Տնօրհնեքի արարողություն «Իզմիրլյան» բժշկական կենտրոնում. izmirlianmedicalcenter.com

Սուրբ Ծննդյան տոնին հաջորդող մեկ ամսվա ընթացքում տնօրհնեքի արարողություններ են կատարվում ո՛չ միայն բնակարաններում, այլև աշխատավայրերում, ուսումնական և բժշկական հաստատություններում:

Մայր Աթոռի հովանու ներքո գործող «Իզմիրլյան» ԲԿ-ում ևս կատարվեց այս տարվա առաջին տնօրհնյաց կարգը: Տաթև արքեպիսկոպոս Սարգսյանն ավելի քան տասը տարի «Իզմիրլյան» ԲԿ-ի հոգևոր տեսուչն է: Նա Մայր Աթոռի բարձրաստիճան հոգևորակնների հետ օրհնեց հացը, ջուրը, աղը:

«Մենք փորձում ենք հոգևոր աջակցությամբ օգնել մեր բոլոր բժիշկներին, որպեսզի Աստծո բժշկարար ուժը հասնի անոնց, ովքեր դրա կարիքն ունեն: Մենք ինքներս հասկանում ենք, որ բժիշկների գործը դյուրին չէ, բժիշկներն իրենք էլ սթրեսի մեջ են ապրում, դրա համար միասին աշխատում ենք հոգևոր աջակցությամբ: Եթե հիվանդը բժշկվելու հույսը չունենա, դեղերը չեն օգնելու, դրա համար անհրաժեշտ է հոգևոր կարողություններ»,- ամփոփում է Տաթև արքեսպիկոս Սարգսյանը:

 
«Իզմիրլյան» ԲԿ-ում աշխատում են ավելի քան 170 բուժաշխատող: Ինչպես նշում է «Իզմիրլյան» ԲԿ տնօրեն Ա. Չարչյանը. «Հոգևոր ապաքինումը, թերևս, ոչ պակաս կարևոր է, քան ֆիզիկական ապաքինումը: Հոգևոր առաջնորդությունը բժիշկների համար, ապաքինվողների համար ևս խիստ կարևոր է, որպեսզի նրանք գիտակցեն իրենց կատարածի անհրաժեշտությունը: Ուստի հոգևորի ներկայությունը բուժհաստատություններում, համենայդեպս` ինձ համար, շատ կարևոր է», - ամփոփում է Ա. Չարչյանը:

Տնօրհնյաց կարգին հաջորդեց ջրօրհնեքի արարողությունը, որը կատարվեց կենտրոնի վիրահատարանի և վերականգնողական բաժնում: Հոգևոր հայրերը աղոթեցին հիվանդների ու աշխատակազմի համար: Արարողությունից հետո բուժաշխատողներն իրենց հետ վերցրեցին օրհնված ջրից՝ հիվանդներին բաժանելու համար:

Հարցեր, պատասխաններ, մեկնաբանություններ