ՀՀ ԱՆ. ՊԱԳ հավաստագիր` հայրենական երրորդ դեղարտադրողին

ՀՀ առողջապահության նախարար Արմեն Մուրադյանը «Ֆարմատեք» դեղագործական ընկերությանն այսօր հանձնեց Պատշաճ արտադրական գործունեության` GMP (ՊԱԳ) հավաստագիր: Հայրենական դեղագործության զարգացումը ՀՀ կառավարության որդեգրած արտահանմանն ուղղված քաղաքականության հիմնարար ուղղություններից մեկն է, իսկ ՊԱԳ հավաստագրումը դրա իրագործման առանցքային գործընթացը, քանի որ այն մեր արտադրողներին հնարավորություն կտա նաև ընդլայնել իրենց արտադրանքների իրացման սահմանները և խթանել արտադրության զարգացումը:

«Տարվա ընթացքում գրանցված հաջողություններից մեկն այն է, որ հայաստանյան 19 արտադրողներից արդեն երրորդն է ստանում Պատշաճ արտադրական գործունեության հավաստագիր: Սա վկայում է ոչ միայն անվտանգության մասին, այլև հնարավարություն է ընձեռում միջազգային շուկայում ներկայանալի դարձնել հայկական ատադրությունը»,- ընդգծեց Արմեն Մուրադյանը:

Շնորհավորելով ընկերության գլխավոր տնօրեն Վահան Առուշանյանին` նախարարը հույս հայտնեց, որ 2016թ. ևս աշխատանքներ կիրականացվեն, որպեսզի ՊԱԳ հավաստագիր ունեցող դեղագործական կազմակերպությունները համալրվեն:

Ներկա պահին արդեն հանրապետության դեղարտադրող 3 կազմակերպություն` «Լիկվոր», «Արփիմեդ», «Ֆարմատեք», իրենց գործունությունն ամբողջությամբ իրականացնում են պատշաճ արտադրական գործունեության պահանջներին համապատասխան:

Ավանդույթի համաձայն միջոցառմանը ներկա էին նաև նախորդ տարիներին ՊԱԳ հավաստագրեր ստացած «Լիկվոր» և «Արփիմեդ» դեղագործական ընկերությունների ներկայացուցիչները:

2010թ. նոյեմբերին ՀՀ կառավարությունը հաստատեց հանրապետությունում դեղերի պատշաճ արտադրական գործունեության կանոնները` որպես դեղերի որակի ապահովման համակարգի կարևորագույն բաղադրիչներ, որոնցով երաշխավորվում է, որ դեղը մշտապես արտադրվում ու հսկվում է որակի հաստատված չափորոշիչների համաձայն:

Նշենք, որ «Ֆարմատեք» դեղերի արտադրությունը հիմնադրվել է 1997թ. և լիցենզավորվել է ՀՀ առողջապահության նախարարության կողմից 2005թ. ապրիլին: Միջազգային կազմակերպությունների կողմից որակի կառավարման համակարգի բազմակի գնահատումներից հետո ընկերությանը տարիներ շարունակ տրամադրվել է ISO հավաստագրեր: Մեր երկրում դեղերի արտադրության պատշաճ գործունեության կանոնների և դեղերի ոլորտում բարեփոխումներ իրականացնելու մասին ՀՀ կառավարության 2010թ. որոշումը ընունելուց հետո ընկերությունը իր հզորությունները համապատասխանեցրեց նշված կանոններին, որոնք համահունչ են միջազգայնորեն ընդունված պահանջներին: Այդ նպատակին հասնելու համար ՀՀ ԱՆ Դեղերի փորձագիտական կենտրոնի և միջազգային փորձագետների հետ համատեղ կողմից կազմակերպվել են դիտարկումներ թերությունները վերհանելու և դրանք վերացնելու շրջանակներում:

Նախարարը ծանոթացավ ընկերության արտադրական հզորություններին, հետաքրքրվեց արտահանման ծավալներով:

Դեղագործական կազմակերպությունում շրջայցին և հավաստագրի հանձնման արարողությանը հաջորդեց Արմեն Մուրադյանի ամփոփիչ ասուլիսը, որի ընթացքում նա ներկայացրեց 2015թ. ընթացքում ՀՀ առողջապահության նախարարության կատարած աշխատանքը, առաջիկա ծրագրերը:

Հարցեր, պատասխաններ, մեկնաբանություններ