«Ֆարմակոլոգիայից մինչև ապացուցողական բժշկություն» թեմայով գիտաժողով

«Գրինդեքս» դեղագործական ընկերության հայաստանյան ներկայացուցչության նախաձեռնությամբ, Երևանում կազմակերպվեց «Ֆարմակոլոգիայից մինչև ապացուցողական բժշկություն» թեմայով գիտաժողով՝ նվիրված սրտաբանության ոլորտին, մասնավորապես, բետա-պաշարիչներից՝ կարվեդիլոլ ազդող նյութին:

Մեդ-Պրակտիկը «Գրինդեքս» դեղագործական ընկերության հայաստանյան ներկայացուցչության ղեկավար Աշոտ Սարգսյանի հետ զրուցեց «Կարվեդիլոլ»-ի առանձնահատկությունների մասին, ինչպես նաև սրտաբանության ոլորտում ընկերության գլխավոր առաջարկներից:

Մենք այսօր ներկայացնում ենք բետա-պաշարիչների խումբը, որի ներկայացուցիչներից է նաև «Կարվեդիլոլ»-ը: Չնայած բետա-պաշարիչների խումբը բավական ընդգրկուն է, այսօր անդրադառնալու ենք հատկապես կարվեդիլոլ ազդող նյութին, որը ոչ սելեկտիվ բետա-պաշարիչ է և ի, տարբերություն այլ բետա-պաշարիչների, պաշարում է նաև ալֆա ընկալիչները:

–   Որո՞նք են նրա գլխավոր առանձնահատկությունները:

–   «Կարվեդիլոլ» խումբը երրորդ սերնդի բետա-պաշարիչ է և նրա ոչ սելեկտիվ լինելը տալիս է հավելյալ հատկություններ: Ունենալով նաև ալֆա-պաշարում՝ կիրառման ժամանակ նա ձեռք է բերում լրացուցիչ արդյունավետություն:

«Գրինդեքս»-ը ներկայացված է սրտաբանական բավականին մեծ ցանկով: Հայաստանյան շուկայում առկա է կարվեդիլոլի երեք դոզավորում, ինչը հեշտացնում է բժշկի ընտրությունը՝ թույլ տալով նշանակել այն տարբեր դեպքերում: Կարևոր է նաև այն փաստը, որ «Գրինդեքս»-ն առաջարկում է գին-որակ լավագույն համադրությունը:

Վերջերս «Գրինդեքս»-ը հանդես եկավ նորամուծությամբ՝ հնարավորություն տալով   պացիենտին հատուկ տեխնոլոգիայի օգնությամբ խուսափել կեղծ դեղերից, ինչի մասին Մեդ-Պրապտիկին պատմեց ընկերության հայաստանյան ներկայացուցչության մենեջեր Սարմեն Վանեսյանը:

–   Դեղերի բնօրինակը տարբերելու տեխնոլոգիան արդեն բավականին լայն ճանաչում է գտել Եվրոպայում, և «Գրինդեքս»-ը՝ որպես եվրոպական չափանիշներով առաջնորդվող ընկերություն, ընդգրկվել է ծրագրում: Գործընթացը հետևյալն է. յուրաքանչյուր դեղի համար գեներացվում է QR կոդ, որը գնորդը կարող է կարդալ իր սմարթֆոնով և տեղում ծանոթանալ ամբողջ տեղեկատվությանը՝ համոզվելով, որ գնում է դեղի բնօրինակը: «Գրինդեքս»-ը գործնականում արդեն կիրառում է այս տեխնոլոգիան, որը պրակտիկորեն կանխում է բոլոր հնարավոր կեղծումները:

–   Հայաստանում հասցրե՞լ է տարածում գտնել այս տեխնոլոգիան:

