Մեկնարկել է «Հայաստանաբնակ կարիքավոր սիրիահայերին բժշկական աջակցություն» ծրագիրը. izmirlianmedicalcenter.com

Ս/թ մարտի 17-ին «Իզմիրլյան» բժշկական կենտրոնում տեղի ունեցավ «Հայաստանաբնակ կարիքավոր սիրիահայերին բժշկական աջակցություն» ծրագրի մեկնարկի արարողությունը և ստորագրվեց համագործակցության հուշագիրը:

Հուշագիրը ստորագրեցին «Իզմիրլյան» բժշկական կենտրոնի տնօրեն Արմեն Չարչյանը, Հայաստանում «Իզմիրլյան» հիմնադրամի տնօրեն Լուսինե Գալաջյանը, Մայր Աթոռ Սուրբ Էջմիածնի սոցիալական ծառայության կենտրոնի տնօրեն Տեր. Մարկոս քահանա Մանգասարյանը, ՀՀ սփյուռքի նախարարության աշխատակազմի ղեկավար Ֆիրդուս Զաքարյանը, «Հայկական բարեգործական ընդհանուր միություն» հիմնադրամի Հայաստանի գլխավոր տնօրեն Վասկեն Յակուբյանը, «Սիրիահայերի հիմնախնդիրները համակարգող կենտրոն» հասարակական կազմակերպության նախագահ Լենա Հալաճյանը, «ՀԱԼԵՊ» հայրենակցական բարեսիրական հասարակական կազմակերպության նախագահ Անի Բալխյանը:

Միջոցառմանը ներկա էր նաեւ ՀՀ սփյուռքի նախարար Հրանուշ Հակոբյանը, ով ընդգծելով ծրագրի կարեւորությունն` ասաց.

«Սա «Իզմիրլյան» հիմնադրամի կողմից նախատեսված հերթական և չափազանց հրատապ ու կարևոր ծրագիր է: Ծրագիր, որի շրջանակում 5 000 սիրիահայերի համար բժշկական օգնություն ու սպասարկում կապահովվի: Փաստորեն «Իզմիրլյան» հիմնադրամն օգնում է պետական ծրագրին՝ թեթեւացնելով այդ ոլորտում առկա հոգսերը»,- ասաց Հ. Հակոբյանը:

«Իզմիրլյան» ԲԿ տնօրեն, պրոֆեսոր Արմեն Չարչյանը զրույցի ընթացքում, խոսելով ծրագրի մեկնարկի ու հետագա գործընթացի մասին, նշեց, որ ըստ հաշվարկների այն կգործի մոտավորապես երկու տարի.

«Կիրականացվի շուրջ 500 վիրահատություն կամ բժշկական լուրջ միջամտություն, որոնք, բնականաբար, կտարբերվեն խորհրդատվական այցերից: Խորհրդակցությունները կլինեն անվճար: Եթե խորհրդատվությունից հետո որևէ պացիենտ բժշկական միջամտության կամ վիրահատության կարիք կունենա, դա կիրագործվի տվյալ ծրագրի շրջանակում:

Ինչ վերաբերում է վիրահատություններին, դրանք իրականացվելու են «Իզմիրլյան» ԲԿ բժիշկների կողմից: Եթե բժշկական այլ  ոլորտի միջամտությունների կարիք լինի, կհրավիրվեն համապատասխան մասնագետներ»- ասաց Արմեն Չարչյանը:

Խոսելով ֆինանսական հարցերի ու ամբողջությամբ անվճար բուժօգնություն տրամադրելու մասին, Ա. Չարչյանն ընդգծեց.

