ՀՀ ԱՆ. Վիրաբույժների հայկական ասոցիացիան նոր նախագահ ունի

Երևանի պետական բժշկական համալսարանում անցկացվեց «Վիրաբույժների հայկական ասոցիացիա» հասարակական կազմակերպության հերթական նիստը, որին մասնակցում էր ՀՀ առողջապահության նախարար Արմեն Մուրադյանը:

ՀՀ ԱՆ գլխավոր վիրաբույժ, պրոֆեսոր Հովհաննես Սարուխանյանը նշեց, որ նիստը հրավիրված է նոր նախագահություն ընտրելու նպատակով: Միջոցառման սկզբին մեկ րոպե լռությամբ մասնակիցները հարգեցին վերջին տարիներին կյանքից հեռացած անվանի վիրավույժների հիշատակը:

Հովհաննես Սարուխանյանը ղեկավարել է այս մասնագիտական միավորումը 1987 թվականից սկսած: Նա համառոտ ներկայացրեց մեր երկրում վիրաբուժության սկզբնավորման, կայացման և զարգացման ուղին: Պրոֆեսորը անդրադարձավ, թե հաջողություններին, թե խնդիրներին:

Հովհաննես Սարուխանյանի առաջադրմամբ և բաց քվեարկության արդյունքում Վիրաբույժների հայկական ասոցիացիայի նոր նախագահի պաշտոնում միաձայն ընտրվեց ԵՊԲՀ Վիրաբուժության թիվ 4 ամբիոնի վարիչ, «Հերացի» թիվ 1 համալսարանական հիվանդանոցի վիրաբուժական կլինիկայի ղեկավար, պրոֆեսոր Մուշեղ Միրիջանյանը: Նա շնորհակալություն հայտնեց ասոցիացիայի անդամներին վստահության համար:

«Այս կառույցի ղերակավարումը ոչ միայն պատվաբեր է, այլև պատասխանատու: Կատարված աշխատանքով կփորձենք արդարացնել սպասելիքները»,- ասաց Միրիջանյանը:

Ողջունելով ասոցիացիայի անդամներին ՀՀ առողջապահության նախարար Արմեն Մուրադյանը ևս մեկ անգամ կարևորեց մասնագիտական միավորումների հետ արդյունավետ համագործակցությունը: Նախարարի գնահատմամբ` ասոցիացիաները պետք է մասնակից լինեն առողջապահության համակարգում որակի ձևավորման, էթիկական, ինչպես նաև բժիշկի գործունեությանը վերաբերող այլ մասնագիտական խնդիրների լուծման գործընթացին:

«Մասնագիտական միավորումների հետ համագործակցությունը մեր աշխատանքի կարևոր մասն է: Մենք սերտ աշխատում ենք մասնագիտական միավորումների հետ` զարգացնելով տարբեր ուղղություններ»,- նշեց Արմեն Մուրադյանը: Նա մեծապես կարևորեց ավանի վիրաբույժ Հովհաննես Սարուխանյանի անգնահատելի ներդրումը Հայաստանում վիրաբուժության զարգացման և այս ասոցիացիայի ղեկավարման գործում:

Շնորհավորելով նորընտրի նախագահին` նա հույս հայտնեց, որ Վիրաբույժների հայկական ասոցիացիայի հետագա աշխատանքները կնպաստեն ոլորտի զարգացմանը և առաջադեմ փորձի ներդրմանը:

Նիստի ընթացքում Հովհաննես Սարուխանյանը ճանաչվեց ասոցիացիայի պատվավոր նախագահ:

Հարցեր, պատասխաններ, մեկնաբանություններ