ԼՂՀ ԱՆ. Հայկական պոպուլյացիայի «գեների բանկ» է ստեղծվում

2016թ. հունվարի 25-ին Հանրապետական բժշկական կենտրոնում Արցախի առողջապահության նախարարության և հայկական «Առմգենիա» գենետիկական հետազոտական բարեգործական հիմնադրամի (ԲՀ) միջև համագործակցության հուշագիր է ստորագրվել:

Ներկայումս գիտությունը անցել է մարդու գենոմի ուսումնասիրության նոր պոստգենոմիկ փուլ, որն ուղղված է պատմական և մարդաբանական առանձնահատկությունների շրջանակում նոր գիտելիքների ձեռք բերմանը:

Հիմնադրամը զբաղվում է հայկական գենոմի ուսումնասիրությամբ: Ծրագրի գլխավոր նպատակը՝ Հայաստանի գենետիկ քարտեզագրումն է, որում ներառված է նաև Արցախը:

Արցախի առողջապահության նախարար Կարինե Աթայանն իր խոսքում ասել է, որ համագործակցության հուշագիրն իր մեջ ներառում է գենետիկական և բժշկական հետազոտություններ՝ նպատակ ունենալով ստեղծելու հայկական պոպուլյացիայի «գեների բանկ», որը տեղեկատվություն է պարունակելու Արցախի տարածքում բնակվող հայերի ֆենոտիպի և գենոտիպի մասին։ Հետազոտության արդյունքները կօգտագործվեն առողջության բարելավման և էկոլոգիական ռիսկերի գնահատման նպատակներով:

«Առմգենիա» գենետիկական հետազոտական բարեգործական հիմնադրամի գործադիր տնօրեն Տաճատ Ասատուրյանը կարևորել է ծրագրին Արցախի մասնակցությունը, որովհետև այստեղ պահպանվել է զտարյուն հայի տեսակը:

Համաձայնագրի համաձայն ԼՂՀ առողջապահության նախարարությունը պարտավորվում է ծրագրի շրջանակներում կազմակերպել և կատարել հանրապետության ամբողջ տարածքում երկու հազար շահառուների հավաքագրման, արյան նմուշի վերցման գործընթացը, նմուշների ժամանակավոր պահպանումը և տեղափոխումը ՀՀ, ք. Երևան, «Առմգենիա» գենետիկական հետազոտական ԲՀ –ի գրասենյակ:

«Առմգենիա» գենետիկական հետազոտական ԲՀ-ն իր հերթին պարտավորվում է անհրաժեշտ վերապատրաստում անցկացնել բժշկական անձնակազմի հետ, կազմել և տրամադրել շահառուների կողմից լրացվող հարցաթերթիկներ:
  

Հավաքագրված նմուշները նախնական մշակման ենթարկել մասնագիտացված կենտրոններում: Ապահովել նմուշների տեղափոխումը Լոս Անջելեսի կալիֆորնյան պետական գիտահետազոտական համալսարանի (University of California, Los Angeles) լաբորատորիա՝ վերջնական քննություն կատարելու նպատակով: Ապահովել տեղեկատվության գաղտնիությունը և արդյունքները հրապարակել բացառապես երկկողմ համաձայնությամբ:
 

Ստացված արդյունքները կկիրառվեն Արցախի առողջապահության զարգացման գործընթացում և գենո-անթրոպոմետրիկ հետազոտություններում:

Հարցեր, պատասխաններ, մեկնաբանություններ