Զբոսաշրջությունը Հայաստանի տնտեսության դինամիկ զարգացող ճյուղերից է. Կայացավ «In Tour Expo 2016» ցուցահանդեսը

Տուրիզմի ներկայացուցիչներին ապրիլի 15-17-ը մեկ հարկի տակ էր հավաքել  «In Tour Expo 2016» ցուցահանդեսը: Ցուցահանդեսը բացահայտում է տուրիստական առաջարկների ամբողջ տեսականին՝ շրջագայությունների կազմակերպում ամբողջ Հայաստանում, Լեռնային Ղարաբաղում և աշխարհի տարբեր երկրներում, ավիափոխադրումներ, հյուրանոցների ամրագրում, գործնական տուրեր, ապահովագրական ծառայություններ և այլն:

Ցուցահանդեսին մասնակցում էին ոլորտի շուրջ 80 առաջատար կազմակերպություններ ամբողջ աշխարհից: ՀՀ Կառավարության, ՀՀ Էկոնոմիկայի նախարարության և ԼՂՀ Էկոնոմիկայի նախարարության աջակցությամբ իրականացվող ցուցահանդեսը կնպաստի  տուրիզմի զարգացմանը, կխթանի ներգնա տուրիզմը Հայաստանում և Լեռնային Ղարաբաղի Հանրապետությունում: Նախորդ տարիների փորձն ապացուցեց, որ այստեղից են մեկնարկում սեզոնի նոր և լավագույն առաջարկները:  Ցուցահանդեսի բացման արարողությանը ՀՀ Արգործնախարարի տեղակալ Ռոբերտ Հարությունյանը ողջունեց բոլոր մասնակիցներին և հույս հայտնեց, որ այս միջոցառումը հարթակ կդառնա ոլորտի մասնագետների և սպառողների շփման համար: «Ցուցահանդեսը  հնարավորություն կտա ոլորտում մեկս մյուսին ավելի լավ ճանաչելու, Հայաստանը նորովի բացահայտելու և նոր միասնական ծրագրեր իրականացնելու: Զբոսաշրջության համար Հայաստանը  բավականին հարուստ երկիր է և յուրաքանչյուր զբոսաշրջիկ այստեղ կարող է գտնել հանգստի այն տեսակը, որը նախընտրում է»:

ՀՀ բնապահպանության նախարարի տեղակալ Խաչիկ Հակոբյանը տուրիզմը կարևորում է հատկապես  երկրի տնտեսության զարգացման տեսանկյունից:  Իսկ դինամիկ զարգացող ոլորտում հատկապես առանձնացնում է էկոտուրիզմի զարգացումը: «Էկոտուրիզմը նոր թրենդ է աշխարհում, շատերի համար նախընտրելի է դարձել բնության գրկում հանգիստը: Հայաստանի բնությունը թույլ է տալիս զարգացնել տուրիզմի այդ ճյուղը: ՀՀ տարածքի շուրջ 13%-ը բնության հատուկ պահպանվող տարածքներ են՝ ազգային զբոսայգիներ, արգելոցներ, որոնք ներկայացնում են մեր երկրի հարուստ կենսաբազմազանությունը: Այս ամենը շատ գրավիչ է վայրի բնության սիրահարների համար: ՀՀ կառավարությունն այս տարի էկոտուրիզմը և այդ շրջանակներում բնապահպանության նախարարության հետ էկոտուրիզմի տեղեկատվական կենտրոնների ստեղծումը սահմանել է որպես գերակա խնդիր»:

Լեռնային Ղարաբաղի հանրապետության  էկոնոմիկայի նախարարի տեղակալ Սերգեյ Շահվերդյանը կարևորեց միջոցառումը հատկապես վերջին իրադարձությունների ֆոնին:  Արցախում զբոսաշրջության զարգացումը տեղեկատվական առումով մեծ նշանակություն ունի: Դրանից զատ, այն կզարգացնի նաև տնտեսությունը, որն է՛լ ավելի կուժեղացնի զինվորին, բանակը:

Ռուսաստանի դաշնության առևտրային ներկայացուցիչը Հայաստանում՝ Անդրեյ Բառկոն, Հայաստանը տուրիզմի գրավիչ կենտրոններից մեկն է համարում:  «Հայաստանը հատկապես վերջին ժամանակներս շատ մեծ ուշադրության է արժանանում հենց ռուս զբոսաշրջիկների կողմից: Հայաստանը հարուստ է ո՛չ միայն ջերմ մարդկանցով, այլև տուրիզմի զարգացմանը խթանող հյուրընկալ հյուրանոցներով, ռեստորաններով, մատչելի գներով, հետաքրքիր տուրերով, որոնք աննկարագրելի տպավորություն են թողնում զբոսաշրջիկների վրա»:

Վերջին տարիներին պետական ընդգծված քաղաքականություն է տարվում, որպեսզի Հայաստանի Հանրապետությունում զբոսաշրջությունն իր զարգացման տեմպերով և արդյունքներով դառնա տնտեսության դինամիկ զարգացող ճյուղերից մեկը: Զբոսաշրջության բնագավառի պետական քաղաքականության նպատակն է` մեծացնել զբոսաշրջության ներդրումը ազգային եկամտի ավելացման, համաչափ տարածքային զարգացման, բնակչության կենսամակարդակի բարձրացման գործընթացում, ինչպես նաև, Հայաստանը ներկայացնել որպես զբոաշրջության համար բարենպաստ և գրավիչ երկիր:

Ցուցահանդեսի կազմակերպիչ «Էքսպո գրուպ» ընկերության հիմնադիր տնօրեն Վահագն Միրիջանյանը մեզ հետ զրույցում ներկայացրել է ցուցահնդեսի մանրամասները:

–   Ցուցահանդեսն արդեն 3-րդն է իր տեսակի մեջ, ի՞նչ նպատակներ կան, ի՞նչ նախագծեր:

–   Մենք փորձում ենք հետզհետե  ընդլայնել ցուցահանդեսի աշխարհագրությունը: Այս տարի Հայստանից բացի մասնակցում են Արցախի հանրապետությունը, Ճապոնիան, Իսրայելը, Եգիպտոսը, Ռուսաստանը: Կան բազմաթիվ պայմանավորվածություններ արդեն հաջորդ էքսպոյի կազմակերպման վերաբերյալ: Հաջորդ տարի ցուցահանդեսին կտանք  տարածաշրջանային նշանակություն՝ ամրապնդելով Վրաստան-Հայաստան-Պարսկաստան-Ռուսաստան զբոսաշրջային կապը:  Սա զուտ զբոսաշրջային միջոցառում է, հարթակ է ոլորտի մասնագետների համար` գտնելու նոր համագործակցություններ, տալու նոր առաջարկներ շուկային:

–   Ի՞նչ կարևորություն ունի ցուցահանդեսը սպառողի համար:

–   Ցուցահանդեսի գերակա նպատակը նաև սպառողներին կողմնորոշելն է, օգնել նրանց պլանավորել իրենց հանգիստը: Նրանք կարող են այստեղ ծանոթանալ տարբեր առաջարկներին, նորություններին, պլանավորել իրենց հանգսիտն ավելի շահավետ ու որակով: Միջոցառմանը մասնակցում են բազմաթիվ նոր կազմակերպություններ, ովքեր բավականին  շահավետ առաջարկներ ունեն ներքին տուրիզմի համար:

Հարցեր, պատասխաններ, մեկնաբանություններ