Երևանում բացվեց ՌԴ ամենախոշոր բժշկական ընկերության գրասենյակը

ՌԴ և հետխորհրդային տարածքի ամենամեծ բժշկական ընկերությունը՝ INVITRO-ն արդեն իր գրասենյակն ունի Երևանում, որի ժապավենը փետրվարի 27-ին  խորհրդանշորեն կտրեցին ՀՀ ԱԺ Առողջապահության, մայրության և մանկության հարցերի մշտական անձնաժողովի նախագահ Արա Բաբլոյանը, Երևանի քաղաքապետարանի Առողջապահության վարչության  պետ Կամսար Բաբինյանն ու INVITRO միջազգային ընկերության գլխավոր տնօրեն Սերգեյ Ամբրոսովը:

Ինչպես նշեց Ա. Բաբլոյանը, այսուհետ հայաստանցիները բժշկական բարդ կամ կրկնակի հետազոտությունների համար ստիպված չեն լինի մեկնել արտեկիր. այդ ամենը կարվի Երևանում: INVITRO-ն իրականացնում է 1700-ից ավելի լաբորատոր հետազոտություններ և ինստրումենտալ ու համակարգչային ախտորոշումներ:

Երևանյան գրասենյակում հաճախորդը հանձնում է բիոնյութերը, դրանք նույն օրը հատուկ տարաներով ուղարկվում են Մոսկվայի կենտրոնական լաբորատորիա, որը հագեցած է աշխարհի լավագույն արտադրողների ամենաժամանակակից սարքավորումներով ու վերջին սերնդի ավտոմատ անալիզատորներով: Վերջիններս բացառում են մարդկային գործոնն ու ապահովում լիակատար վստահելի արդյունքներ:

Դրանք պատրաստ լինելուն պես, սկսած 1 օրից հաճախորդը ստանում տեղեկատվություն հնարավոր բոլոր տարբերակներով՝ SMS, էլփոստ, invitromed.am կայքէջում բացված անձնական կաբինետից, ցանկության դեպքում՝ անմիջապես գրասենյակից կամ փոստային առաքման միջոցով:

INVITRO-ն բժշկական հետազոտություններ իրականացնող ամենախոշոր  ընկերությունն է հետխորհրդային տարածքում, ունի ամենամեծ ցանցը՝ 900-ից ավելի բժշկական գրասենյակներ, որտեղ օրական կատարվում են մոտ 10 մլն բժշկական հետազոտություններ: Ընկերությունը գրասենյակներ ունի Ուկրաինայում, Ղազախստանում ու Բելառուսում: Հայաստանյան գրասենյակն առաջինն է անդրկովկասյան և մերձավորարևելյան տարածաշրջանում: Կարևորելով նման հեղինակավոր ընկերության մուտքը Հայաստան՝ INVITRO-ի երևանյան գրասենյակի բացմանը ներկա էին ՀՀ Առողջապահության նախարարության, Երևանի քաղաքապետարանի ներկայացուցիչներ, տարբեր բժշկական հաստատությունների տնօրեններ ու գլխավոր բժիշկներ:

Հարցեր, պատասխաններ, մեկնաբանություններ