Երևանում կայացավ սիրտ-անոթային համակարգի խնդիրների վերլուծմանը նվիրված գիտաժողով

«Գեդեոն Ռիխտեր» ԲԲԸ հայաստանյան ներկայացուցչությունը` Հայկական բժշկական ասոցիացիայի հետ համատեղ, Երևանում կազմակերպեց սիրտ-անոթային համակարգի խնդիրների վերլուծմանը նվիրված գիտաժողով:

Մեդ-Պրակտիկի հետ զրույցում «Գեդեոն Ռիխտեր» ընկերության հայաստանյան ներկայացուցչության մենեջեր Լուսինե Բլուրցյանը նշեց, որ հանդիպմանը հրավիրված են  թերապևտներ, սրտաբաններ, նյարդաբաններ և ներզատաբաններ՝ քննարկելու երկու մեծ խմբի դեղերի («Նորտիվան», «Մերտենիլ») կիրառման ասպեկտները սիրտ-անոթային համակարգի խնդիրների ժամանակ:

–   Սեզոնն այնպիսին է, որ ճնշման խնդիրները հաճախ են գլուխ բարձրացնում, բացի այդ, սիրտ-անոթային խնդիրները պետք է պահել հետևողական վերահսկողության ներքո: Դաշտում մշտապես նոր դեղեր ու մոտեցումներ են հայտնվում, և մենք փորձում ենք հետևել ու ներկայացնել միջազգային չափանիշներ, միջազգային ուղեցույցներով հաստատված տեղեկատվություն:

Հայաստանում սրտաբանությունը բարձր մակարդակի վրա է. մեր սրտաբանները հետևում են թե՛ եվրոպական, թե՛ ամերիկյան միտումներին:

«Գեդեոն Ռիխտեր»-ի հրավերով գիտաժողովի ժամանակ հանդես եկավ ԵՊԲՀ Անհետաձգելի սրտաբանության ամբիոնի դոցենտ, բ.գ.թ. Հ.Կ Կժդրյանը` «Դիսլիպիդեմիաներ. ի՞նչ են հուշում ժամանակակից կլինիկական ուղեցույցները» թեմայով դասախոսությամբ.:

–   Պարոն Կժդրյան, դասախոսության ընթացքում անդրադարձաք ճարպակալման ժամանակ սիրտ-անոթային համակարգին ուղղված ռիսկի գործոններին: Որքանո՞վ է թեման արդիական:

–   Դիսլիպիդեմիաներին վերաբերող թեման մնում է մշտապես արդիական: Թեև խնդիրը հաճախ է բարձրաձայնվում, դեռ շատ հարցեր լուսաբանման կարիք ունեն: Մասնավորապես, ե՞րբ և ի՞նչ հետազոտություններ, լաբորատոր քննություններ է պետք իրականացնել, ի՞նչ ստատիններ ընտրել: Ստատիներն արդեն լայնորեն կիրառվում են մեր պրակտիկայում, միևնույն ժամանակ, շատ ակտուալ է նաև ստատիններով պայմանավորված բազմաթիվ անցանկալի երևույթների մասին հաճախ բարձրաձայնելը:

Օրինակ, վերջին տարիներին հաճախ է խոսվում ստատինների՝ շաքարախտ զարգացնելու հնարավոր ռիսկի մասին: Այսօր անդրադարձել եմ նաև այդ հիմնահարցին:

–   Ինչպիսի՞ն եք տեսնում միջազգային փորձ - հայաստանյան իրավիճակ համեմատությունը:

–   Կարծում եմ՝ հայաստանյան իրավիճակը լիովին համարժեք է միջազգային փորձին: Ստատինների և՛ կիրառումը, և՛ վերահսկողությունը բավականին բարձր մակարդակով է իրականացվում: Դրան, իհարկե՛, մեծապես նպաստել են նաև վերջին տարիներին իրականացված իրազեկման աշխատանքները: Հիմա ժամանակն է խոսելու նաև հնարավոր անցանկալի երևույթների մասին, քանի որ ստատինները ևս, ի վերջո, դեղորայք են. կախարդական հաբեր չեն: Ստատիններն անհրաժեշտ է նշանակել հստակ ցուցումների առկայության դեպքում, միշտ անհրաժեշտ է կշռել սրտանոթային ռիսկը նվազեցնելու օգուտը և հնարավոր անցանկալի երևույթների առաջանալու հավանականությունը:

