14-րդ միջազգային ակնաբուժական համաժողովը` Երևանում

 Երևանում կայացավ 14-րդ միջազգային ակնաբուժական համաժողովը՝ «Բժշկական կրթության, հիվանդների խնամքի և բուժման նոր ուղիներ» թեմայով: Համաժողովը կազմակերպվել է ՀՀ առողջապահության նախարարության, Հայկական ակնաբուժության նախագծի, Ս.Վ. Մալայանի անվան ակնաբուժական կենտրոնի և ՀՀ Ակնաբույժների ասոցիացիայի համագործակցությամբ:

Ինչպես Մեդ-Պրակտիկի հետ զրույցում նշեց Մալայանի անվ. ակնաբուժական կենտրոնի Աչքի պլաստիկ վիրաբուժության ծառայության ղեկավար, բ.գ.թ. Արմինե Ղարաքեշիշյանը, «սա այն համաժողովներից է, որին սպասում են բոլորը»:

–   Մասնակցում են ակնաբույժներ Հայաստանի բոլոր ծայրերից: Համաժողովը նաև առիթ է՝ հանրությանը սեփական աշխատանքով հաշվետու լինելու, թե ինչ հիվանդությունների հետ ենք աշխատում, ինչ նորագույն մեթոդներ ու սարքավորումներ ունենք և այլն...

Համաժողովին մասնակցելու համար Հայաստան են ժամանաել հյուրեր Ամերիկայի Միացյալ Նահանգներից, ովքեր ներկայացնում են ոլորտի զարգացումների ամերիկյան փորձը: Միջոցառման բուն նպատակը արդյունավետ փորձի փոխանակում կազմակերպելն է:

ԵՊԲՀ ակնաբուժության ամբիոնի վարիչ, Մալայանի անվան ակնաբուժական կենտրոնի տնօրեն, բ.գ.դ., պրոֆեսոր, ԲԿԱԳՄԱ և ՌԴ ԲՏԳԱ ակադեմիկոս Ալեքսանդր Մալայանը ներկայացրեց Հայաստանի նվաճումներն ակնաբուժության ոլորտում: Մեկ-Պրակտիկի հետ զրույցում պրոֆեսոր Մալայանը կարևորեց համաժողովի դերը հատկապես տեղեկատվության փոխանակման տեսանկյունից.

–   Անցկացված յուրաքանչյուր տարվա համաժողովից հետո արդյունքներն ու նշանակությունը դառնում են ակնահյտ: Այս տարի նկատում ենք ավելի շատ երիտասարդ ակնաբույժների մասնակցություն համաժողովին, ովքեր մեծապես հետաքրքրված են քննարկվող թեմաներով: Համաժողովը մշտապես հարուստ է լինում նորություններով, որոնք ունեն գործնական կիրառություն:

Համաժողովի ընթացքում ներկայացվեց մեր ամենավերջին ծրագրերից մեկը: Այն վերաբերում է երեխաների ցանցաթաղանթի բնածին արատներին: Թեմային նվիրվեց առանձին նիստ՝ ամփոփելով արդյունքները:

Մեր կենտրոնը կարող է հպարտանալ, որ այսօր կիրառում է ակնաբուժության ոլորտում բոլոր նորագույն մեթոդները և քայլում է ժամանակի պահանջին համահունչ: Այս հանգամանքը ո՛չ միայն նպաստում է նրան, որ տարեցտարի պակասում է մեր պացիենտների արտահոսքը Հայաստանից, այլև արտասահմանից են շատերը մեզ մոտ գալիս՝ բժշկվելու: Կարծում եմ՝ մեծապես աճել է մեր բնակչության վստահությունը ակնաբուժության հանդեպ:

Մեդ Պրակտիկը զրուցեց նաև Հայկական ակնաբուժության նախագծի (ՀԱՆ) հիմնադիր նախագահ, Կալիֆորնիայի համալսարանի դոցենտ Ռոջեր Օհանեսյանի հետ, ով համաժողովի շրջանակում ներկայացրեց ՀԱՆ կրթական նոր ծրագիրը:

–   Այս նախաձեռնության նպատակն է նպաստել հայ երիտասարդ ակնաբույժների կրթությանը և մասնագիտական փորձառություն ձեռք բերելուն  ԱՄՆ-ում ու Եվրոպայում, իսկ այնուհետև այդ գիտելիքները Հայաստանում ներդնելուն:

Կարծում եմ, որ այս համաժողովն արդեն տարիներ շարունակ ապացուցում է իր հաջողվածությունը՝ յուրաքանչյուր անգամ բացահայտելով նոր ներուժ: Համոզված եմ, որ Հայաստանը բժշկության ոլորտում մեծ աճ ու հաջողություններ գրանցող երկիր է: Այսօր ես տեսնում եմ, որ ոլորտը բավականին զինված է նաև նորագույն սարքավորումների տեսանկյունից:

Հարցեր, պատասխաններ, մեկնաբանություններ