ՀՀ ԱՆ. Գերմանիայում մեկնարկել է Արյունաբանական կենտրոնի մասնագետների վերապատրաստման ծրագիրը

Հայաստանում Ոսկրածուծի փոխպատվաստման բաժանմունքի և ցողունային բջիջների լաբորատորիայի ստեղծման ծրագրի կարևորագույն մասերից մեկն է ՀՀ ԱՆ Ռ. Հ. Յոլյանի անվան արյունաբանական կենտրոնի առաջատար մասնագետների արտերկրյա վերապատրաստումը: Մայիսի 31-ին մեկնարկած դասընթացների առաջին փուլը կավարտվի հունիսի 29-ին, որից անմիջապես հետո կսկսվի երկրորդ փուլը: Յուրաքանչյուր փուլում ընդգրկված են 3-ական մասնագետներ:

Դասընթացների առաջին օրը հայաստանյան մասնագետներին ողջունել է UKE համալսարանական կլինիկայի տնօրեն պրոֆեսոր Գյոկեն, որը հույս է հայտնել, որ շուրջ երկու ամիս տևողությամբ կրթական ծրագրի շնորհիվ արյունաբանները ձեռք կբերեն անհրաժեշտ տեսական և գործնական գիտելիքներ՝ փոխպատվաստման աշխատանքներին արդյունավետ սկիզբ տալու նպատակով: Կենտրոնի տնօրենը պատրաստակամություն է հայտնել նաև շարունակել համագործակցությունը այլ ուղղություններով ևս:

Փոխպատվաստման կլինիկայի ղեկավար պրոֆեսոր Կրյոգերը ընդգծել է մասնագետների շարունակական վերապատրաստման կարևորությունը, ինչպես նաև հույս հայտնել, որ հետագայում կրթական ծրագրեր կիրականացվեն նաև բուժքույրերի համար, որոնց աշխատանքից է կախված փոխպատվաստված հիվանդների պատշաճ խնամքը: ՀՀ ԱՆ Առողջապահական ԾԻԳ-ի ներկայացուցիչը շնորհակալություն է հայտնել ջերմ ընդունելության, ինչպես նաև հետագա համագործակցության պատրաստակամություն համար: Արյունաբանական կենտրոնի մասնագետների արտերկրյա վերապատրաստումը ՀՀ կառավարության 2016 թվականի գերակա խնդիրներից մեկն է:

Հարցեր, պատասխաններ, մեկնաբանություններ