբի կանայք ռիսկային գոտում են:

Օստեոպորոզի ռիսկային խմբում հայտնված պացիենտները պետք է բժշկի հսկողության տակ գտնվեն` խուսափելու հիվանդության զարգացումից և նրա հետագա բարդություններից:

Օստեոպորոզը համարվում է դարի «լուռ մարդասպաններից»: Հիվանդությունը հիմնականում դեղորայքային բուժում է պահանջում, վիրահատական միջամտության կարիք առաջանում է միայն կոտրվածքների դեպքում: Բուժման լավագույն ուղին կանխարգելումն է. կենսակերպի փոփոխությունն ու առողջ ապրելակերպը: Շատ կարևոր է առողջ սննդի կազմակերպումը, հարկ է սննդակարգում ներառել կաթնամթերք: 

Ի դեպ, հարկ եմ համարում նշել, որ ըստ վերջին հետազոտությունների, ապացուցվել է, որ, թեև ապրում ենք արևային երկրում, մեզ համար նույնպես ակտուալ է վիտամին D-ի կիրառումը: Ուստի ռիսկային գոտում գտնվող պացիենտներին խորհուրդ է տրվում այդ առումով խորհրդակցել բուժող բժշկի հետ:

Հարցեր, պատասխաններ, մեկնաբանություններ