ՀՀ ԱՆ. Կայացել է ՀՀ առողջապահության նախարարի և փոխնախարարի ասուլիսը

Այսօր տեղի է ունեցել ՀՀ առողջապահության նախարար Լևոն Ալթունյանի և փոխնախարար Սամվել Մարգարյանի մամուլի ասուլիսը։ Լրագրողներին շնորհավորելով Ամանորի և Սուրբ Ծննդյան տոների կապակցությամբ նախարարն ամփոփել է իր պաշտոնավարման ընթացքում իրականացված աշխատանքների արդյունքները, անդրադարձել առաջիկա անելիքներին։

Լևոն Ալթունյանը մասնավորապես նշել է, որ պաշտոնավարման երեք ամսվա ընթացքում հաջողվել է որոշակիորեն վեր հանել առողջապահական համակարգում առկա խնդիրները։

Այդ նպատակով նախարարությունում ստեղծվել է 4 աշխատանքային խումբ` ծախսվող միջոցների ֆինանսական արդյունավետությունը գնահատող, կառուցվածքային բարեփոխումների հանձնաժողով, էլեկտրոնային առողջապահության համակարգի ներդրման աշխատանքային խումբ, բժշկական գործելակարգերի թարգմանությունը, տեղայնացումը և ներդրումն ապահովող աշխատանքային խումբ: Անցած շաբաթվանից խմբերը համաքլրվել են ևս երեքով։

Լևոն Ալթունյանը շեշտել է, որ չորս խմբի ուսումնասիրությունների արդյունքները վկայում են, որ պետական պատվերով բժշկական օգնության ծրագրերն իրականացնելիս բյուջեից հատկացվող միջոցները պետք է հնարավորինս արդյունավետ օգտագործվեն։

«Առկա խնդիրների լուծման մեր տեսլականն է ոչ շուկայական մեխանիզմներով իրականացվող գնման համակարգից անցնել հատկացվող ֆինանսական միջոցների վերահսկման և որակի կառավարման գործուն մեխանիզմների վրա հիմնված առողջապահական համակարգի»,-ասել է նախարարը` ներկայացնելով առաջիկա 2 տարում նախատեսվող փուլային քայլերը, այդ թվում` օրենսդրական բարեփոխումներ, մատուցվող բժշկական ծառայությունների գների վերանայում։

«Մատուցվող ծառայությունների որակի բարելավմանը մեծապես կնպաստի բյուջետային միջոցների փաստացի բաշխումից ծառայությունների գնման մոդելին անցումը։ Միաժամանակ, բժշկական ծառայությունների ինքնարժեքի հաշվարկման և գնային քաղաքականության մշակման նպատակով կուժեղացվեն կիրառվող մեթոդաբանական և ակտուարավերլուծական մոտեցումները»,-ներկայացրել է Լևոն Ալթունյանը։

Մատուցվող բժշկական ծառայությունների որակի բարելավման գործում նա կարևորել է պացիենտների վարման կլինիկական ուղեցույցների և պարտադիր կատարման գործելակարգերի մշակումն ու ներդնումը` հավելելով, որ մինչև 2017թ. պատրաստ կլինի 200 ուղեցույց և 100 գործելակարգ։

Նախարարը հանգամանալից անդրադարձել է էլեկտրոնային առողջապահական (E-health) համակարգի ներդրման ծրագրին։ Նշել է, որ հստակեցվել են շահառուների շրջանակը, պատասխանատու անձանց և աշխատանքների հանձնման ժամկետները: Համակարգը միացվել է ոստիկանության բնակչության պետական ռեգիստրին:

E-health համակարգին ինտեգրվել է նաև ՀՀ ԱՆ «Դեղերի և բժշկական տեխնոլոգիաների փորձագիտական կենտրոնը», որն ապահովելու է Հայաստանում գրանցված դեղերի ցանկերի առցանց թարմացումը համակարգում:

Պատրաստվել են էլեկտրոնային առողջապահական համակարգում պետական պատվերի շրջանակներում իրականացվող գործառույթները նկարագրող ուսումնական տեսանյութեր, որոնք տեղադրված են ԱՆ պաշտոնական կայքում:

Ծրագրային իրավասությունների տրամադրման և բժշկական անձնակազմի ռեգիստրի ստեղծման նպատակով E-health համակարգ է ներմուծվել պետական պատվեր իրականացնող 470 (ողջ ծավալի 95%) բժշկական կազմակերպության աշխատողների վերաբերյալ տեղեկատվությունը (համակարգում արդեն իսկ մուտքագրված է ավելի քան 20 հազար օգտատիրոջ տվյալ):

Լևոն Ալթունյանն անդրադարձել է նաև ոլորտում իրականացվող կառուցվածքային բարեփոխումներին, պատասխանել լրագրողների հարցերին։

Նախարարի տեղակալ Սամվել Մարգարյանը ներկայացրել է առողջապահական համակարգի ֆինանսավորման, պետական պատվերի տեղադրման մոտեցումներին, անդրադարձել ոլորտի օպտիմալացման ծրագրերին, ինչպես նաև առկա խնդիրների հաղթահարման ուղիներին։

Փոխնախարարը նախ ամփոփել է ֆինանսական տարին։ Նա մանրամասնել է, թե 2016թ. 89 մլրդ դրամ առողջապահական բյուջեով ինչ ծրագրեր են իրականացվել։

«Ամբողջ համակարգի ամբուլատոր ցանցի ֆինանսավորումը մոտ 27 մլրդ դրամ է, իսկ պետական պատվերի շրջանակում հիվանդանոցային ծառայությունների ֆինանսավորումը` 40 մլրդ 310 մլն»,-ասել է Սամվել Մարգարյանը` նշելով, որ 2016 թվականին արձանագրվել է հիվանդանոցային բուժօգնության 321.580 դեպք, որից մոտ 86,5 հազարը` 0-18 տարեկան երեխաներ։

Նշենք, որ ընթացիկ տարում շարունակվել է բնակչությանը պետության կողմից երաշխավորված անվճար բժշկական օգնության և սպասարկման շրջանակներում սրտի անհետաձգելի վիրահատությունների` ոչ դեղապատ ստենդի տեղադրման՝ կյանք փրկող ծրագիրը: Ինչպես նախորդ, այնպես էլ այս տարի սուր ինֆարկտից գրանցված մահերի թիվը շուրջ 500-ով նվազել է: Փրկվել է 1371 մարդու կյանք: Պետպատվերի շրջանակում իրականացվել է 3.216 սրտի վիրահատություն, որից 167-ը` երեխաներ։

Փոխնախարարն անդրադարձել է նաև Ֆինանսական միջոցների արդյունավետ օգտագործման նպատակով վերջին երեք ամսվա ընթացքում իրականացված քայլերին` ախտորոշմանն ու առկա խնդիրների լուծմանն ուղղված քայլերին, առաջիկա ծրագրերին։

Հարցեր, պատասխաններ, մեկնաբանություններ