«Իզմիրլյան» ԲԿ ուրոլոգիական բաժանմունքը համալարվեց նոր սարքով. izmirlianmedicalcenter.com

«Իզմիրլյան» բժշկական կենտրոնի ուրոլոգիական բաժանմունքը համալրվեց ևս մեկ լազերային նոր սարքով: Այն հնարավորություն կտա է՛լ ավելի կատարելագործված եղանակով իրականացնել ուրոլոգիական միջամտություններ՝ առանց կտրվածքային վերքերի:

Սարքը Կալիֆոռնիայի սփյուռքահայ բժիշկ, բարեգործ Կարո Դերձակյանի նվերն է ԲԿ-ին: Այն, ի դեպ, միակն է մեր տարածաշրջանում:

Կ. Դերձակյանի խոսքով՝ առաջին նմանատիպ սարքը կենտրոնը ստացել է 2012 թվականին. «Պետք է ասեմ, որ այն ևս հզոր էր (70 վատ) և մինչ օրս անխնդիր ծառայում է կլինիկային: Այսօր առիթ ունեցանք մեծացնելու գործիքի հզորությունը` նորագույն տեսակի «Քուանտա լազեր»-ով, ինչը գրեթե կրկնապատկվել է գործիքի ուժը (այն ունի 150 վատ ուժ):

Բժիշկն ընդգծեց, որ սարքն ուրոլոգիական մասնագիտության մեջ ամենագործածականներից է. սարքի օգնությամբ հեռացվում է շագանակագեղձի բարորակ գոյացությունն և ո՛չ միայն:

«Այս օրերին` պրոֆեսոր Գրաբսկու ղեկավարությամբ, մենք համատեղ կիրականացնենք մի քանի վիրահատություն, որպեսզի տեղի մասնագետներին ծանոթացնենք սարքավորման կիրառման եղանակներին»:

Ուրոլոգիական բաժանմունքի ղեկավար, պրոֆեսոր Արթուր Գրաբսկու խոսքերով՝ նոր տեխնոլոգիաների համալրումը կլինիկայում շարունակական բնույթ է կրում: «Դեռևս 2005 թվականից` մեր կլինիկայի  հիմնադրման օրվանից, կա համագործակցություն բժիշկ Կարո Դերձակյանի հետ, ով համալրեց մեր կլինիկան ժամանակին Հայաստանում առաջինը համարվող սարքերով, որի համար մեր շնորհակալությունն ենք հայտնում հարգարժան բժշկին: Այս սարքերի օգնությամբ է՛լ ավելի արդյունավետ դարձավ հիվանդների ապաքինումը»:

Ա. Գրաբսկին նշեց, որ նմանատիպ նոր սարքավորումներով կլինիկան սկսեց համալրվել դեռևս 2010 թվականից: «Սկզբնական շրջանում ունեցանք լազերային սարք՝ քարերի հեռացման համար, այնուհետև` շագանակագեղձի բարորակ գերաճի հեռացման սարք, որը մինչ օրս հաջողությամբ կիրառվում է: Այսօրվա սարքը՝ մեկ քայլ առաջ է. ավելի հզոր և ժամանակակից»:
 
Ա. Գրաբսկին համոզված է. «Նմանատիպ սարքերի օգնությամբ բուժումն առավել արդյունավետ է. միջամտությունների ժամանակ կտրուկ նվազում է արյան կորուստը, հիվանդն ապաքինվում է 24 ժամվա ընթացքում: Այսինքն՝ չբարդացված դեպքում հիվանդը մեկ օր հետո կարող է տուն գնալ, իսկ սա համարժեք է եվրոպական բուժման չափորոշիչներին»:

Հարցեր, պատասխաններ, մեկնաբանություններ