–   Սա բավականին ծախսատար և աշխատատար գործընթաց է, և Հայաստանում մենք առաջինն ենք սկսել, սակայն մեզ հայտնի է, որ ծրագրում կան նաև մեր երկրում ներկայացուցչություններ ունեցող այլ եվրոպական ընկերություններ: Նոր պատվերները «Գրինդեքս» ընկերությունն աստիճանաբար կստանա QR կոդերով պաշտպանող տեխնոլոգիայի կիրառմամբ՝ արդեն իսկ արտադրված և պահեստավորված դեղորայքի քանակները սպառելուց հետո:

Գիտաժողովի շրջանակում դասախոսությամբ հանդես եկավ Երևանի պետական բժշկական համալսարանի անհետաձգելի սրտաբանության ամբիոնի վարիչ Հմայակ Սիսակյանը, ում հետ Մեդ-Պրակտիկը զրուցեց ոլորտի խնդիրների մասին:

–   Դեղագործական շուկան հեղեղված է տարբեր դեղերով: Ներկայում կլինիկական բժշկության առաջնահերթություններից է դեղերի երկարատև կիրառման դեպքում պացիենտի կյանքի որակի բարելավումը և մահացության նվազեցման գնահատումը: Սա նաև ֆարմակոէկոնոմիկ տեսանկյունից է կարևոր: Եթե այս կամ այն ախտաբանությամբ հիվանդը երկարատև օգտագործում է դեղ, որը չի նվազեցնում մահացությունը, չի բարելավում կլինիկական ախտանիշները,  իրավիճակը ո՛չ միայն հիվանդի համար է անօգուտ, այլև անարդյունավետ է ֆարմակոէկոնոմիկ տեսանկյունից: Ժամանակակից բժշկությունը զարգանում է դեղերի հիմնավորված կիրառության ուղղությամբ:

–   Ձեր ելույթի սկզբում պատմական անդրադարձ կատարեցիք դեղերի մի խմբի, որի կիրառությունը սկզբնական շրջանում միանշանակ չընդունվեց... Դա օրինաչափությո՞ւն է բժշկության մեջ:

–   Այո՛, նույնը վերաբերում է տվյալ դեղին՝ կարվեդիլոլին: Մոտ երեսուն-քառասուն տարի առաջ նախնական հետազոտություններում հակասություններ կային, սակայն ապացուցողական բժշկությունը ցույց տվեց դրա արդյունավետությունը:

Սա է հենց ապացուցողական բժշկության ուժը, որը ստեղծում է օբյեկտիվ պատկեր՝ անկախ առանձին սուբյեկտների գնահատականներից:

 
–   Դեղերի այս խումբը կիրառության ի՞նչ սպեկտր ունի պրակտիկ բժշկության մեջ:

-–   Բավականին լայն: Սրտաբանության ոլորտում կիրառվող ամենաարդյունավետ դեղերից է, միևնույն ժամանակ՝ մատչելի, ինչը շատ կարևոր է երկարատև կիրառության դեղերի դեպքում:

–   Պաշարիչ դեղերի խումբը պրակտիկ կիրառության մեջ ի՞նչ նոր հնարավորություններ տվեց:

–   Պաշարիչները մեծ փոփոխություն մտցրեցին սրտային անբավարարության, իշեմիկ հիվանդությունների բուժման գործընթացում: Երկարատև կիրառության դեպքում դրանք, իսկապես, նվազեցրել են մահացությունը:

Այսօրվա միջոցառումը շատ կարևոր էր, որովհետև մեկ անգամ ևս արծարծվեց քրոնիկ սրտային անբավարարության, հիպերտենզիայով հիվանդների բուժման արդյունավետության հարցը տվյալ խմբի դեղերի կիրառության պարագայում:

Բժիշկների համար շատ կարևոր է ուղեցուցային դեղերի կիրառումը պրակտիկայում, որն առավել նպատակային է վերջնարդյունքի՝ արդյունավետ բուժման համար և զերծ է պահում հնարավոր թերացումներից, ավելորդ բուժական միջոցառումներից:

Հարցեր, պատասխաններ, մեկնաբանություններ