«Մենք չենք վաճառում, մենք առաջարկում ենք լուծում ». այս կարգախոսով էր ներկայացել «Կոնցեռն-էներգոմաշ» ընկերությունը «Առողջապահություն և դեղագործություն EXPO 2017» ցուցահանդեսին

Փետրվարի 24-26-ին «LOGOS EXPO Center» ցուցահանդեսային ընկերության կողմից կազմակերպված  «Առողջապահություն և դեղագործություն EXPO 2017» միջազգային մասնագիտացված ցուցահանդեսի շրջանակում իր բժշկական սարքավորումները ներկայացրեց բժշկական, լաբորատոր, անալիտիկ սարքավորումներ ներմուծող «Կոնցեռն-էներգոմաշ» ՓԲԸ-ն:

«Med-practic»-ի հետ զրույցում «Կոնցեռն-էներգոմաշ» ՓԲԸ-ի  կոմերցիոն տնօրեն Դավիթ Առաքելյանը ներկայացրեց ընկերության կատարած աշխատանքը, ծառայությունները և նպատակները` նշելով, որ ընկերությունն ունի բազմաթիվ ուղղությունների դիստրիբյուտորային ցանց, որտեղ ներկայացվում են լաբորատոր, անզգայացման, արհեստական շնչառության, վիրաբուժական սարքավորումներ, ինչպես  նաև վիրահատարանի ձևավորման համար նախատեսված սարքեր և կահույք: «Մեր ընկերությունն ունի ուրոլոգիական, միզաքարային հիվանդությունների մենեջմենտի համար նախատեսված գերմանական սարքավորումներ  քարափշրման, կոնտակտային, դիստանցիոն և հարվածաալիքային բուժման համար»,- հայտնեց Դավիթ Առաքելյանը:

Դ. Առաքելյանը նշեց, որ ընկերությունն աշխատում է բժշկական և լաբորատոր այնպիսի համաշխարհային առաջատար արտադրողների հետ, ինչպիսիք են` Roche Diagnostics-ը, Sysmex-ը, BioMerieux-ը, Stago-ն և այլն: Արտադրողների շարքում կարևորեց նաև ներկայացնել STERIS ընկերության լվացող, ախտահանող սարքերը, վիրահատական սեղանները և լույսերը:

«Հարկ եմ համարում շեշտել, որ մենք աշխատում ենք ոչ թե վաճառքով, այլ` լուծում առաջարկելով: Կլինիկական աշխատանքը կազմակերպելու ընթացքում առաջացած խնդիրների լուծման համար մենք տրամադրում ենք ամբողջական փաթեթ` սկսած խորհրդատվությունից, պլանավորումից, վաճառք-տեղադրումից, ուսուցումից, մինչև երաշխիքային և հետերաշխիքային սպասարկում, ինչպես նաև անհրաժեշտ պահեստամասերի մատակարարում: Սա մեր առանձնահատկությունն է, որով փորձում ենք է՛լ ավելի օգտակար լինել մեր գործընկերներին, նպաստել լաբորատորիաների, բուժհիմնարկների ժամանակակից տեխնոլոգիաներով հագեցմանը, դրանով իսկ զարգացնել երկրի բժշկական ոլորտը»:

Հարցեր, պատասխաններ, մեկնաբանություններ