«Եթե հասարակական կազմակերպության կողմից որոշում կայացվի, որ տվյալ պացիենտը պետք է սպասարկվի անվճար, անկախ կատարվող միջամտության ծավալից, նա կստանա անվճար բուժսպասարկում: Հարկ է նշել, որ ծրագրի շրջանակում իրականացվող բժշկական ծառայությունների ծախսերը կհոգան Մայր Աթոռ Սուրբ Էջմիածինը և «Իզմիրյան» հիմնադրամը, իսկ «Իզմիրլյան» բժշկական կենտրոնը կտրամադրի հատուկ զեղչեր:

Մայր Աթոռ Սուրբ Էջմիածնի սոցիալական ծառայության կենտրոնի տնօրեն Տեր Մարկոս քահանա Մանգասարյանը, խոսելով նման ծրագրերում Մայր Աթոռի դերակատարության մասին, ասաց, որ Մայր Աթոռը` Վեհափառ հայրապետի օրհնությամբ, նախկինում նույնպես թե՛ Հայաստանում, եւ թե՛ Սիրիայում սիրիահայերին աջակցելու բազմաթիվ ծրագրեր է իրագործել.

«Սննդով ապահովելու խնդրից մինչև բնակարանային ու բժշկական խնդիրներ Մայր Աթոռը սիրիահայերին միշտ աջակից է եղել: Սա հերթական ծրագիրն է, որն իրագործվում է Վեհափառ հայրապետի օրհնությամբ: Եթե խոսենք ծրագրի հոգեւոր-բարոյական կողմի մասին, ապա Մայր Աթոռն ինչպես այս, այնպես էլ հայաստանյան գրեթե բոլոր հիվանդանոցներում ապահովում է հոգեւորականի ներկայությունը: «Իզմիրլյան» բժշկական կենտրոնում երկար տարիներ հիվանդների կողքին է եղել Գերաշնորհ Տաթև սրբազանը, իսկ այժմ իր հոգևոր ծառայությունն է իրականացնում Արժանապատիվ  Տեր Թադեոս քահանան»:

Հայաստանում «Իզմիրլյան» հիմնադրամի տնօրեն Լուսինե Գալաջյանը, հիմնվելով տարիների մեծ փորձի վրա, նշեց, որ տվյալ ժամանակահատվածում սիրիահայերին աջակցության ձեռք մեկնելու լավագույն տարբերակը նրանց բժշկական օգնություն ցույց տալն է.

«Տարիներ շարունակ աշխատել եմ սիրիահայերի աջակցության տարբեր ծրագրերի նախաձեռման ու իրականացման ոլորտում, ինչն օգնել է տվյալ ծրագրի հետ կապված լուրջ գնահատական տալ: Բոլորիս է հայտնի, որ Հայկական բարեգործական միությունը, Գյուլբեկյան հիմնադրամն ու պետությունը բազմաթիվ ծրագրեր են իրականացնում, լուծվում են տարբեր ոլորտի խնդիրներ:

Իհարկե՛, իրականացվել են նաև այլ բժշկական ծրագրեր` պացիետներին սպասարկելով պետպատվերի շրջանակում: Կարիքների գնահատման մոնիթորինգի արդյունքում պարզ դարձավ,  որ հայաստանաբնակ սիրիահայերի համար կարևոր աջակցություն է բարեգործական ծրագրերի իրականացում հենց բժշկական ծառայությունների ոլորտում: «Իզմիրլյան» հիմնադրամը, տարիներ շարունակ լինելով «Իզմիրլյան» բժշկական կենտրոնի հիմնական դոնոր, եկավ այն եզրահանգման, որ այս կենտրոնում պացիենտները կարող են ստանալ բարձրորակ բժշկական օգնություն:

«Հայաստանաբնակ կարիքավոր սիրիահայերին բժշկական աջակցություն» ծրագիրը ֆինանսավորում են. «Իզմիրլյան» հիմնադրամը` 100 հազար ԱՄՆ դոլարին համարժեք գումարով, Մայր Աթոռ Սուրբ Էջմիածինը` 50 հազար ԱՄՆ դոլարին համարժեք գումարով, իսկ «Իզմիրլյան» ԲԿ-ն բոլոր սիրիահայերին կտրամադրի մինչև 45% զեղչ»:

Հարցեր, պատասխաններ, մեկնաբանություններ