15-րդ միջազգային մասնագիտացված ցուցահանդեսը` «Առողջապահություն և Դեղագործություն EXPO 2016»

Մարտի 4-ից 6-ը  LOGOS EXPO Center  ցուցահանդեսային ընկերությունը կազմակերպել էր 15-րդ միջազգային մասնագիտացված ցուցահանդեսը` «Առողջապահություն և Դեղագործություն EXPO 2016», որն ուղղված էր բժշկական կենտրոնների ղեկավարների, գիտաշխատողների, ներդրողների, ձեռնարկատերերի, ինչպես նաև բժշկական ապրանքների և ծառայությունների շուկայում աշխատող մասնագետների այցելությանը:

«Առողջապահություն և դեղագործություն  EXPO 2016» ցուցահանդեսը բացառիկ հնարավորություն է լսել բժշկության տարբեր ոլորտների առաջատար մասնագետների կարծիքը և խորհուրդները, գտնել տեղական առողջապահության տարբեր ոլորտներում այսօրվա պրակտիկայով թելադրված խնդիրները լուծելու ուղիներ:

Ցուցահանդեսին ներկայացված էին 80-ից ավելի մասնակիցներ, որոնց մոտավորապես 1/3-ն  արտասահմանյան ընկերութուններն էին Ռուսաստանից, Բելառուսիայից, Իրանից, Գերմանիայից, Լեհաստանից, Իսրաելից: Ցուցահանդեսի մասնակիցները և այցելուները հնարավորություն ստացան ծանոթանալ արտասահմանյան ընկերությունների պրոֆեսիոնալ ձերքբերումներին:

Այս տարվա ցուցահանդեսի առանձնահատկությունն էր տեղական և արտասահմանյան ընկերությունների կողմից ներկայացված բժշկական սարքավորումների մեծ քանակությունը: Ցուցահանդեսի շրջանակներում անցկացվեց մասնագիտացված ատամնաբուժական ցուցահանդես:

Բացման խոսքով հանդես եկան LOGOS EXPO Center ցուցահանդեսային ընկերության գլխավոր տնօրեն Սուրեն Նազինյանը և ՀՀ Առողջապահության փոխնախարար Գագիկ Միրիջանյանը: Վերջինս կարևորեց, որ ցուցահանդեսը հնարավորություն է ստեղծում մեկ հարկի տակ ներկայացնել առողջապահական տարբեր ոլորտների ներկայացուցիչների, ստեղծել հարթակ՝ փոխհամագործակցության համար:

Մեզ հետ զրույցում պարոն Սուրեն Նազինյանն ասաց. «Կենտրոնը ստեղծվել է 1999 թվականին և առաջին մասնավոր ցուցահանդեսային ընկերությունն է ու առ այսօր ամենախոշորն է Հայաստանում: LOGOS EXPO Center  ցուցահանդեսային ընկերությունը տարբեր ոլորտներում ամեն տարի կազմակերպում է  6 ցուցահանդես, որոնցից ամենամեծն ամենամյա «Արմենիա Էքսպո» ունիվերսալ ցուցահանդեսն է: «Առողջապահություն և Դեղագործություն EXPO 2016» միջազգային ցուցահանդեսն առաջին անգամ կազմակերպել ենք 2002 թվականին և այս տարին հոբելյանական է՝ 15-րդ ցուցահանդեսն ենք անցկացնում: Չնայած ոլորտում կան ընկերություններ, որոնք նույնպես կազմակերպում են ցուցահանդեսներ, բայց, վստահաբար կարող եմ ասել, որ մենք ենք առաջին անգամ կազմակերպել «Առողջապահություն և դեղագործություն» խորագրով ցուցահանդես: Այս տարի մենք կարողացանք կազմակերպել և անցկացնել իր ծավալներով և մասնակից ընկերությունների թվով ամենամեծ բժշկական ցուցահանդեսը Հայաստանում, և դա դարձավ 15-րդ հոբելյանական տարվա համար մեր ձեռքբերումը»:

Մարտի 6-ի երեկոյան «Ռոյալ Թուլիփ Գրանդ Հոթել Երևան» հյուրանոցում տեղի ունեցավ հոբելյանական «Առողջապահություն և Դեղագործություն EXPO 2016» միջազգային ցուցահանդեսի փակման պաշտոնական արարողությունը: 

Հարցեր, պատասխաններ, մեկնաբանություններ