«Առողջությամբ պայմանավորված կյանքի որակ. միջմասնագիտական մոտեցում» թեմայով գիտապրակտիկ համաժողովը՝ Երևանում

Երիտասարդ բժիշկների հայկական ասոցիացիայի և Հայկական hակածերացման բժշկական ասոցիացիայի գործադիր կոմիտեների նախաձեռնությամբ Երևանում կազմակերպվեց «Առողջությամբ պայմանավորված կյանքի որակ. միջմասնագիտական մոտեցում» թեմայով գիտապրակտիկ համաժողով: Այն նվիրված էր հատկապես վերջին տարիներին տարբեր իմաստներով լայն շրջանառություն գտած «կյանքի որակ» հասկացությանը՝ առողջության կտրվածքով:

Համաժողովն ուներ նաև հրավիրյալ մասնակիցներ Ռուսատանի Դաշնությունից և Շվեյցարիայից:

ՀՀ առողջապահության փոխնախարար Տիգրան Սահակյանը, ողջունելով միջազգային համաժողովի մասնակիցներին, նշեց, որ նախարարությունը ևս մեծապես կարևորում է առողջությամբ պայմանավորված կյանքի որակը և մի շարք ծրագրեր է իրականացրել՝ ուղղված կյանքի որակի բարձրացման նպատակին: Նրա խոսքով՝ համաժողովի թեմայի հիմքում շատ արդիական հարց է. առողջությունը կյանքի որակի բարելավման գրավականն է:

Հայաստանում ՌԴ դեսպանի օգնական Օլեգ Շապովալովը, բարձր գնահատելով ռուս գործընկերների ներգրավմամբ միջազգային համաժողովի կազմակերպումը, նկատեց, որ այն մեծ դեր կունենա հայ-ռուսական համագործակցության խթանման տեսանկյունից:

Համաժողովն ընթացավ լիագումար նիստի և տարբեր թեմաների անդրադարձող մի քանի սեկցիաների համադրության ձևաչափով:

Մեդ-Պրակտիկի հետ զրույցում Հայկական հակածերացման բժշկական ասոցիացիայի նախագահ Իննա Պերսոյանը, անդրադառնալով համաժողովի թեմային նշեց, որ եթե նախկինում բժիշկը մտածում էր պացիենտի կյանքը փրկելու մասին, ապա այսօր ոչ պակաս կարևոր հարց է որակյալ կյանքի կազմակերպումը: Այսինքն՝ կարևորվում է ո’չ միայն այն, որ մարդը երկար ապրի, այլև կյանքի որակը:

Խոսելով ասոցիացիայի գործունեությունից՝ Իննա Պերսոյանը նշեց, որ իրենք զբաղվում են կանխարգելիչ բժշկությամբ, բայց ոչ այն ընկալմամբ, որն ընդունված էր խորհրդային պատկերացումներում: Խոսքն այս դեպքում վերաբերում է անհատականացված բժշկությանը, որը հենվում է մարդու գենետիկ կոդի վրա:

Հայկական հակածերացման բժշկական ասոցիացիան պայմանագիր ունի Երիտասարդ բժիշկների հայկական ասոցիացիայի հետ, որը ենթադրում է համատեղ ծրագրերի իրականացում, ինչպիսին է, օրինակ, այս համաժողովի կազմակերպումը: «Կարծում եմ, որ ավելի փորձառու բժիշկները պետք է շահագրգիռ լինեն՝ իրենց փորձը փոխանցելու երիտասարդներին. չէ՞ որ նրանք են վաղը զբաղվելու շատ կարևոր հարցերի լուծմամբ, և պետք է պատրաստված լինեն դրան: Փոխանցելով նրանց մեր գիտելիքն ու փորձը՝ մենք ապահովագրում ենք մեր ապագան»,- նշեց բժշկուհին:

Երիտասարդ բժիշկների հայկական ասոցիացիայի նախագահ Գևորգ Գրիգորյանը Մեդ-Պրակտիկի հետ զրույցում նկատեց, որ «կյանքի որակ» հասկացությունը վերջին տարիներին սկսել է կարևորվել ամբողջ աշխարհում: «Առողջապահության համաշխարհային կազմակերպությունը, անցում կատարելով առողջապահական քաղաքականությունից առողջության քաղաքականության, նույնպես շատ կարևորում է այն բոլոր գործոնները, որոնք ազդում են կյանքի որակի վրա:

 
Փորձել ենք այնպիսի հանդիպում կազմակերպել, որ բժշկության բոլոր ուղղությունների մասնագետները կարողանան իրենց ներդրումն ունենալ մեր ժողովրդի կյանքի որակի բարձրացման գործընթացում. մասնակցում են բոլորը՝ սկսած առողջապահության կազմակերպիչներից մինչև նեղ մասնագետներ»,- ասաց նա:

Համաժողվի ընթացքում Հայաստանի և Ռուսաստանի երիտասարդ բժիշկների ասոցիացիաների միջև ստորագրվեց փոխըմբռնման հուշագիր:

Հուշագրի շրջանակում նախատեսվող համագործակցության մասին զրուցեցինք Ռուսաստանի երիտասարդ բժիշկների միության գլխավոր տնօրեն Իլյա Իլյինցեւի հետ.

–   Միայն այն հանգամանքը, որ այս համաժողովին մասնակցում են Հայաստանից և Ռուսաստանից շատ բարձրակարգ բժիշկներ, թույլ է տալիս ունենալ լուրջ սպասելիքներ:  Այս հուշագիրը, կարծում եմ, պատմական արդարությունը կվերականգնի՝ նորից խորացնելով ռուս-հայկական համագործակցության ավանդույթները բժշկության ոլորտում, և երիտասարդ բժիշկները միասին բազմաթիվ օգտակար ու հետաքրքիր ծրագրեր կիրականացնեն: Հուշագիրը վերաբերում է փորձի փոխանակմանը, փոխայցերին, համատեղ ուսումնական ծրագրերին:

Հայաստան գալուց առաջ մենք փոքրիկ սոցհարցում իրականացրեցինք ռուս երիտասարդ բժիշկների շրջանում, որը ցույց տվեց, որ նրանցից շատերը պատրաստ են գալ և որոշ ժամանակ ապրել ու աշխատել Հայաստանում: Հուսով եմ՝ նույն պատրաստակամությունը կա նաև հայ բժիշկների շրջանում:

Հարցեր, պատասխաններ, մեկնաբանություններ