–   Նման գիտաժողովներն արդյունավետ համարո՞ւմ եք` բժիշկներին անհրաժեշտ փորձ ու գիտելիք փոխանցելու:

–   Միանշանակ: Ինքներդ էլ տեսնում եք, թե ինչ մարդաշատ լսարան է հավաքվել, և դա պատահական չէ, քանի որ թեման, իսկապես, հետաքրքրում է բժիշկներին: Իմ անդրադարձը լիովին հենվում է կլինիկական վերջին ուղեցույցների տեղեկատվության վրա, ինչը, կարծում եմ, հիմնավորված է և օգտակար:

«Սարտանները՝ հակագերճնշումային դեղերի շարքում» թեմայով դասախոսությամբ հանդես եկավ Երևանի գլխավոր սրտաբան, Կանխարգելիչ սրտաբանության կենտրոնի գիտական ղեկավար Պ.Հ. Զելվեյանը:

–   Պարոն Զելվեյան, զարկերակային գերճնշումը՝ որպես խնդիր. իրավիճակի ի՞նչ փոփոխություն ունենք վերջին տասը տարիների ընթացքում:

–   Նախ նշեմ, որ շատ կարևոր հարց է դեղորայքային կարգավորումը, և ուրախալի է, որ հասարակությունն աստիճանաբար գիտակցում է դա: Գիտակցում է, որ առողջ լինելն ամենամեծ գանձերից է: Այսօր եծանում է սերունդ, որն, իրավամբ, գնահատում ու արժևորում է իր առողջությունը. ռիսկի գործոնների նվազեցում, համապատասխան ֆիզիկական վարժություններ, ծխախոտի դեմ պայքար...

Ես մեծապես կարևորում եմ կանխարգելիչ սրտաբանությունը, որովհետև ավելի կարևոր է կանխարգելել, քան հետագայում խնդիրը բուժմամբ լուծել` արդեն զարգացած հիվանդության կամ, առավել ևս, բարդացած պարագայում:

Դրական արդյունքը պայմանավորված է նաև նրանով, որ տարիներ շարունակ անդադար բարձրաձայնվել է խնդիրների մասին, և մենք այսօր տեսնում ենք բարձր գիտակցությամբ երիտասարդներ:

Հարցը սկսել է կարևորվել նաև առողջապահության կազմակերպիչների շրջանում: Կարծում եմ՝ բարձր արդյունավետություն ապահովելու համար հարկավոր է ունենալ սիրտ-անոթային հիվանդությունների կանխարգելման պետական ծրագիր:

–   Ելնելով Ձեր փորձից՝ հատկապես ի՞նչն է կարևոր այս խնդրի հաղթահարման ճանապարհին:

–   Սովորաբար խոսքս ուղղում եմ պացիենտներին, ինչը նաև շատ եմ կարևորում. նրանք պետք է բուժեն իրենց՝ օգտագործելով մեր գիտելիքները: Եթե պացիենտը պատրաստ չէ բուժվելու, մենք ոչինչ անել չենք կարող: Պացիենտը բուժման սխեմայի ամենակարևոր դերակատարն է:

Յուրաքանչյուր դեղ նշանակելիս պացիենտի հետ պետք է տարվի երկար աշխատանք, բացատրվի բոլոր հնարավոր կողմնակի ազդեցությունները: Պետք է կրթել պացիենտին, ձեռք բերել նրա վստահությունը, որպեսզի, գանգատ ունենալու դեպքում, պատահական, չվերահսկվող տեղեկատվական աղբյուրներին դիմելու փոխարեն, խորհրդակցի իր բժշկի հետ: Սա կբերի բազմաթիվ լուրջ խնդիրների կանխարգելման:

Հարցեր, պատասխաններ, մեկնաբանություններ