ՀՀ ԱՆ. Սրտաբանական գիտահետազոտական ինստիտուտը 55 տարեկան է

Լ.Ա. Հովհաննիսյանի անվան սրտաբանական գիտահետազոտական ինստիտուտը հիմնադրման 55­ամյակը նշանավորում է ՀՀ ԳԱԱ-ում մեկնարկող երկօրյա գիտաժողովով։

ՀՀ առողջապահության նախարար Լևոն Ալթունյանն այդ առթիվ շնորհավորեց  ինչպես վեհաժողովի մասնակիցներին, ինստիտուտի կոլեկտիվին, այնպես էլ` Հայաստանի բոլոր սրտաբաններին։ Նա նշեց, որ մարդկության առջև ծառացած լուրջ մարտահրավերներից մեկը սրտանոթային հիվանդությունների բարձր հիվանդացությունը և մահացությունն է։  Նա ուրախությամբ փաստեց, որ Հայաստանի սրտաբաններն իրականացնում են միջազգային չափորոշիչներին  համապատասխանող ծառայություն: Դրանում իրենց դերակատարությունն են ունեցել ինչպես Հայաստանի, այնպես էլ սփյուռքահայ մասնագետները։

Սրտաբանության ոլորտում որպես լուրջ ձեռքբերում ընդգծվեց Հանրապետության նախագահի ծրագրային դրույթներից բխող` սուր ինֆարկտի դեպքում սրտի անհետաձգելի վիրահատության  ծրագրի իրականացումը, որի շնորհիվ բազմաթիվ կյանքեր են փրկվում:

Սրտաբանական գիտահետազոտական ինստիտուտի հիմնադրման 55­ամյակի առթիվ  ՀՀ նախագահ Սերժ Սարգսյանի ուղերձում նշվում էր, որ  պետության ջանքերով հնարավոր է եղել նվազեցնել սրտի կարեւորագույն հիվանդությունների ինքնարժեքը, ինչը զգալիորեն բարձրացրել է որակյալ բուժօգնության հասանելությունը Հայաստանի քաղաքացիների համար:

Այնուհետև Նախագահ Սերժ Սարգսյանի հրամանագրով` Հայաստանի անկախության 25 ամյակի առիթով սրտաբանության զարգացման գործում ունեցած ավանդի, ինչպես նաև հայրենիքին մատուցած ծառայությունների համար 2-րդ աստիճանի շքանշանով պարգևատրվեց պրոֆեսոր Բագրատ Ալեքյանը։

Լ.Ա. Հովհաննիսյանի անվան սրտաբանական գիտահետազոտական ինստիտուտի 55-ամյակի կապակցությամբ առողջապահության համակարգում երկարատև և անմնացորդ աշխատանքի համար ՀՀ առողջապահության նախարարության պատվոգրերով պարգևատրվեցին ՀՀ ԳԱԱ ակադեմիկոս, պրոֆեսոր Կարլեն Ադամյանը, բժշկական գիտությունների դոկտոր, պրոֆեսորներ Ռուդոլֆ Գաբրիելյանը և Սվետլանա Գուրգենյանը։

Հարցեր, պատասխաններ, մեկնաբանություններ